At today's vin d'honneur at Saint Helier's Parish Hall for the French national day, a bust of Victor Hugo was unveiled. So here's a poetic reminder in Jèrriais of another Hugo statue unveiling from (almost) 100 years ago:
Né v'la dêjà pus d'vingt-huit ans
Que tu'es hors
De l'autr' bord! -
Ch'est de vrai, bein longtemps
A s'rapp'ler d'un mort!
La majorité des persounnes
Sont oublièes
Sitôt passèes!
Dès que l'Nouvel An sounne
I' sont liain d'nos pensèes!
Les anciens vont? I' r'veint d'savièrs!
L'nouvieau v'nu
Est erchu
Par l'un et l'autre à bras ouvèrts,
Dès qu'i fait san début.
Ah! j'avons tous courte mémoéthe
Dans bein des choses,
Sans qu'i' y'ait d'causes.
Je négligeons l'histoéthe
Et j'oublions les roses!
La rose hélas! a des pitchets
Malgrè s'n'odeur.
Et ch'est malheur
S'nou veurt, sans r'garder à ses daigts,
Tchill'yi la flieur!
Ou' s'en va vite ètou, la rose!
Annièt tchill'yie,
D'main efilièll'yie!
Et souvent même, à peine êcliose
Oulle est trill'yie!
La couronne en louothi, pourtant,
Qu'les gens mettaient
Tréjous aut'fais
Sus l'front des grands parmi les grands,
Duthait, malgrè l's'ans qui passaient!
La grandeur est flieur immortelle. -
La mort l'êvite!
L'histoéthe êcrite
Nos fait respecter chose itelle
Que l'vrai méthite.
Et d'même, enfin, Hugo, j'te vai
Grand orateur,
Poète, auteur,
Par tan talent tréjous bain drait
Malgrè tan long malheur!
Je sai' trop bein, hélas! qu'ma rime
N'peut pon prétendre
A pouver t'rendre
L'sentiment qu'i' faut qu'nou t'exprime
En langage aussi fort que tendre!
Mais, occouo', quand j'pense à tes vers,
Qui chantaient tant,
Qu'en touos les temps
Nou les lièt par tout l'univers,
J'te fais l'salut du p'tit au grand!
Hugo! Tu r'vis dans ta statue!
Je t'vai marchant! Ta tête est nue!
Mais de d'sus l'bieau Parc de Candie,
Tch'est don' qu'tu r'garde? - Ah! ta patrie!
Elie
1914
No comments:
Post a Comment