1977: Les changements sont en mode

 Les changements sont en mode

 

Le Ménage ès Feuvres,

St. Ouën.

 

Lé 24 dé septembre, 1977.

 

Moussieu l'Rédacteu,

 

M'èrvélà dé r'tou en Jèrri auprès eune pétite vacance pâssée en France. Comme dans touos les vièrs pays “modèrnes” nou vait des changements en France comme ichîn. Ch'est des “auto-routes” tch'i' faut à ch't heu pour prendre soin dé touos les motos qu' nou vait partout, et les Français sont à en bâti tout pliein. À Rennes, en Ille-et-Vilaine, ch'est des “gratte-ciels” qué nou vait en quantité l'long d'ches neuves auto-routes tchi vouos mènent lé tou d'la ville à la pliaiche d'aver à la travèrser pour continnuer c'mîn pour lé sud d'la France. I' y'a ieu tant d'progrès qué nou pouôrrait quâsi s'craithe en Améthique, sustout comme nou vait d's annonces dans un tas des stâtions d'pétrole comme “Esso” et “Gas Oil”. Y'a des Français tchi prononcent ch'là “Gâzoil” tout en iun!

 

En Brétangne, nou n'vait pus coëffes ni chabots. J'pense bein qu' nou-s-en vèrrait tch'îthait sus les fèrmes, mais l'progrès s'montre en Brétangne comme par ailleurs.

 

Eune chose à r'mèrtchi dans les auto-routes et grandes routes est qué, comme en Jèrri, les gens - prîncipalement les jannes - cachent trop vite, et i' n'manque pon d'accidents. J'liêsais la gâzette touos les matîns quand j'tais là, et y'avait tréjous l'mention d'morts par accident d'motos dans les divèrses contrées du pays.

 

J'vai tch'i' n'y a pon ieu grand changements en Jèrri duthant m'n absence. Comme d'habitude j'ai liu les gâzettes publiées quandi qué j'tais en France. La preunmié chose tchi m'a frappé est d'apprendre tch'i' y'avait telle chose comme un homme en Jèrri, auve un vrais nom Jèrriais, étout, tchi n'criyait pon qu'un touothé Jèrriais est dangereux et qué nou pouvait lé r'muer comme nou r'mue eune vaque. J'criyais qu' autcheune pèrsonne née en Jèrri savait qu' nouot' belle pétite vaque est la pus douoche et apprivouaîsie au monde, mais qué s'n homme est l'pus roupilleux d'touos les touothés.

 

V'la tchi m'ramémouaithe qué quand j'vis lé “Combat des Tauraux” dans la Thiâtre des Boeufs (“Bull Ring”) à Mexico City en Mexique, lé pus grand au monde, j'pensis qué lé “toréador” tchi tormente lé pouôrre dgiâtre d'touothé dans l'combat atout sa rouoge palotinne pour lé faithe affoler, et pis finnit par lî' enforcer un sâbre jusqu'a la pouangnie entre les palettes dé l'êpaule pour l'abattre quand i' n'en peut pus, j'pensis tch'i' trouvethait p't-êt' san maître s'il êprouvait l'combat auve iun d'nouos touothés Jèrriais!

 

V'la tchi m'ramémouaithe, étout, qué j'pensis qu' chu combat là est si cruel, viyant qué l'pouôrre touothé, ouaithe tch'i' fûsse des pus braves, n'a autcheune chance car i' finnit par êt' tué, qué j'tais absolûment dêgouôté du spectacl'ye, et tchittis lé “Bull Ring” auprès aveu veu trais d'ches pouôrres touothés-là tués. Jé n'peux pon comprendre comment qu' un peupl'ye peut appeler telle cruauté envèrs des annimaux un “sport”.

 

I' faut féliciter nouos jannes gens tch'ont noué La Manche, dé France en Angliétèrre ou vice-vèrsa. Ch'est merveilleux qu' des jannes dé quatorze ans ont la forche dé nouer des distances dé même. Et ch'n'est pon seulement la distance, mais ch'est d'aver à combattre les couothants et les mathées, et l'vent, et souvent lé tapotage des louêmes quand la mé est rude.

 

Ch'tait lé 24 d'août, 1875, qué l'Cap'taine Matthew Webb, lé tout preunmyi à l'faithe, mênagit à la nouer, et il y fut 21 heuthes et trais-quarts. Jé n'sai pon pourtchi tch'il y prînt si longtemps quand nouos jannes lé font dans la maintchi du temps, mais il est sans doute possibl'ye tch'i' l'fît quand les conditions n'taient pon favorabl'yes. Mais il eut eune triste fîn, l'pouôrre Cap'taine. I' s'en allit en Améthique et pèrdit sa vie en êprouvant à nouer la chute dé Niagara lé 24 dé juilet, 1883. I' n'avait qu' trente-chînq ans dans l'temps.

 

I' m'sembl'ye qué Papa L'Feuvre mé dît, quand j'tais mousse ichîn ès Landes, qué l'Cap'taine Webb avait d'valé la chute dé Niagara dans un bathi fait à l'exprès, mais autcheune pèrsonne tch'a veu “Niagara Falls” n'a pon d'peine à craithe qué n'împorte comment qu' nou s'y prendrait ché s'sait înviter l'trépas.

 

I' faut féliciter l'Sénateu Shenton pour vouler mett' un arrêt à l'agrandissement touristique et au nombre d'motos qué nouos routes piêssent supporter, à la pliaiche dé continnuer à bâti des garages dé stationnement et êlaîzi nouos routes et empouaîsonner l'air acouo pus.

 

Et i' faut féliciter l'Sieur Rubach dé La Chaumière à Gros Nez pour sa lettre du 12 septembre en d'fense dé la consèrvâtion des Landes dé St. Ouën tchi sont en dangi dé destruction par motos, motocyclettes, j'vaux, touristes, “camping”, la brul'lie dé foustra, etc. Aux armes, Landais!

 

George d'La Forge.