Eune poésie liue pouor la Séthée ès Chorchièrs:
A poem read for Halloween:
Halloween
Tchiques brits mystéthieurs dans la nièrcheu,
Les murmuthes dé tchique criatuthe malinne
Tchi s'muche driéthe chutte muthâle. Véthe, ach'teu
Ch'est la fête înfèrnale dé Halloween.
Viy'-ous lé balle-à-leunettes dans lé clios?
Criy'ous qué ch'est les veues dé tchique machinne?
Ou les grands ronds ièrs à fliambes du tchico
Tch'est à rôder nos c'mîns à Halloween?
Tch'est qu'ch'est? Ah, j'ouais tchiquechose à mes côtés!
La chuchot'tie des êpitafl'yes... un sîngne
Dé mort... un message tchi nos veint d'l'enfé
Pouor prédithe les horreurs dé Halloween.
Les ombres tchi bouogent, les branques tchi grînchent et happent
Nos terrifient et choquent jusqu'ès réchinnes.
Lé ma est à banon - n'y'a pon d'êcappe:
Lé monde ès morts èrvit à Halloween.
La leune câresse lé corps dg'ieune chorchiéthe
Tchi danse enchorchélée souos l's êtailes finnes.
Ou prononce des patholes si bâsses, si néthes
Qué janmais nou n'les pâle qu'à Halloween.
Bârrez vos portes! Freunmez bein toutes vos f'nêt's!
Les forches du ma sont libéthées! L'Îndîngne
Et touos les dgiâbliotîns dé chutte niet fêtent
Lus grand înfâme sabbat dé Halloween.
Geraint Jennings
No comments:
Post a Comment