George d'La Forge racontit des mémouaithes d'la Séthée d'Guy Fawkes quand i' 'tait mousse:Memories of Guy Fawkes night in Jersey time past:
'Guy Fawkes' lé temps passé
Lé Ménage ès Feuvres,
Lé 15 dé septembre, 1965.
Moussieu l'Rédacteu,
A ch't heu qué j'sis beintôt prêt à m'en r'aller en Améthique, v'là tch'i' m'fait penser qué j'm'en vais mantchi la séthée d' "Guy Fawkes" ichîn à St. Ouën lé chînq dé novembre.
I' n'y avait pon grand' chose à faithe au sé pour sé passer l'temps qand j'tais mousse y'a septante ans. J'm'èrsouveins qué ch'tait toute eune affaithe quand v'nait l'temps d'prépather pour la séthée. Nou disait "Guy Fawkes" comme en Angliais sénon qué nou prononçait "Fax" pour "Fawkes". I' faisaient eune mangnifique fouée sus Les Landes et tout l'monde y contribuaient chein tch'i' pouvaient en matériel pour brûler et en sou pour acater des feux d'artifice pour l'occasion.
Ès Landes, j'avions la chance d'aver eune musique tchi 'tait connue comme "La Band' dé Guy Fawkes". Ch'tait l'mot Angliais "Band" qué nou faisait sèrvi ouaithe qué nou n'pâlait pon d'Angliais. Pour nous, lé mot "musique" voulait pûtôt dithe un înstrument d'musique. Quand nou v'nait grands assez pour aller dans l'chant à l'églyise, nou-s apprannait qué ch'tait étout des notes tch'étaient montrées sus des barres dé chîn' p'tites lîngnes pour nouos dithe lé son et la duthée des notes tchi faîsaient l'air du chant (....)
Auprès tchiques séthées d'pratique, la musique 'tait prête à aller collecter des sou par les maiethons pour acater les feux d'artifice. En arrivant à chaque maiethon, lé Sieur Stuber disait "J'sommes à collecter pour Guy Fax!"
"Eh bein," disait l'maître d'la maiethon. "All'ous nouos jouer tchiquechose?"
La rêponse 'tait un sîngne au jouex du gros tambour, et l' "Bomme! Bomme! Bomme!" du tambour n'avait qué d'dêfoncer les f'nêtres et né v'là les fliûtes à jouer l'air dé: "Malbroc s'en va (t)en dgèrre, Mironton, Mironton, Mirotaine!" Ch'tait ch't air-là tch'était l'mus connu et l'pus populaithe! (...)
Eune fais il' eûdrent un carnaval dévant alleunmer la fouée. Les fernièrs dé là l'tou arrangîdrent tchiquechose dans lus vainnes et ch'fut un grand spectacl'ye pour nous mousses. Y'en avait eune tch'avait du meubl'ye arrangi dans la vainne comme dans l'parleux, et des femmes à couôtre ou à ouvrer. Eune aut' scène 'tait eune chanbre atout un homme et sa bouonnefemme au liet dans eune couochette atout les ridgieaux ouvèrts pour qué nou piêsse les vaie. (...)
George d'La Forge
No comments:
Post a Comment