1966: La Soudardéthie

 La Soudardéthie

(Siète)

 Fort Lauderdale, Florida, U.S.A.

Lé 26 d'mar, 1966

 Comme ou'pouvez bein l'inmaginner, la bangniole n'eut pon lieu chutte matinnée-là. Pus d'la maintchi d's hommes dan la chambre où-est qu'j'avions mêlé l's habits, l'Fraînque et mé, lus mîndrent en rang tard et à la maintchi habilyis. Y'en avait iun tchi n'pouvait pon trouver ses braies, et il arrivit en drâses. Un aut' n'avait pon trouvé eune pathe dé bottes tchi 'tait d'la grandeu tch'i' fallait, et i' s'mînt en cauches dans l'rang. Un aut' vînt auve rein qu'eune botte, et un aut' arrivit atout eune câsaque tch'éthait 'té deux fais l'tou d'li, et les manches 'taient si longues qué nou n'li viyait pon d'mains. Un aut' vînt atout eune câsaque sus san bras tch'tait bein trop p'tite pour li, mais i' l'avait apportée pour prouver à l'offici qu'tchitchun d'aut' avait la sienne ! S'i' y'avaient pensé, il' éthaient peut mett' les bouans habits tch'il' avaient au concèrt la séthée dé d'vant, mais dans l'tîntamârre et la peux d'êt' tard à rêpondre à lus noms en rang, i'n'y pensîdrent pon, sustout comme i' n'avaient qu'tchiques munutes à lus habilyi, ayant, comme d'habitude, resté au liet jusqu'à la dreine munute !

 

Lé sèrgeant 'tait au m's'espé, et trop mârri dans l'temps pour vaie l'hunmour dé la scène dévant li. Dé la carre dé m'en yi j'viyais l'offici s'touanner d'bord auve lé souorit sus sa fache, mais i' n'ôsait pon montrer tch'il en n'tait amusé !

 

Naturellement, la preunmié tchestchion 'tait : “Tch'est tch'avait mêlé touos l's habits ?” Sans doute, pèrsonne né l'savait - et pèrsonne né l'avait dêcouvert jusqu'à y'a deux ans ! En 1964 j'tais à pâler à “Ted” Dart à Foligny House à St. Aubîn. En pâlement des vièr temps, i' m'dit tch'il 'tait iun des cheins tch'avait ieu ses habits mêlés chutte séthée-là à La Grève dé Lé. Quand j'lî dis qué ch'tait l'Fraînque et mé tch'avaient fait l'mînchet, i' faillit à s'êvanni d'surprînse ! J'avions gardé l'ségret si bein qu'la grand' partie des miliciens d'chu temps-là tchi n'sont pus à ch't heu n'l'ont janmais seu, et des survivants pèrsonne né l'avait seu pour 50 ans quand jé l'dis à Ted Dart!

 

Hélas! Un tas d'ches braves garçons-là fûdrent tués à la dgèrre un p'tit pus tard. Y'en avait parmi ieux tch'étaient dueurs et batilyeurs dé natuthe. Iun d'ieux 'tait Winter Garde (san mênom 'tait “Ouinn'to”). I' fut tué dans les tranchies en France ou en Belgique dévant qu'la dgèrre eusse duthé longtemps, et i' s'était si bein comporté en fache dé l'enn'mîn qué s'n offici êcrivit à ses pathents pour lus dithe tch'il 'tait iun d'ses milyeurs soudards et tch'i' n'avait peux d'rein et tch'i' s'était battu comme un tigre contre l's Allemands.

 

V'là tch'i' m'ramémouaithe tch'il 'tait iun des cheins tch'avait fait du troubl'ye au camp dans l'temps qué lé Lieut'nant-Coronel Alavoine 'tait v'nu nouos bailli eune savonnée au sujet du comport d'un soudard. I' s'adonnait qué l'bouan vièr sèrgeant-mâjeur Horwood avait finni ses vîngt-iun ans ou pus dans l'armée et s'décidit d'prandre sa pension et d'tchitter l'armée. Un sèrgeant-mâjeur avait des privilèges qué l'bouanhomme Horwood n'avait janmais exèrcé ni exigi. Il avait l'drouait d'faithe lé soudard sé mâter drait au “Garde à vous” (“Attention” en Angliais) quand i' vouos pâlait, et d'êt' appelé “Moussieu” comme nou l'faisait à un offici, mais i' n'avait pon l'privilège d'êt' salué. Il avait l'drouait, étout, d's'habilyi en offici (sans doute sans l's êtelles ou însîngnes d'offici sus l's êpaulettes). En général, les miliciens n'lé savaient pon, car lé bouanhomme Horwood, sachant tch'il avait affaithe à des fèrmièrs pûtôt qu'à des rèdgulièrs, n'avait janmais mînt ses privilèges en pratique.

 

J'fus eune aut' histouaithe quand i' fut rempliaichi par lé sèrgeant instructeur dé mousquetterie Aldridge. Ch't'îla 'tait ordgilyeux et c'menchit à puni les cheins tchi n'lî donnaient pon touos l's honneurs dé san nouvieau rang d'sèrgeant-majeur. Eune demi-douzaine dans la compagnie d'St Ouën lus mârrîdrent. Ouinn'to Garde en n'tait iun. Dans la niet, i' mîndrent la baïonnette au canon et pèrchîdrent la tente du nouvieau sérgeant-mâjeur. I' copîdrent les cordes tchi la t'nait d'but et l'abatîdrent sus li. Il eut eune fichue peux et hapit la pathe pour lé sanctuaithe des tentes des officièrs, l's autres souotre li ! Arrivé-là i' s'trouvit en seutheté, et dans l'entretemps i' n'avait pon ieu d'ma. I' faut penser tch'i' n'avaient pon idée d'faithe sèrvi la baïonnette sus li, car ch'est seux tch'il'éthaient peut l'attraper s'il' avaient rêéllement voulu. Enfin, janmais i' né r'fut veu dans l'bataillon du Ouest. I' fut env'yé d'tchiquebord d'autre, et j'eunmes un nouvieau sèrgeant-mâjeur tchi n'êprouvit pon a nouos embêter d'trop !

 

Jé n'mé r'souveins pon trop bein tchi punition tchi fut donnée ès St. Ouënnais tch'avaient m'nichit l'Sieur Aldridge. J'pense tch'i' fûdrent mînts à l'amende par lé Juge Vaudin à La P'tite Cour, mais pour lus camarades dans tout l'bataillon il' 'taient des héros, ayant fait touos seurs chein qu'touos l's autres n'avaient pon ieu l'couothage dé faithe !

 

(A sièthe)

 

George d'La Forge