Here's a version in modernised spelling of Sir Robert Pipon Marett's poem about a bachelor's second thoughts:
Lé Vièr Garçon
Qu'i' sont heutheurs, les vièrs garçons.
I' n'ont ni êfants ni maîsons,
Ni femmes à lus badrer la tête.
Jé di pouor mé, qu'i' faut êt' bête,
Quand nou-s'est libre et sans souci,
Dé prendre eune femme pouor vos pliaidgi.
Jé n'lé f'thai pon! - nânnîn! - nânnîn!
Quand nou-s'est bein, i' faut s'y t'nîn!
Nan nan! nan nan! jé n'lé f'thai pon!
Jé restéthai bouôn vièr garçon!
Quand nou-s'est comme jé sis achteu,
Assis à s'n aise auprès du feu,
Feunmant sa pipe à san tout seu:
Dites-mé! n'y fait-i' pon miyeu,
Qué d'aver mâtée endrait sé,
Eune femme, ofûche à vos gronner!
Et d's êfants, par dessus l'marchi
A vos achouêmi dé lus brit!
Oh! oui, oui, oui: qu'nou n'm'en pâle pon,
Jé sis et séthai vièr garçon!
Ch'n'est pas, quand tchiquefais nou s'ennyie.
Eune femme vos tcheindrait compangnie;
Et si l'ma veint vos empouongni,
I' n'y a qu'les femmes pour vos souongni.
Et tchi saithait ioù en trouver
Eune belle et bouonne, tchi vos aim'thait,
Nou-s'y pens'sait tchique pétit: - mais,
Nou peut bein s'y brûler les dés!
Lé mus ch'est dé n's'en mêler pon!
Et d'rester trantchil'ye vièr garçon!
Car bein des femmes sont coumme not' catte! -
Tout s'pâsse dé charme tant qu'nou la fliatte,
Ou veint sé frotter contre vous,
En miaûnant, et fait patte dé v'lous,
Qué tout d'abord en viyant ch'la,
Nou dithait qu'ou n'peut faithe dé ma,
Mais qu'nou la preinge à la r'bours pé,
Ou sort ses grîns pour vos grînmer.
Lé pus seux, ch'est dé n's'y fier pon!
Pour mé jé reste vièr garçon!
Ch'est vrai qu'i n'sont pon toutes coumme ch'la ;
J'en connais ieune! - Ah! pouor chette-là!
Qu'oulle est don belle! - ch'est coumme eune flieur! -
Et pis oulle est d'si bouonne heunmeu,
Ou n'dit janmais un mot d'travèrs!
Auve ch'la oulle a d'si nobl'yes ièrs!
Tchiquefais quand ou vos r'garde auveu,
Dé vrai ch'la vos êcauffe lé tchoeu.
I' y'a d's înstants, i' n's'en faut pon
Fort qué jé n'cêsse d'êt' vièr garçon!
Par sus tout oulle a eune vouaix
Pus douoche qué myi! qué j'l'êcout'tais
Pâler, ofûche deux heuthes dé temps!
Eune bouoche si fraîche, et pis tchi dents!
Et qu'oulle est jolie quand ou rit!
Si chutte fil'ye-là sait picangni,
Oulle est capabl'ye dé mauvaîtchi.
Ch'est eune hypocrite, ma fé!
Pouor ma part, mé, jé n'lé crai pon!
Tout d'même ch'est mus d'êt' vièr garçon!
S'i' n'fallait qu'prendre eune femme au mains!
Mais ch'est l's avièrs! V'là chein qué j'crains!
J'vais siez not' fréthe dé temps en temps.
Ch'est là qué j'vai chein qu'ch'est qu'd'êfants!
Il en a eune racachie!
Quand i' sont touos ensembl'ye, i' crient
Et font lus sabbat qué dé vrai,
Nou n'en a qué d'en raffoler!
Quand j'vai d'ité, jé m'di bon! bon!
Ah! qué j'sis bein d'êt' vièr garçon!
Acouo s'i' restaient tréjous p'tits!
Nou-s'aime assez à ouï lus d'vis,
Et ch'est fort amûthant qué d'vaie
Les drôles dé triques qu'i' font parfais,
Mais dès qu'un co' il' ont grandi,
Nou n'peut pus, danme! s'en arrangi;
Il' us'saient jusqu'au fé des reues,
Et faut êt' tréjous souotre ieux.
I' vaut bein mus n'en aver pon!
Et vivre en paix coumme vièr garçon!
Qu'i' n'éthait qu'des garçons acouo!
Nou n's'en apèrchevthait pon trop,
Car dîthons qu'i' faichent les meutîns,
Et s'mettent à galoper les c'mîns,
Tout d'siette nou les paque à Tèrreneuve.
Là i' dêhalent du mus qu'i' peuvent.
Et gângnent lus vies, et à lus r'tou
I' vos rapportent acouo tchiques sou.
Auve tout ch'là, nou n'mé ditha pon
Ch'est pus d'profit d'êt' vièr garçon!
Mais ch'est les fil'yes! - ches jannes drinnettes,
I' lus faut tréjous tant d'atouettes!
I' veinnent sans cêsse vos tormenter,
Qué nou-s'en est tout hors de sé
"Papa par-chîn - papa par-là!
"Donne-mé chennechîn - donne-mé chenna!
"I' m'faut eune robe! - i' m'faut des gants!"
Ou bein "j'ai bésouain dé ribans!"
Pouor mé la tête m'y tcheindrait pon!
J'aime mus acouo êt' vièr garçon!
Dé pus chein qu'i' y'a d'piéthe acouo
Nou craint tréjous qu'i' n'faichent tchique dro! -
Il est bein vrai, chein qu'nou peut faithe
Dès qu'i' sont d'âge à s'en dêfaithe
Ch'est d'les mathier hors dé la vaie
Sans perd' dé temps, et pis auprès,
Nou-s'en est tchitte dé tout souci,
Ch'est à lus hommes à en souongni!
Oui - mais - si nou n'les mathie pon!
I' vaut mus rester vièr garçon!
Les gens mathiés sont bein à pliaindre!
Bon! j'ai laîssi man feu s'êteindre.
Jé n'gângne rein dé l'êtibotchi.
Lé mus ch'est d's'en aller s'couochi -
Ch'est trop bouonne heuthe - pourtant - jé crai
Qu'au lieu d'ch'la j'prendrai man chapé,
Et îthai siez l'bouonhomme Elie,
Vaie s'i' sont acouo touos en vie!
Jé m'ennyie, pouor n'en menti pon!
V'là l'piéthe, quand nou-s'est vièr garçon!
I' faut y'aller; - j'vèrrai Nancy
Et j'éthai un p'tit d'fanne auve lyi!
Dé vrai jé songe trop à chutte fil'ye!
Aussîn ch'est qu'oulle est si gentil'ye!
Oulle a des ièrs! - Mais si j'y'allais
P't-êt' bein qu'les gens en d'vis'saient.
- Jé n'îthai pon! - Dgiântre, qu'i' fait fraid!
- Nou trembl'ye ichîn! - Eh bein j'îthai!
Et auprès tout, ch'la n'm'empêche pon
Si j'veurs, dé rester vièr garçon!
No comments:
Post a Comment