1966: La Soudardéthie (Siète)

La Soudardéthie

 

Fort Lauderdale, Florida U.S.A.

Lé 2 d'avri, 1966

 

Dans man janne temps, lé milicien, comme j'vouos l'disais l's aut' sémaines, avait eune vie pliaisante au camp dans Les Tchennevais, mais sa carriéthe comme soudard n'arrétait pon là. Au camp, il appranait comment drilyi, l'arme à l'êpaule et la baïonnette au canon. V'la tchi duthait dgiex jours de siète. Mais i' fallait apprandre à la mither et la tither comme i' faut, ch't arme-là, ch'est en tchi nou-s allait tither au blianc à Crabbé eune fais la s'maine pour eune volée. Jé n'mé r'souveins pon combein longtemps qu'ch'la duthait - p't êt' la valeu d'eune dgiexaine dé jours, un d'mie-jour à la fais. I' fallait être à Crabbé d'bouan matîn. J'crai que ch'tait à huit ou neuv' heuthes, et nou tithait au blianc, c'menchant à deux chents vèrges et alouangnant la distance par chent vèrges jusqu'a qu'nou-s arrivait à siex chents vèrges. J'mé r'souveins qu'nouot' arme 'tait eune “Lee Enfield” et i' m'sembl'ye que ch'tait l'modèle “Mark 4”. Ch'tait eune fichue bouanne arme. V'la tchi fut prouvé pus tard la grand' dgèrre. Les Canadgiens et l's Améthitchains avaient d'difféthentes armes. I' criyaient tch'il 'taient milyeuthes qué les nôtres à tither au blianc, mais l'maindre p'tit mio d'saleté ou d'pité empêchait lus mécanisme pour tither dé travailyi comme i' faut et i' finîdrent tous par être accoutrés auve les “Lee Enfield” Angliaîches.

 

En m'en allant à Crabbé, j'allais par siez l'Chentnyi Carrel ès Ormes à St Pièrre qu'si John Malzard, et nou y'allait ensembl'ye. Ch'tait la machinne a pédales qué nou faîsait servi dans chu temps-là. Lé moto' n'tait pon acouo par les c'mîns. En r'vénant, j'restais à dîner siez l'anmîn Malzard. Sa charmante bouannefemme nouos m'ttait un fricot sus la tabl'ye tchi m'faîsait mangi comme un foueux! Lus p'tite fille 'tait belle comme eune flieur et m'faîsait trejous la beinv'nue. V'la tchi ramemouaithe qué jé n'l'ai veue qu'eune fais d'pis, chutte pouorre fille - quand j'allis auve Fraînque Le Maistre siez lyi à Vînchelez quand oulle 'tait Missis Gordon Ch'valyi - pas bein d's années d'vant qu'ou' mouothîsse.

 

La Grande' R'veue 'tait tréjous la fîn d'sèrvice dans la Milice pour l'année. Auprès la r'veue nou-s allait r'porter l's habits d'soudard à l'arsénal, où-est tch'i' restaient jusqu'à la préchaine année d'sèrvice, quand nou-s allait les qu'si en temps pour èrquemenchi les dgiex jours dé Camp ès Tchennevais. Quand nou-s avait fait sèrvi les bottes dé soudard trais ans d'siète, nou pouvait les garder, et i' vouos en donnaient eune neuve pathe. Ch'tait des bouannes bottes et nou 'tait contents quand v'nait l'temps d'les garder. J'allais quâsi oublyiyer d'vouos dithe que nou 'tait payis pour les dgiex jours dé camp, mais j'ai oublyiyé combein. I' m'sembl'ye qué ch'tait deux ch'lîns par jour, mais j'n'en sis pas seux. Y'avait des sou d'donnés comme prix à tither à Crabbé ès cheins tchi faîsaient un cèrtain nombre de points.

 

La Grand' R'veue 'tait sus les sablions dans la Baie d'St. Aubîn, mais du but d'l'Est, a bein pres endrait l'Bel Rouoya. Nou m'ttait l'habit d'parade chu jour-là, bliues braies, rouoge câsaque, et chapé auve le pitchet sus l'haut. I' fallait passer en lîngne et en colonne dé marche dévant l'Gouvèrneux, la compangnie d'St. Ouen en tête, et pis l'Gouvèrneux faîsait un discours pour vouos encouothagi et vouos dithe qué nou 'tait quâsi aussi bouans comme les rédguliers! Iun d'ieux, l'General Hugh Sutlej Gough, nouos dit qué ouaithe tch'il avait veu hardi d'soudards passer en r'veue, i' n'avait janmais veu comme nous! Dans l'temps, nou criyait tch'i' voulait dithe tch'i' n'en avait pon ieu d'si bouans à drilyi, mais i' faut penser tch'il entendait p't êt' lé contraithe!

 

Ch'tait à l'occasion d'ieune dé ches Grand' R'veues-là qu'eune douzaine dé St. Ouennais r'fusîdrent dé marchi quand un ordre fut donné tch'éthait mînt la compangnie en driéthe a la pliaiche d'en d'vant pour la r'veue en colonne de marche. Ch'tait l' 27 d'avri, 1891, l'année d'ma naîssance. Man p'pèe 'tait parmi l'nombre tchi r'fûsit d'marchi. À l'exèrcice ordinaithe lé 30 d'avri, man pepèe et onze autres fûdrent ordonnés d'mett' lus armes bas, et au préchain exèrcice du régiment, 69 St. Ouennais 'taient absents. La louai s'en mêlit auprès chen'na et treize dé ieux fûdrent présentés d'vant l'Juge dé La P'tite Cour. L'sèrgeant 'tait un Le Boutilyi, et l'corpotha 'tait l'Sieur Arthur Elie L'Blianc du Coin. I' fûdrent tous condamnés à la prison. Man p'pèe en eut dgiex jours, j'pense. J'ai tréjous ouï qu'à sa sortie d'prison eune dgaîngue dé ses camarades 'taient à l'attendre à la porte atout la musique et eune ouagonnette et tch'i fut tellement convié à l'auberge qué la vie d'prison lî sembliait comme un réve du temps passé par lé temps tch'i' r'vînt siez nous!

 

Dans sa vieillèche en Dgèrnesy, m'n oncl'ye Ouinn'teur mé dit tch'il 'tait là auve man p'pèe en 1891, mais i' n'fut pon présenté en cour. Man p'pèe 'tait dans l'preunmié rang. M'n oncl'ye Ouinn'teur 'tait dans l'deuxième rang au but. Y'avait un Horman (ou Norman) à côté d'li tch'êprouvit à l'faithe marchi, et lî halait sus la manche. M'n oncl'ye m'dit “J'li fichi man poing dans la goule! Là: j'lî dis, Marche, té, et fiche lé camp dans eune aut' compangnie!”

 

George d'La Forge