1975: Les corvées

 Eune articl'ye dé George d'La Forge:

Les corvées

 

Fort Lauderdale,

Florida,

U.S.A.

 

Le preunmyi d'mar, 1975.

 

Moussieu l'Rédacteu,

 

À ch't heu qu'la grand' partie des travailleurs dé nouos jours né pathaîssent vouler faithe autcheune chose sans êt' payis, et tch'il' exigent mème pus d'gages pour cèrtains jours dé la s'maine, comme par exempl'ye lé sanm'di et l'dînmanche, i' m'veint à l'idée qué l'prîncipe des corvées du temps pâssé 'tait eune bouanne discipline, affaithe dé conscienche civile et parouaîssiale, pour l'îndividu, et en mème temps eune aîsie manniéthe dé payi des taxes dans l'temps tch'i' n'y avait pon fort dé sou dans l'mênage ordinnaithe.

 

J'm'èrsouveins qué, y'a huiptante ans, ch'tait naturel dé ouï l'vaîsîn dithe tchi faudra "faithe ses c'mîns" la s'maine tchi veint. Dans chu temps-là tout homme dévait siex jours dé travas, appelés la Corvée, pour asseûther la r'pathâtion et l'maintchein des c'mîns et des routes dé sa pâraisse. Et tout propriêtaithe d'un j'va d'vait l'tchithiage des pièrres pour chu travas. Sans doute, s'i' y'avait empêchement, la corvée pouvait êt' atchitée par lé paiement d'eune amende, mais dé chein qué j'm'en r'souveins, tout l'monde faîsait sa corvée d'bouan tchœu et n'éthait pon pensé qué ch'était 'té méthitouaithe d'êprouver a s'en êcapper.

 

Dans chu temps-là nou viyait tréjous des piles dé pièrre câssée dans l's êcarceux l'long d'certaines routes. Y'en avait iun, un êcarceux, si ma mémouaithe n'est pon fautive, quâsi d'l'aut' côté d'la maîson nouvellement appélée Le Picachon dans La Rue à La Pendue. En m'en allant à l'Êcole Wesleyenne au Haut du Mathais quand j'tais mousse, y'avait souvent un homme à câsser d'la pièrre sus la pile dédans. Y'avait d's hommes tch'y gangnaient lus vie, à câsser d'la pièrre pour èrpather et féther les routes et les c'mîns. I' n'y en avait pon d'tathés dans chu temps-là, et i' n'taient pon si aplianis comme à ch't heu. Et les malfaiteurs condâmnés ès travaux forchis en câsseurs dé pièrre faîsaient sèrvi un p'tit marté spécial pour chutte tâche-là, et i' dév'naient au-faits à la tâche auve la pratique. Les piles dé pièrre câssées 'taient bein faites en forme d'pyramide apliatie, et l'câsseux 'tait payi au taux dé tant la vèrge. L's arpenteurs publiques 'taient appelés à les m'suther.

 

La corvée d'faithe ses c'mîns 'tait êtablyie d'ancienneté, probabliément du Mouoyen Age, et j'sai bein qu'oulle existait acouo en Sèr y'a eune dgiexaine d'années. J'né s'sais pon ravi s'oulle existe acouo là d'nouos jours, mais j'n'en sis pon seux. Oulle existait officiellement à St. Ouën en mil neu chent trente-huit. Un Acte dé l'Assembliée d'Pâraisse du dgiex-huit janvyi dé ch't' année-là (nouos dit l'Docteu Fraînque Le Maistre dans san fanmeux Dictionnaithe Jèrriais-Français) dit qu'à l'unanimité l'Assembliée décidit qu'la r'pathâtion des c'mîn s'fisse par corvées. Mais nou peut craithe qué la corvée fut abandonnée tôt après, car ou n'est pus mentionnée dans l's Actes d'pâraisse. Oulle avait fait partie d'La Louai sus la Voirie dès les vièrs temps, mais j'pense qu' ou fut abolie pon longtemps d'vant l'c'menchement d'la dgèrre dé 1939-1945.

 

Eune au't vielle couôteunme tch'a survêtchut d'vièr temps est la Vîsite du Brancage - l'înspection annuelle pârouaîssiale par les autorités - des fossés l'long des routes pour s'asseûther tch'il' aient 'té êmondés. Les gens ichîn et au Cannada n'en comprannent pon la nécessité voyant tch'i' n'connaîssent pon l'fossé d'Jèrri, ni les rues tch'ont tchiquefais la surface souos l'nivé des clios à côté. Dans cèrtains Êtats longtemps êtablyis nou vait tchiques basses muthâles lé long des routes, mais en général les clios sont s'pathés des routes par des longues barriéthes tchi consistent d'pilièrs en fé ou en bouais atout iun ou plusieurs fis d'fé raidis et ancrés d'pilyi à pilyi.

 

En Jèrri, l'brancage est nécessaithe, sustout dans les p'tites routes viyant que l'hèrbage, ronches et sèrcl'yes craîssent lé long et en d'ssus des fossés, et quand les routes sont êtraites v'la tchi peut encombrer les vaituthes et êgrînflier les peintuthe sus l'côté des motos. V'la tchi fait les motoristes mârri, et j'en ai ouï bliaûmer l's autorités viyant tch'i' n'ordonnent pon eune pus heûsive Vîsite du Brancage. Mais les pouorres fèrmièrs ont d'tchi à faithe pus împortant qu'l'êmond'die - la tâche dé récolter les patates et aut' récoltes en bouan temps pour lé pus d'profit - un profit tchi finnit souvent par être eune pèrte à la pliaiche d'un profit pour cèrtains.

 

Heutheusement pour les fèrmièrs, tch'ont fort à faithe à cause du manque dé bouanne main d'œuvre et d'l'injuthe du temps et du couôtage de s'menche et d'engrais, les corvées du temps jadis deues es Seigneurs des Fiefs dé l'Île n'existent pus - et y'en avait tout plieín, comme ou pouvez l'apprécier en êtudiant l's êcrituthes dé Moussieu G. F. B. de Gruchy. Lé janne Jèrriais tchi n'a pon connu les couôteunmes et les vicissitudes des vièrs temps, dév'thait l's êtudier pour apprécier l'îndustrie, la dueurcheu, la pèrsistance, la pacienche, et l'întégrité d's anciens tch'ont posé la preunmié pierre dé la prospéthité tch'est lus héthitage d'au jour d'aniet!

 

GEORGE D'LA FORGE