Eune gâche à thŷmbre - Thyme cake

Jèrriais · Eune gâche à thŷmbre (èrchette)

Eune gâche à thŷmbre

îngrédgeins:

• 125g dé beurre
• 75g dé fîn chucre
• 2 oeux
• 175g dé flieu à bicarbonate
• 4 tchul'lées à thée d'thŷmbre hadgi
• 4 tchul'lées à soupe dé lait

pouor lé sitho:

• 60g dé chucre en poudre
• un nodgîn d'jus d'orange
• (un lèrmîn d'litcheu d'orange, s'nou veurt)

Amolliez l'beurre et d'battez-lé d'auve lé fîn chucre. Ajouôtez l's oeux douochement en dêmêlant. Ajouôtez la flieu, dêmêlez ensembl'ye épis ajouôtez l'lait pouor dêtremper la pâte.



Lé mus ch'est d'faithe sèrvi du thŷmbre fraîchement tchilyi: d'eune dgiêxaine dé vèrdgettes nou tchil'ye sans doute assez d'fielles, un co hadgies, pouor dans les quat' tchul'lées à thée. Ajouôtez la maîntchi du thŷmbre hadgi au mêlange, épis puchiz la pâte dans eune lachefraie à gâche.

M'ttez dans un fou caûffé à 180° pouor 45 minnutes.

Pouor lé sitho, caûffez douochement l'restant du thŷmbre dans du jus d'orange auve, par exempl'ye, 60g dé chucre en poudre pouor un sitho tchi n'est pon trop radouochi (s'nou-s'aime la chucrinn'nie, nou peut y mett' pus d'chucre). Un co l'chucre dêpensé dans l'jus (sans bouoilli) et l'sitho agouôté du thŷmbre, nou peut ajouôter un lèrmîn d'litcheu d'orange s'lon san goût.

À la r'traite du fou, faites des creux (atout par exempl'ye eune broche) partout l'haut d'la gâche, épis vèrsez l'sitho sus (ch'est probabliément eune bouonne idée d'craînchi l'sitho en l'vèrsant à seule fîn d'èrtcheindre les fielles - nou pouôrra pliaichi eune fraîche vèrdgette dé thŷmbre au mitan du haut d'la gâche pus tard pouor un r'êffet d'présentâtion).