Lé Bailli et les nus
'Mon pouâr vièr parchounnyi', s'fit l'Philip Desclios, quand i' ragagni m'vaie l'aut' sé, 'tchille êpreuve qué tu veinnes dé subi! et touas d'nous étout, car djà qu'ta femme én 'tait pas Jèriaise et n'pâlait pas l'jèrriais, ou aimait tellement Jèrri, et j'disounts tous que ch'est ieunne de nous que v'nouns d'perdre. Mais lé v'là, ch'est la la vie: la vie mène à la mort, et nou'n'peut rein yfaithe.
'Mais té, mon vi, t'es acquo avec nous, et pour cheunna j'soummes ércounnaissants, djà qué j'crai bein que y'en a tchiqueseuns qui n'sount pas si countents, car i'n'aiment pas trop tes articlyes dans la gazette. Mais ne t'en r'fais pas: countinue coumme tu veinnes de faithe, et à ses-sé, pour tâchi pour le moment d'ôter tes pensées du sujet qui l's'afflige j'voudrais té d'mander chein qu't'en pense d'la décision du Bailli de n'pas permettre chutte saloprie d'gens nus, ou à peu près, dé s'mountrer au publyi ichein en Jèrri'.
'Mon Ph'lip,' j'lis rêpounni, je n'pouarrais pas t'en faithe eune buoan français, dé ch't'histouaithe-là, car ches dreinnes semaines j'ai ieu d'autres choses sus l'chérvet, et j'n'ai pas suivi l's'affaithes coumme qué j'fais d'amors. Mais, sans en saver trop, i'm'semblye qué l'Bailli avait hardi raisoun dé n'pas permett' chutte saleté-là, et si l'coummité qu'a soign d'ches affaithes-là n'est pas trop countent pa'ce qu'a chein qu'i' disent, le Bailli n'lus avait pas d'mandé lus avis, eh bein, mé, j'dis: 'Mercie, Moussieu l'Bailli, ous avez fait chein qu'touas les buoans Jèrriais voulaient vos vaie faithe, car j'réspectouns not' île et j'voulons la sauvegarder countre chutte crapule en train d'la dêtruithe. Je n'sai pas Mon Ph'lip si tu l'as érmertchi, mais à part de ieune ou deux toutes les lettres qu'ount paru dans la gazete countre él Bailli futent êcrites par des gens avec des noums angliais. Ch'n'est pas à dithe qu'i sount tous nécessaithement êtrangiers - y'en a p'têt' parmi ieux tchiqueseuns qui sount nés en Jèrri, mais v'là tchi n'les fait pas vrais Jèrriais. Et ch'est ches gens là qu'ount l'toupet et l'affrount d'insulter not' Bailli. Mé, j'lus dithais d'aller s'balader. Eh bein, pour t'en dithe lé vrai, jé m'servirais d'eune expressioun pus vive que de s' 'balader', mais, mon Ph'lip, je n'voudrais pas t'mett' mal à t'n aise'.
Le Ph'lip se mint à rithe: 'J'les counnais déjà bein, tes bouannes expressiouns jèrriaises! Si tu 'tais érvenu en Jèrri tchiques ans pus tôt et qu't' avais prîns pour les Etâts, y'ethait ieu du feu d'satchi!'.
Et en effet, bouannes gens, si j'avais réussi à êt' êlu, j'sis bein seux que bein d'mes collègues dans l's'Etâts m'éthaient trouvé hardi difficile.
Le Ph'lip sé l'vit pour s'en aller. 'Eh bein, mon vièr amin', i's'fit, 'j'éspethe qu'a ses sé, au mains pour tchiques minutes, j't'ai fait penser à d'aut' chose qué ton malheur. J'sai bein qu'chu malheur s'ra tréjous avec té, mais tu sai bein qu'touas les buoans Jèrriais et buoannes Jèrriaises sount avec té à t'souast'ner'.
Coumme il a raisoun! Quand nou s'trouve dans l'malheur et qu'nou sé d'mande si la vie vaut la peine de vivre, ch'est touas ches bouans amîns qui nos dounnent couarage.
Countes d'eun' Èrvénu
JEP 13/3/1992
No comments:
Post a Comment