La Tête-nue à Chewed-ear (3)

(siette)

Lé Syndicat sé trouvit sus l'pi'd dé faire fortunne:

Toutes les shâres étaient bein vendues - i n'en restait pus yieunne!

Pour Chewed-ear, l'i, i' n'avait qué d'affoller - car Guinneyveer d'san bord,

L'y trempait la tête occuo la nièt - ch'tait s'lon sé n'accord,

Pourtant, Jenkins sé motchait d'y'ieûx - maûgrè san triste êtat,

Et jurait coumme un perdu sus l'Président, et sus tout l'Syndicat:-

- "Ou z'avèz biaû y travaillyi, tâs d'idgiots" i lus dîsait, "ma tête restèra tréjous nue,

Jé m'fiche dé vous, dé vot frott'tie, et des drogues qu'ou m'vérsèz d'sus!" -

Tout coumme, ov touôs ses d'vis, Chewed-ear était un mio gênè

Dé crainte qu'i n'y'iarriv'rait malheur par être si bein frottè,

Et s'tâtounnait tréjous la tête lé matin en sé l'vant

Pour vais si oull' 'tait ossi finne et blianche coumme lé jour dé d'vant...

Jusqu'au terrible jour qu'i mantchi dé s'èsvanni, en r'gardant dans l'mireux,

I vit qué dans la nièt, i y'iavait cru, unn' deuxième coppe dé qu'veûx!

 

Ses mille dolleurs étaient perdus, et lé Syndicat l's èrait!

Mais... lus dounner touôs chès sous là? du d'jiantre, don, si lé f'rait!

I fît tout d'un coup d'la savounnèe, et sé savounni bel et bein,

Et sé râsi l'haût d'la tête jusqu'ache qu'i n'y resti rein:

Sans perdre dé temps, ou sans être veu, lé v'là tout drait qu'i file

Sièz un' apotitchi qui gardait boutique dé l'aut' but dé la ville,

I y'iachatit dé l'Onguent - dé tchi pus fort qué l'Thatch'em ou l'Hairlinne,

Et qu'empêchait les qu'veûx dé r'craître, et tuait lus p'tites rachinnes.

V'là don la comédie tchi c'menche, et châtchun frottait dé san bord,

Mais, la pouque, ôprès tout, d'vait rester au pus fort;

Chewed-ear avait biâu tâchi dé stériliser san but d'couënne:

Il 'tait tout seu', pouôre corps, à s'battre contre unn' douzaîne?

I perdit couôrage à la fin - et pis, s'n'Onguent touôni traître:

I n'tuait pas unn' mie les qu'veux - i les faîsait pus tôt craître!

 

"Chutt' fais," s'fît-i, "j'en sis à but, et jé n'peux pus y t'nin,

Et sitôt qué j'en érait la chance, jé m'saûvrai hors d'ichin!"

Ch'tait chein qu'i fît, tout trantchill'ment, chutt' maîme journèe là,

I filit bein loin des soins dé Guinneyveer, et du fichu Syndicat,

Unn' plièche ouèqu'i n'counnaissait persounne, et qué persounne né l'counnaissait,

I pouvait y laissi craître ses qu'veûx, ma fingre, coumme i voudrait!

"Et tchi qu'veûx!" qu'i s'dîsait, en pâssant la mais d'sus, "i craîssent et craîssent,

Enfin, faût-y s'en èstounner? i n'lus a pon mantchi d'graisse!" -

Lé mireux qu'i l'avait dans sa chambre, était d'la coummunne sorte,

Un tracâs dé p'tite valeur, et pendu drière la porte -

Et en r'gardant ses qu'veûx dédans, Chewed-ear eut unn' attaque dé ner's,

Ses qu'veûx craîssaient, ch'tait bein vrai, mais i vit qué ses qu'veûx étaient verts!

 

(à siethe)