Les r'vénants du Mangni d'La Trinn'té - Trinity Manor ghost stories

Un houmme racontit l'histouaithe qu'il avait ouï d'san péthe: San péthe 'tait à marchi un jour en pâssant l'us du Vouêt d'l'av'nue du Mangni d'La Trinn'té par la Rue dé Brabant quand il êpyit un grand c'valyi Français à s'appréchi d'li avaû la rue. Chu c'valyi 'tait habilyi en unniforme auve un long sâbre dans san fouôrré. I' vînt à la hèche du Mangni tchi 'tait à l'entrée d'l'av'nue, l'ouvrit et la r'freunmit et s'arroutit avaû l'av'nue vèrs l'Mangni.

Eune vielle danme racontit qu'oulle avait veu des blianches êmânues jutchies ès copieaux des hauts bouais au pouorportant d'l'av'nue.

Un houmme racontit qu'il avait veu pus qu'eune fais eune dgaîngue dé nonnes en blianc tch'appathaîssaient dans l'av'nue d'l'Êst du Mangni.

Nou pâlait étout d'eune danme habilyie à la manniéthe du dgiêx-huitchième siècl'ye tchi soulait marchi dans l'gardîn.

Épis l'Mangni même 'tait hanté par un nièr tchian tchi marchait dans la maîson en pâssant l'travèrs d'us freunmés. Tchiqu's'un d's ouvrièrs tchi 'taient empliyés sus l'travas d'la restaurâtion du Mangni auprès 1909 avaient, s'lon chein qu'nou dit, veu chu tchian. Un oncl'ye au Mâjeur John Riley (Seigneu, 1958-1994) lî dit qu'il avait veu l'tchian étout.

Duthant la restaurâtion, la ménuîs'sie 'tait l'affaithe à un cèrtain Mess Parsons, un houmme raisonnabl'ye. I' racontit qu'i' y'avait eune armouaithe dans l'mangni qu'nou n'pouvait janmais garder freunmée: s'nou la freunmait la niet, l'armouaithe 'tait tréjous ouèrte lé matîn. Bein seu, y'avait l'explyicâtion qu'un changement d'tempéthatuthe duthant la niet r'tréch'chait ou vèrquéthait l'bouais du vitchet, mais Mess Parsons n'tait pon pèrsuadé par ch't' explyicâtion par rapport à ch't' armouaithe-là. Tchille armouaithe dans l'Mangni qu'ch'tait? Nou n'sait pon achteu (si l'armouaithe est acouo là).

L'Sieur Athelstan Riley fit v'nîn l'Êvêque dé Ouînchêtre pouor consâcrer la chapelle qu'il avait fait bâti au Mangni, et l'Êvêque fit eune cérémonnie pouor cachi les mauvais esprits au Mangni, et d'pis chu temps-là nou n'a pon veu dé r'vénants au Mangni d'La Trinn'té.