1977: La Crouaix

 La Crouaix

 

Le Ménage ès Feuvres,

St. Ouën.

 

Lé 9 juilet, 1977.

 

Moussieu l'Rédacteu,

 

La Crouaix a eune sîngnificâtion toute partitchuliéthe pour touos Chrêtchiens viyant que ch'fut sus ieune qué Nouotre Seigneur fut crucifié, et oulle est tracée sus l'front d'nouos êfants par lé minnistre au moment du Saint Bâptème. Ch'est l'sîngne dé lus “initiation” dans l'Églyise Chrêtchienne.

 

Dans san livre, “Jersey, ses Antiquités, ses Institutions et son Histoire”, publié en 1859, Jean de la Croix nouos dit qu' un tas d'crouaix, l's eunes en pièrre, l's autres en bouais, existaient anciennement dans toutes les pâraisses dé l'Île. Nou les viyait dans les lieux publics, les chînm'tchiéthes et les carrefours. I' sèrvaient (îndépendemment d'l'întention réligieuse des autorités tchi l's avaient êrigies), comme lé font au jour d'aniet l's affiches et “poteaux indicateurs”, dé dgides pour les gens tch'allaient dans les rues d'eune pliaiche à l'autre, ou d'pâraisse en pâraisse.

 

Il' 'taient hardi nombreuses et 'taient ordinnaithement pliaichies à la fourtchie des rues tchi mèrtchaient la divîsion des pâraisses en vîngtaines, et aut' pliaiches dév'nues célébres ou împortantes par tchique occâsion, meurtre ou êvènement. Ch'tait des pieux monuments historiques tch'annonçaient, dé généthâtion à généthâtion, lé r'cit d'un accident ou d'un crînme tch'avait ieu lieu dans l'temps jadis mème dé chu temps-là, et tch'en gardait la mémouaithe en vie.

 

Y'en avait eune racachie y'a disons quat' chents ans et pus. D'après la “Chronologie d'Jèrri” dé Ralph Mollet ch'tait en 1548 tchi fûdrent abattues. La Crouaix du Marchi, où'est tch'est l'estatue du Rouai George dans l'Vièr Marchi, en 'tait ieune, mais ou n'fut pon abattue en mème temps qué l's autres, car oulle 'tait acouo lá en 1738 quand Jean Cavalier fut assèrmenté Lieut'nant Gouvèrneux. Nou la vait dans l'portrait du Vièr Marchi d'chu temps-là par J. Sullivan. La raîson qu' ou fut prêsèrvée 'tait probabliément viyant qu'oulle 'tait l'siège du Dénonciateu ou Vicomte pour les proclamâtions et annonces officielles. Et ch'tait lé tch'était l'pilo'syi (l' “pilori”) dans les vièrs temps.

 

Dans la pâraisse dé St. Sauveux, y'avait La Crouaix ès Mottes, La Crouaix d'Bouais (la pliaiche où'est qu'oulle 'tait est mênommée “Five Oaks” à ch't heu), La Crouaix Pèrchard et la Crouaix Besnard.

 

Dans la pâraisse dé St. Martîn, y'avait La Crouaix d'la Capelle ou Maîson d'La Crouaix, tchiquefais appelée La Crouaix Nicolle, La Crouaix au Maistre ou La Crouaix dé Jéhannet, et La Crouaix du Mangni d'Rôzé.

 

Dans la pâraisse dé St. Clément, y'avait La Crouaix à La Danme, La Crouaix dé Pièrre Desmades, La Crouaix Hastain, La Crouaix d'Bouais, La Crouaix dé Harène, La Crouaix Morin et La Crouaix Varen (ou Varin).

 

Dans la pâraisse dé La Trinneté, y'avait Les Crouaix, Les Hautes Crouaix, et La Crouaix du Mangni.

 

Dans la pâraisse dé Grouville, y'avait La Crouaix d'la Bataille, La Crouaix Câtelain, La Crouaix du Câtillon dé Haut, La Crouaix ès Renauds, et La Crouaix des Rues.

 

Dans la pâraisse dé St. Louothains, y'avait La Crouaix Anley.

 

À St. Jean, y'avait La Crouaix, dans L'Mouothi.

 

À St. Pièrre, y'avait La Crouaix St. Nicolas, La Crouaix ès Bruns, La Crouaix au Lion, et La Crouaix du Probytaithe.

 

À St. Ouën, y'avait Les Crouaix du Pont du Rouai, La Crouaix, La Crouaix dé Vinchelez, La Crouaix Vautchi, Les Crouaix, et La Crouaix Du Mangni.

 

Y'en avait d'autres qué nou-s-a oublié auve lé pâssage du temps, et y'en avait cèrtainement ieune dans châque chînm'tchiéthe.

 

Quand i' fûdrent abattues, les pièrres fûdrent parfénées ès alentours. Y'en a tchi s'trouvîdrent bâties dans bâtisses et muthâles. Tchiquefais les “piedestaux” 'taient trop b'sants pour bouogi et 'taient acouothe en pliaiche quand l'Sieur de la Croix êcrivit san livre en 1859. Jé n'pouorrais pon vouos dithe si nou peut acouthe en vaie dépis qu' nouos routes ont 'té êlaîzies, tant d'maîsons bâties et la campangne gavachie.

 

Dé nouos jours, comme nouos anchêtres des touos vièrs temps, j'avons d'la révéthence pour La Crouaix, sŷmbole dé rédemption, qué j'sommes accouôteunmés à vaie sus l's autels dé nouos églyises, mais quand les crouaix d'campangne fûdrent abattues, toutes les cheinnes tch'ètaient dans l's églyises fûdrent dêtruites étout, et i' r'prîndrent longtemps à r'faithe lus appathence.

 

La Crouaix n'a pon 'té oublièe dans nouos vièrs ditons. Comme Nouotre Seigneur souffrit d'ssus, oulle est l'sŷmbole dé souffrance et d'la peine étout, et y'en a iun tchi nouos dit: “J'ai ieu ma Crouaix" pour dithe "J'ai ieu ma peine!” Et un aut' nouos dit: “Mathyies-té ou n'té mathyies pas, ta Crouaix tu portéthas!”

 

George d'la Forge.