1991: En Thailande

 En Thailande

 

'Je n'sai pas trop bein coumment t'astitchi chounchein,' sé fit l'Ph'lip Desclios qui r'vénait countent d'vaie qué ses patates n'avaient pas trop souffert du vent et d'la g'lèe d'l'aut' jour, 'mais, vai-tu, les gens tchi n'té counnaissent qué par lièthe tes articlyes dans la Post et d't'entendre dé temps en temps lé dînmanche matin i' sé d'mandent si t'es vraiment si roupillieux et si court dé pé coumme tu fais la meinne, et quand j'lus dis qu'tu n'est pas dutout d'même, et qu't'aimes mus raconter dé tes sornettes et d'tes balivèrnes qué d'nos faithe des sermouns coumme s'tu 'tais en tchaise i rêpounnent: 'Eh bein, pourtchi qué d'temps en temps i' nos racounte pas d'ses balivèrnes, car s'nous entend qu'des sérmouns nou' finit pas s'en enn'yer.'

 

'Mon Ph'lip.' j'lis dit, 'si j'tâchais d'vos racounter tout mes bêtises nou'n'en finithait pas. Mais j'm'en vais t'en racounter ieune aniet.

 

'En Thailande, l'Ambassade à Bangkok ch'est eun vrai palais. Mais quand j'y fus noummé Ambassadeur la Résidence faisait eune impressioun assez âpre: ch'tait eun raid' bieau bâtisse, mais d'vant qu'j'en pliantîsse n'y'avait ni bouais ni arbustres en d'vant pour li dounner du caractèthe, et l'êffet mé sembliait soumbre.

 

'Et quand j'entrîmes ès grandes hèches dé l'av'nue et j'eus inspecté la garde cérémoniale mountée par mes Gurkhas j'érmounte dans mon Daimler et, r'gardant la Résidence dévant mé j'dis à m'n'assistant qui 'tait v'nu à l'aéroport m'èrchéver: "Eh bein, mé v'chein à la fin à l'asile, ouesqu'j'éthais deu être ches quarante ans."

 

'Mon pouarre bachouard d'assistant, qui 'tait Ecossais et prenait tout au sérieux, né m'rêponnit pas mais i' m'égardit hardi d'travèrs et eun coup qu'i' m'eut coundit à la maisoun et introduit les domestiques lé v'là qui s'en va toute hâte à l'office écrithe eune lettre privée au Chef du Foreign Office lé dgèrni qué l'nouviau Ambassadeur qui v'nait d'arriver 'tait cratchi, qu'i' pensait qué l'Ambassade ch'tait eune asile, et disait même qu'il éthait deu y'être enfreumé ches quarante ans.'

 

'Dgâtre,' s'fit Ph'lip, 'mais chutte lettre-là dut t'faithe du mêchèt! Et coumment qu'i vîntent à laîssi eun lunatic coumme té là pour trais ans coumme Ambassadeu'?'

 

'Ch'est viyant,' j'lis dis, 'qué l'Foreign Office a hardi d'éxpéthience, et qu'les gas en chèrge savent bein qué pour eun diplomate ch'est eun grand avantage d'être la maintchi cratchi. Et d'même lé Chef dé l'Office, qui 'tait ieun d'mes vièrs amîns, m'êcrivit à peu près coumme cheunchein: 'Mes félicitatiouns d'aver si bein c'menchi ta missioun. Tu n'as pas perdu d'temps à dounner preuve qué t'as chein tchi faut'.'

 

Lé Ph'lip qui 'tait adôssé countre l'fossé sé mint à rithe: 'N'en v'là eune bounn'e, dé tes balivèrnes! Racounte nous en eune autre!'

 

'Et bein,' j'lis dis, 'dans l'gardîn d'l'Ambassade à Bangkok y'a eune statue à la Reine Victoria. Tchique bordée j't'en racountrai l'histouaithe.'

 

Lé Vier Trin'tais

JEP 22/5/1991