Monday 2 June 2014

John Giffard Le Feuvre (1899-1973)

En 1973 George d'La Forge êcrivit entouor la mort d'san fréthe et san sèrvice militaithe duthant la Preunmié Dgèrre Mondiale:

In 1973 George F. Le Feuvre marked the death of his brother with a brief obituary including reference to his First World War experience:
Touos l's ans, j'attends fête dé m'èrtrouver en Floride quand veint la fîn d'févri, mais chutte fais m'n arrivée a 'té attristée par la mort dé man fréthe John Giffard. S'il avait vêtchu jusqu'au mais d'mai il éthait ieu 74 ans, ayant 'té né en Jèrri lé 24 mai, 1899.

J'soulais m'vanter qué j'tions siex fréthes vivants, chînq dé nous en d'ssus d'septante et deux des chînq en d'ssus d'huiptante, mais n'en v'la iun au r'pos êtèrnel. Ch'est assez drôle qué ch'est iun des pus jannes. V'la tchi montre qué ch'n'est pon l'âge tchi conte quand veint l'temps du trépas. Jusqué y'a trais ans j'avions deux soeurs vivantes étout, mais la piêsnée mouothit en 1970.

Man fréthe John Giffard 'tait un bouan garçon - comme lé sont touos les aut' fréthes. Il avait à peine deux ans quand i' s'en fut à La Côte auve p'pèe et m'mèe et nouot' fréthe Sydney dans la brick Dawn, un bieau navithe à vailes, dans l'mais d'avri, 1901. Quand la grand' dgèrre dé 1914-18 êcliatit, ouaithe tch'i' n'avait qu'tchînze ans, i' s'engagit dans l'Armée Cannadgienne, et i' fut bliessé assez mauvaisement à la tête dans l's envithons d'Ypres en Belgique, quand i' n'avait qu'seize ans, et s'rêvilyit dans un hôpita en Angliétèrre. I' vînt en Jèrri en pèrmission en 1915 dévant tch'i' fûsse bliessé.

Quand i' s'était engagi soudard, il avait donné s'n âge comme dgiex-huit ans, et comme il 'tait grand assez pour ch't âge-là et en avait l'appathence, il avait 'té enrôlé. M'mèe fit l's autorités militaithes lé renv'yer siez-li en lus présentant san cèrtificat d'naîssance, mais i' s'rengagit dans un aut' régiment et m'mèe r'fît la mème chose, et quand i' s'rengagit eune traîsième fais ou l'laîssit aller. Sa bliesseûthe l'empêchit d'continnuer san mêtchi dé "linotype operator" dans l'împrînm'thie auprès démobilizâtion, mais i' mênagit à gangni sa vie et faithe assez d'sou pour s'èrtither d'affaithes à l'âge dé 65 ans. Sa femme, eune Irlandaise-Cannadgienne (i' n'eûdrent pon d'êfants) mouothit en 1967.

3 comments:

James said...

(Apologies for the English)

This would be a great piece to add to Lives of the First World War. Please can you tell me the date of publication (I presume that it was originally published in the JEP?) and I will get it added.

James
CIFHS Journal Editor

L'Office du Jèrriais said...

We've got the full article transcribed now. It is titled "En Floride" and was published in the JEP 27/3/1973

James said...

That's excellent. Merci bein des fais!