1967: La Nouvelle Année

 La Nouvelle Année

San Antonio, Texas

USA

Lé 30 dézembre, 1967

Moussieu l'Rédacteu,

Né v'chîn la nouvelle année tch'appraiche, et des vièrs comme mé sont tréjous r'connaîssants qué L'Bon Dgieu lus pèrmet d'en r'vaie acouo ieune ! La vie est eune aventuthe si întérêssante qué nou vit tréjous en espéthance. Quand nou-s-est pus près d'huiptante qué d'septante, nou-s-apprécyie d'autant pus la préchaine qué nou-s-a la chance dé vaie !

Ch't' année n'a pon 'té pus heutheuses pour l'Améthique. Y'a ieu du deu dans bein des maisons à cause dé la dgèrre du Viet-Nam, et i' n'pathaît pon y'aver d'fîn en veue. Et j'avons des p'tites dgèrres ichîn et là dans l'pays à cause des bastaudes et d's escarmouches entre l's Améthitchains d'souche Afritchaine et la police. Lé gouvèrnément a passé des louais pour asseûther l'amendement du sort dé la vie des gens d'couleu, et lus donner l'opporteunnité d'lus dêhaler et d'aveindre lé même nivé d'prospéthité joui par lus bliancs fréthes. Malheutheusement, ches louais-là n'ont pon 'couo ieu l'êffet voulu. V'là tchi prend du temps, et comme nouos l'dit l'vièr diton Jèrriais. ''V'là tchi n'fait pon grand êffet qué d'env'yer d'l'ieau à la mé !'', et ch'est à bein prés ch't êffet-là qu'les privilèges tch'il' accordent sont dêjà garantis par eune ''Constitution'' fédérale tchi prêche eune évangile d'êgalité pour touos ses citouoyens ! L'affaithe n'amende pon vite assez pour pliaithe ès gens couleuthés, et les politiciens n'amendement pon l'affaithe quand i' promettent des choses tch'i' n'peuvent pon faithe – pour l'amour d'aver des vouaix à la préchaine élection !

La dgèrre contre la pauvrété en Améthique n'a pon aîdgi ès pauvres, et la crianche dé nouot' Président qu'la Trésorerie à Washington peut produithe assez d'sou pour faithe la dgèrre au Viêt-Nam et aboli la pauvrété en Améthique – et aîdgi à touos les nouvieaux pays d'Afrique et d'Âsie à en faithe autant étout – sans hauchi les taxes ichîn, n'est pon chârée par touos l's aut' Améthitchains ! Et pis – acouo comme nouos l'dit un diton Jèrriais – ''Nou n'peut pon enrichi un publyi !''  Et les Saintes Êcrituthes n'en sont pon liain d'la véthité quand i' nouos disent qué les pauvres es'sont tréjous auve nous !

Eune aut' chose tchi pathaît gêner cèrtains des savants (en affaithes êconomiques) est la crainte qué la dêvaluation d'la livre stèrling par l'Angliétèrre aie l'même êffet sus l'dollar, viyant qu'les deux sé sont tréjous souôt'nus iun et l'autre dans les finnances du monde. J'tais hardi amusé d'ouï au tout c'menchement d'la nouvelle dé dêvaluation qué le ''Scotch Whisky'' couôt'tait mains à acater ichîn dépis qué l'dollar s'en allait valer pus vis-à-vis du louis. Comme ch'n'est pon d'tchi qué j'mé d'mente d'acater. Jé n'sai pon tch'est qu'en est. J'aime mus du lait doux, et j'sai bein tch'i' n'a pon hauchi dreinement. Mais y'a eune chose tch'est bein cèrtaine – ichîn comme en Jèrri – ch'est qué l'conmèrçant n'y pèrdétha pon d'un côté ni d'l'autre ! S'i y'a d'la renchiéthe, ché s'sa l'pouorre dgiâtre tch'acate au d'bit tchi la paietha, l'fèrmyi, l'ouvriyi et vous et mé ! Ch'est l'conmèrçant et l'boutitchi (lé ''middleman'' comme nou dit en Angliais) tchi n'y pèrd janmais. I' s'fait seux d'san coup, li !  

Enfîn, ch'est bein d'tout dithe, mais tch'est qu'nou peut faithe pour changi tout ch'qué nou crait tchi va mal ? Voter pour changi l'parti tchi gouvèrne actuellement quand veindra la préchaine élection ? J'viyais dans la gâzette l'aut' jour qu'un homme avanchait l'opinnion qu'eune ''démocratie'' (à la mode Angliaîche et Améthitchaine pon Russe !) est la pus difficile dé toutes les modes dé gouvèrnément à controller, vivant qu'tout l'monde peut y dithe san p'tit but ! Eh bein, ch'est à touos nous d'êprouver à amender les choses d'eune manniéthe ou d'l'autre dans l'année tchi s'en va naître, et n'oublier pon tch'i' vaut mus vivre en espéthance qué d'créver au m'sespé.

J'pouvons c'menchi par faithe nouos bouannes rêsolutions d'nouvelle année. J'en ai tréjous ieune à consilyi à touos les Jèrriais : Ch'est d'faithe lus mousses pâler l'Jèrriais ! Autrément nouot' bouanne vielle langue s'en îtha à grande pas ! L's années s'en vont naître et ou' s'en va dispathaître si les jannes né r'tcheinnent pon l'privilège et l'honneu d'pouver s'entre souhaiter une bouanne nouvelle année dans la langue dé lus anchêtres !    

Quant à mé j'vouos souhaite tout bonheu, prospéthité et bouanne santé, Moussieu l'Rédacteu, en mil neu chent souoxante-huit et la même chose à touos vos lecteurs !

GEORGE D'LA FORGE