Alentou d'nos Pâraisses

Ted Syvret êcrivit chutte pièche pouor la Fête Nouormande ch't' année et la présentit sus la strade. N'en v'chîn l'texte et un enr'gistrément:

Ted Syvret wrote this piece for this year's Fête Nouormande and performed it on stage. Here's the text and a recording:

Alentou d'nos Pâraisses

La Trinn'té, lî, à Bouôlé,
Et ma-fé-véthe un mio d'Rôzé;
Saint Martîn, lî, prend l'reste,
Sainte Cath'rinne étout,
Et l'Vièr Châté à Gouôrray.
La Baie Rouoyale dgia -
Aut'fais la Baie du Vièr Châté -
Appartcheint à Grouville aniet.
Lé Ho, L'Rotchi et L'Avathîson
Touos ieux à Saint Cliément.
Saint Saûveux a hardi d'êcoles:
Hautlieu, De La Salle, l'FCJ,
Et l'Collège ès Fil'yes étout.
Saint Hélyi, la Ville, y touche
Atout caûchie, Châté, Fort et Vièr Marchi,
Sans pâler d'toutes les vaituthes à ponsi!
Saint Louothains quâsi sans côte -
Mais ordgilleux d'Hamptonne et bein d'aut'.
Saint Pièrre, lî, lé préchain est gourmand:
I' c'menche tout près d'Bieau Mont -
D'vant qu'Saint Brélade lî dit, "Arrête!
Ch'est à mé Nièr Mont et La Corbiéthe,
Et d'pus, un p'tit but d'la Baie d'Saint Ou!"
Saint Pièrre, dgia, èrveint d'nouvé -
Mais bein vite est oblyigi d'céder à Saint Ouën:
Mathe au Seigneu, L'Êta, Gros Nez et Pliémont,
Touos ieux sus not' quémîn -
D'vant qu'la p'tite Sainte Mathie nos rencontre
Au pid d'la Grève dé Lé.
Not' touônnée d'Pâraisses est presqu' finnie,
Mais... eune minnute! I' n'faut pon oublier
Qu'au Mouothi nou s'apprèche du drein:
Saint Jean, atout belles falaises et la Bouonne Niet.
Douze Pâraisses auve un seul d'si:
D'faithe honneu au p'tit Jèrri.

Ted Syvret