1923: Lé Caouain ès courses

Comme je n'avions pas grand'chose à faithe à la boutique Jeudi, et l'Boss étant, pour un change, d'assez bouanne humeur, je n'eus pas l'embarras d'habitude d'obtenir permission d'aller ès Courses.

''Mais,'' i'm'dit, ''ergarde bain à té, Caouain, ou bain tu s'ras oquo volé comme l'année passée! Nou m'a dit qu'y a pus d'deux chents de ches aventuriers-là dans l'île chute semaine, ch'est pourtchi n'emporte pas trop d'sous sus té!''

Ch'tait pour se fichi d'mé qu'i'm'disait chenna, car i'savait bain que j'n'avais pas seulement chinq chelins à man nom.

Je li d'mandi de m'avanchi un louis ou deux sus mes gages, mais i'r'fusi nette, en 'm'disant qu'i n's'en allait pas m'encouothagi à gaspillyi mes sous d'la sorte.



Nos imprimeurs, qui sont tous d'bouans garçons, eurent pitchi d'mé, et firent une petite collecte entre ieux pour qu'i' n'fusse pas dit que j'étais hors ès Courses sans deustrais coppeurs dans ma pouchette pour mes menu debours.

Quand j'arrivi là bas, je n'eus autchune diffitchulté à entrer sus l'terrain. Il est vrai qu'un jeune policemainne tendit sa main pour man billet, mais l'ex-Chant'nyi Jack Le Bro du Pont Martchet li dit comme chenna ''All right, Press,'' et tout-d'suite i'm fit du run à passer.

Je vis un p'tit troupé d'gens sur la mielle qui m'avaient la mîne bain interêssis à r'garder tchiquechoses et je m'appréchi pour vaie, criyant qu'i'y avait p't'être ieu un accident. Mais nouffait, ch'tait un moussieu avec trais cartes sus une petite tablye, qui donnait un louis à touos les siens qui pouvaient trouver le valet d'trêflye.

Oh! mais ch'tait simplye comme tout, et si j'avais ieu un louis sus mé je crai que j'aithais fait du bisnesse.

Un jeune fermi que j'connais, dêhalli deux louis d'sa pouchette et les pliaichi sus une carte qui li sembliait être le valet d'trêflye, car nou la r'connaissait bain facilement à cause que iune des cartes était un mio touânée en haut.

Mais quand i' la l'vi, chose assez drôle, che n'tait pas l'valet du tout, oulle 'tait, comme nou dit ''blank.''

Le moussieu d'Birmingham ne donnit autchune explication comment qu'chenna s'était fait, mais les deux louis à not'e fermi se trouvithent englotées dans sa pouchette comme des dgerbes d'grain dans le t'ambour d'une machine à battre.

Ch'est justement chein qui d'[a]vait s'arriver.

Ches ouaisseaux-là ne veinnent bain seux pas en Jêrri pour nos apporter des sous, mais au contraithe, font une spécialité de remporter l'argent des siens qui sont bêtes assez de lus touôllyi avec ieux.

Le Caouain vit deux trais messieux d'sa connaissance, qui sont bain trop sages pour se m'suther avec ches aventuriers-là, mais qui préfèthent, un jour de Courses, d'aver une petite spétchulation avec les parieurs, ch'est à-dithe, les ''bookmakers.''

Cheux chin, au mains, sont supposés d'être d'honnêtes gens, et i' n'y a pas d'doute que tchqu'uns de parmi ieux son parfaitèment honorablyes.

Mais i' y a des exceptions.

L'année passée, dès qu'la dernié course avait 'tait couothue et gagnie, les siens qu'avaient mins lus sous sus le ch'va qui gâgni, s'en furent naturellement pour erchever le montant qui lus était deu, mais la plus grand' partie des ''bookies'' se plaignithent qu'i' n'avaient pas l'moyen d'payi, et comme preuve, montrant lus ''bag'' au public pour faithe vaie qu'i' n'y avait rain d'dans.

Et pis ch'tait là qu'i'y en eut du tintamarre!

Nou s'attendait quâsiment à r'vaie une répétition des mêmes tactiques ch'tte année, mais v'là qui n'fut pas justement si piéthe, malgré qu'i'y en eut deustrais qui mantchaieut quand lus clients vinrent présenter lus billets.

Y en avait iun sustout qu'avait san nom en grandes lettres sus s'n enseigne, et qui s'était installé en d'dans du ''paddock'' une position que nou suppose, générallement, être accordée raique à des ''firms'' au-dessus de tout soupçon. I' s'appelait 'Harry Shooter' ch'tis-chin, et n'annonçait autchune adresse.

Eh bain opprès iune des courses, I's'fit un p'tit attroupement alentou d'san ''stand,'' composé de gens touos joyeurs que le ch'va sus tchi qu'ils avaient pathié avait gâgni et s'attendant à un prompt régliément de la part du sieur ''Shooter.''

Mais l'moussieu d'chu nom-là n'était pas là à les r'chever. Evidemment il avait 'té appelé ailleurs pour tchique affaithe urgente.

Et il avait emporté ses sous et les sous du public avec li!

Iun d'ses créanciers, qu'avait ouï pâler qu'i' y a une pliaiche en Angliéterre qui s'appelle ''Shooter's Hill'' s'est imaginé que ch'est p't-être là qu'i d'meuthe et il a envié une lettre à ch'tte adrese-là, mais au moment d'êcrithe, je n'sais pas s'il a oquo ieu une raîponse.

Mais, tout badinage à part, il est temps que l'Jersey Race Club, si ch'est qu'i' veurt prêserver le patronage et le support du public, faiche tchiquechose pour sa protection contre patheille volelie.

Je ouï l'aut'e jour, plusieurs messieux suggéther que l'Comité dev'thait exigi un dépôt d'au mains chinquante louis de chaque ''bookmaker'' comme une garantie de bouanne fouai, li r'touanant, sans doute, ses sous à la fin du ''meeting.''

Je vos donne la suggestion pour chein qu'ou vaut, mais i' m'semblye que l'idée n'est pas du tout mauvaise.

Ou voulez p't-être saver comment que l'Caouain s'en déhalli chu jour-là.

Eh bain, opprés iun ou deux p'tits désappointements, et un p'tit mio d'succès, quand i' vint à caltchuler, i'trouvi qu'il avait oquo trente-siex sous d'bouan, de profit sus la journée, ch'est-à-dire, quand i' r'arrivi en ville.

Et il en connait bain des piéches qui n'peuvent pas en dithe autant!

Caouain
4/8/1923