Dans la gâzette…
Fallbrook, California,
U.S.A.
Lé 13 dé mar, 1976
Moussieu l'Rédacteu,
La chose tchi m'a frappé en ouvrant la gâzette du 15 dé janvyi, tchi veint d'arriver ichîn, est qué l'Juge Bailhache est dé m'n avis qué l's individus tchi cachent des motos quand il' en ont à bord dév'thaient et peunnis pus sévéthement tch'i' n'l'ont 'té dans l'pâssé. Y'a longtemps qu' j'ai pensé ch'là étout et qu' j'en ai fait mention dans mes lettres, mais sans doute lé temps arrive qué nou n'aime pon répéter la mème turlutte s'maine auprès s'maine. Vouot' articl'ye d'fond au sujet, Moussieu l'Rédacteu, est mangnifique, et la lettre du Docteu Pilkington, tchi nouos donne un accompte du procédé juridique en Suède contre les gens tchi cachent lus motos quand i' sont en êtat d'ivrêsse, vaut la peine dé liéthe étout.
J'vai qu' les travailleurs dans les garages s'en vont êt' payis neu louis la s'maine dé pus, et qu' les mécaniciens tchi sont au-faits peuvent gangni jusqu'à chinquante louis la s'maine. Eh bein, nou sait bein qu' ch'est du sal travas et qu' v'la tchi méthite des bouans gages, mais vîngt-deux pour chent m'pathaît êt' un accraît tch'est hardi haut, et ch'est chu hauchissement d'gages continnuel tchi fait accraitre lé couôtage de la vie pour tout l'monde. Sans doute, les sŷndicats vouos dithont l'contraithe, mais i' n'est pon bésoin d'êt' professeu en matchièthe mathématique pour vaie qu' les gages sont mathiés au couôtage du produit d'l'oeuvre et d'marchandise et qu' ch'est l'acateux tch'en paie la renchiéthe. Et dépis qué l'travailleux li-mème a à payi la renchiéthe tch'est l'rêsultat d'ses pus hauts gages, i' r'démande pour eune aut' augmentâtion d'gages et l'affaithe né finnit janmais.
A m'n idée, les jannes malfaîteurs tchi volîdrent lé baté au Sieur Gay d'Gouorray n'ont pas 'té peunnis assez par la Cour Rouoyale quand nou pense qué l'baté éthait peu êt' naufragi sus les rotchièrs lé tou d'la côte, sans pâler du vol dé motos et lus mauvaîtchi en général. Ch'est la badgette tch'i' faut pour civilîser des mauvais sujets, et ch'est, à m'n idée, la seule peunnition tchi pouôrrait d's'encouothagi les malfaîteurs - ouaithe tchi s'pouôrrait qu' l'idée d'Moussieu Ph'lippe de Veulle dé lus hâler l'drouait d'cachi un moto vaudrait la peine d'êprouver.
J'sai bein tchi'i' y'a un tas d'monde tchi sont si raffinnés tchi'i' sont contre l'idée d'autcheune peunnition corporelle, et qué m's idées les choquent. J'm'èrsouveins mème qu'eune fais j'chotchi eune danme quand j'li dis qué j'tais en faveur de la peine dé mort pour meurtre. J'y sis acouo. Lé nombre d'meutres ichin en Améthique touos les jours est âffreux, et j'sis seux qu'la peine dé mort comme peunnition en empech'chait la maintchi.
Ch'tait intérêssant d'liéthe l'articl'ye dé Chris Bright au sujet d'la manniéthe qué nou dév'thait r'chéver les missionnaithes des Témoins d'Jehovah. Ch'est vrai tch'i' sont eune embête quand i' continnuent à êprouver à vouos convèrti à lus réligion, mais j'ai tréjous admithé l'êffort tch'il' y mettent. Si nouos minnistres travaillaient la maintchi aussi dû comme ieux pour faithe les gens aller à l'églyise à la pliaiche d'aller dans l's aubèrges, l's églyises es'saient plieines au Dînmanche.
Je n'prétends pon saver lé vrai r'miède pour sé dêfaithe des visites des Témoins d'Jehovah mais j'en connais ieune tchi s'sait p't-êt' seûthe dé rêussi. Ché s'sait d'êtudier la Bib'lye au point qué nou veindrait à la connaître aussi bein - ou mus - qu'ieux. Dans tel cas ché s'sait aîsi d'lus montrer sus tch'il accompte qué nou n'peut accorder à lus întèrprétâtion des Saintes Êcrituthes.
Les Mormons sont un aut' exempl'ye dé la rêussite d'eune pèrsistance par lus missionnaithes tch'a mênagi à êtablyi lus tchulte dans bein des pays. Les dreins tchi vîndrent mé vaie au Ménage ès Feuvres fûdrent surprîns quand j'lus dis qué j'connaîssais l'originne dé lus réligion et qu' j'avais vîsité lus quartchi-général à Salt Lake City dans l'Êtat dé Utah en Améthique, et marchi l'tou d'lus templ'ye et entré dans l'tabèrnacl'ye et dans l'templ'ye, devant tch'i' fûsse consacré, pas bein liain d'Londres. J'eûnmes eune agriabl'ye vîsite et i' n'êprouvîdrent pon à m'convèrti.
Félicitâtions à Moussieu F. de L. Bois pour sa mangnifique articl'ye dans la gâzette au sujet d'la dispathition d'l'ûsage obligatouaithe dé la langue Française comme langue officielle dans L's Êtats. Ch'est intérêssant d'vaie qué ch'tait dêjà rare en 1930 dé ouï un cas pliaidgi entchiéthement en Français dans la Cour d'Assise.
Malheutheusement, nouot' vielle langue Jèrriaise est en train dé dispathaître étout, et ma seule consolâtion, quand j'pense à telle tragédie, est qué jé s'sai eune vielle poutchie d'os quand oulle arrivétha, et qué j'n'en séthai rein!
George d'La Forge
No comments:
Post a Comment