Sunday 23 December 2012

L'Annonchiâtion s'lon Luc - The annunciation



L'Êvangile sélon Saint Luc, chapitre iun, vèrsets 26-38

Ah ça, ch'tait dans l'siexième mais qué l'Bouôn Dgieu env'yit l'ange Gabriel dans eune ville dé Galilée, app'lée Nazareth, à eune vièrge tch'était fianchie à un homme nommé Joseph, dé la fanmil'ye dé Dâvi ; et chutte vièrge avait nom Mathie.

Et l'ange entrit où'est qu' Mathie s'trouvait et lî dit: J'té salue, car lé Seigneur est auve té pa'ce qué tu'es favorisée et tu'es bénie.

Et ayant veu l'ange, ou fut troubliée en lyi-même par ses patholes et ou sé d'mandit tch'est qu' chutte salutâtion voulait dithe.

Pis l'ange lî dît: Mathie, n'ai pon d'peux, car tu'as trouvé grâce dévant l'Bouôn Dgieu, Et tu d'veindras encheinte et tu'éthas un p'tit êfant, à tchi qu' tu donn'nas l'nom dé JÉSÛ. I' s'sa fanmeux et s'sa app'lé Fis du Tout-Grand, et l'Bouôn Dgieu li donn'na lé trône dé Dâvi s'n anchêtre. I' régnétha à tout janmais sus touos les d'scendants d'Jâcob, et i' n'y'étha pon d'fîn à san rêgne.

Mais Mathie dit à l'ange: Comme tchi qu'd'ité pouôrra s'arriver, dépis qu' j'n'ai pon hanté d'homme?

Et l'ange lî rêponnit: Lé Saint-Esprit f'tha en sorte, et la vèrtu du Tout-Grand té couvrétha dé s'n ombre ; ch'est en tchi étout l'êfant saint tchi s'sa né d'té es'sa app'lé lé Fis du Bouôn Dgieu. Et né v'là qu' ta couôthinne Lîsabé s'attend étout d'un fis dans sa vieillèche ; et oulle est avanchie dé siex mais, ouaithe qu'ou fûsse considéthée stérile. Car rein né s'sa împôssibl'ye au Bouôn Dgieu.

Et Mathie dit: Jé sis la sèrvante du Seigneur ; qué chein qu' tu m'as dit s'faiche! Et là-d'ssus, l'ange s'en r'fut.

No comments: