Ottawa

Eune lettre du Bouanhomme George dé 1975:

Ottawa

Ottawa, Ontario,
Cannada.
Lé preunmyi d'novembre, 1975.

Moussieu l'Rédacteu,

J'sis acouo à Ottawa, au Cannada, où'est qu'j'êcrivis ma lettre du 25 d'octobre. Mais criy'-ous qué j'pus vouos l'env'yer? Nannîn, y'a ieune des ches fichues grèves (d's empliyés d'la Poste) tchi sont dévnues "l'ordre du jour" par les sŷndicats d'travailleurs dé nouot' temps et tch'înc'modent lé publyi, tch'en a pliein des braies, d'toutes ches grèves. Ch'est en tchi i faut qu'j'arrête jusqu'à ma r'tou ès Êtats-Unis pour mett' ches lettres à la poste pour Jèrri.

Eune aut' chose qué la grève des empliyés d'la Poste m'a empêchi d'faithe est d'prépather et poster mes cartes d'Noué pour Jèrri et l'êtrangi généralement. A ch't' êpoque touos l's ans jé l's env'yaient d'ichîn, et il' arrivaient à destinnation en bouan temps pour Noué, mais pon mouoyen ch't année, à cause dé la grève, d'acater un tîmbre sans pâler d'eune chentaine tch'i' m'fallait pour mes cartes pour l'êtrangi. enfîn, v'la tchi n'veurt pon dithe qué jé n'pens'sai pon à touos m's anmîns à Noué. À la pliaiche des cartes j'm'en vais mettre eune annonce dans l'"Evening Post" et j'espéthe qué m's anmîns la vèrront!

L'Ottawa d'au jour d'aniet n'est pon l'Ottawa qué j'trouvîs en arrivant d'dans en novembre d'mil neu chent dgiex-neuf man fréthe Fraînque et mé. Ch'tait à Halifax, en Nouvelle Ecosse, qué j'avions mîns l'pid à tèrre auprès un rude pâssage à bord du grand navithe Empress of France de la Compangnie Cannadgienne Pacifique. Dé Halifax j'avions viagi par "train" à Ottawa et j'èrsouveins qu'j'avions pâssé eune niet à bord du train. D'à bord du baté en appréchant d'la côte du Cannada, j'avions r'mèrtchi qué l'pays 'tait couvèrt dé né, et en arrivant à tèrre, tch'il y faisait eune fraid d'tchian. Mais j'tions frais v'nus d'la dgèrre (1914-1918) en France et en Belgique et j'tions bein enduerchis au mauvais temps, et la fraid n'nouos faisait pon d'peux. Et pis y'avait l'esprit d'aventuthe tch'est dans l'sang des vrais Jèrriais et tchi nouos faisait aspither à la nouvieauté d'la vie dans un pays tchi nouos avait tréjous intérêssi viyant qu'nouos pathents s'y étaient êtablyis dgiex-huit ans d'vant.

En arrivant à Ottawa j'fus frappé par sa bieauté. Sans doute, tout 'té couvèrt dé né. Comme mousses en Jèrri, lé p'tit d'né qu'nou-s-avait veu dans l'couothant d's années avait assez d'mouoillêtuthe pour qué nou pûsse en faithe des balles pour s'entr'astitchi atout, mais ichîn oulle 'tait si secque et si finne qu'ou vouos pâssait l'travèrs des dés comme du sablion viyant qu'oulle 'tait g'lée.

I' n'y avait pon fort dé motos par les c'mîns dans chu temps-là, et les rues 'taient plieines dé traînés tchi glissaient sus la glace et la né patchie, et tch'étaient halés par des bieaux grands j'vaux tch'avaient des cliochettes sus lus graies et qu'nou ouïyait sonner ligiéthement comme si ch'tait l'murmuthe d'eune mûsique au liain. Y'avait des châtieaux et des palais bâtis atout des carrieaux d'glace dé taille dans les pars. Il' avaient des veues couleuthés en d'dans et nou-s-en viyait la lueu l'travèrs des muthâles dé glace, et v'là tchi pathaîssait comme si ch'tait des vèrrinnes dé cathédrales. Tout à l'entou des coupl'yes patinnaient sus la glace. I' m'sembliait êt' dans un aut' monde. Toute la populâtion d'la ville pathaîssait êt' sus patîns, mais quand j'y êprouvis mé-mème, à patinner, j'glissais sus man driéthe pus souvent qué jé n'restais d'but sus mes patîns!

Sus la hauteu, nou viyait la belle tour carrée des Maîsons d'Parlément tchi pointait au ciel comme un sŷmbole d'autorité. À ch't heu, traînés et j'vaux ont dispathu d'la scène, et la tour des Maîsons d'Parlément n'est dgéthe lé haut monument par excellence tchi nouos frappe la veue, car les gratte-ciels ont fait lus appathence partout et la ville est si modèrnîsée et êtendue dans les campangnes à l'entou qué s'n êtente dé mil neu chent dgiex-neuf, quand j'la vis pour la preunmié fais, a grandit tellement qu'ou n'lî r'sembl'ye pus. Comme en est l'cas en Jèrri, un tas d'ses p'tites boutiques dispathaîssent à grands pas et sont rempliaichies par des grands babaines dé bâtisses carrés à un tas d'êtages tchi n'ont, à m'n idée, autcheune bieauté point d'veue d'architectuthe. Mais Ottawa, capitale du Cannada, un pays tch'a san nom gravé dans les pensées des vièrs Jèrriais viyant qu' "La Côte" en est partie, est acouo ieune des pus belles villes du monde!

George d'La Forge