Êlections et appointements
Trenton,
Michigan
U.S.A.
Lé 3 d'mai, 1975
Moussieu l'Editeur
La gâzette du vingt d'mar veint d'arriver, et la preunmié chose tchi m'a frappé est l'rêsultat d's êlections pour Députés en ville et à Grouville. J'n'ai pon l'honneu d'connaître les candidats, et j'n'ai autcheune idée d'la capacité des gangnants et pèrdants. Mais j'espéthe qué ch'est les miyeurs tch'ont gangni. A Grouville j'vai qué l'moussieu tch'a un nom Angliais a battu l'chein tch'a un nom Jèrriais, un aut' exempl'ye du changement qué l'pâssage du temps nouos a apporté. Quant à Madanme du Feu, jé n'sai pon s'oulle est Jèrriaise. Ouaithe qué san nom y'est, ou porte lé nom d'fanmil'ye dé son homme. J'espéthe qué ouaithe qu'ou r'présente un groupe partitchulyi d'ses êlecteurs, ou s'en va rêaliser qu'ou r'présente rêellement touos les constituants d'san district êlectoral dans L's Êtats. S'ou s'atchitte aussi bein comme lé Député Norman Le Bro, sa présence dans la Chambre vaudra la peine.
J'm'èrsouveins du temps tch'i' n'y avait pon d'femmes dans L's Êtats, et en 1948 j'écrivis au sujet ès ''Chroniques de Jersey'', eune fameuse gâzette en Français tchi n'existe pus dépis la fîn d'1959, en disant : ''j'pliaindrais bein L's Êtats s'i' n'y avait qu'des femmes dédans. Nou pâle dé caqu'ter – y'en éthait-i, d'la caqu'téthie ! Ché s'sait piéthe qu'eune couotuth'thie ou qu'un poulailli. Et i' n'accordéthaient pon dgiex minnutes. Nou n'ouithait pus 'Même opinnion'. En séance dans la Chambre ché s'sait à la cheinne tch'éthait l'pus bieau chapé et la pus belle robe. I' né f'thaient qu'pâler toutes en même temps, et y'éthait pus d'distchussion qué d'décisions !''
Eh bein, i' faut admettre qué j'disais tout chenna dans ma lettre pûtôt auve l'idée d'faithe rithe les gens qué par conviction, et qu'mes idées ont changi hardi à m'suthe qué la vieillèche a adouochi ma têtouangnise, mais jé s'sais p't-êt' accouo d'la ''même opinion'' si touos les siêges dans L's Êtats 'taient otchupés par des femmes. Mais ouaithe tch'i' n'y a qu'vîngt-sept ans dépis qu'j'êcrivis chutte lettre ès ''Chroniques'', lé pâssage dé chu quart dé siécl'ye nouos a apporté eune douzaine dé femmes dans la Chambre, et i' faut dithe tchi lus sont atchittées honorabliément. Mais lus înfluence n'a pon bouleversé les décisions législatives dé l'Assembliée et Madanme du Feu s'en va dêcouvri qué ch'n'est pon la pus aîsie chose au monde d'avanchi l's întéthéts d'un seul mouvement politique si ch'est ch'la qu'oulle a dans l'idée en voulant siégi dans L's Êtats. Enfin, j'lî souhaite bouanne chance et comme nouos l'dit l'vièr diton, la fîn du temps f'tha tout vaie.
Les femmes veinnent dé pus en pus sus l'tapis. Ichîn en Améthique, il' ont pâssé des louais tch'établyissent l'êgalité entre hommes et femmes dans l'travas et si eune maîson d'conmerce fait du travas pour lé gouvèrnément oulle est forchie d'empliyer des femmes proportionnellement au nombre d'hommes s'i' s'présentent pour demander du travas. Et les gens ichîn sont accouoteumnés à tant d'luxe dans la vie qu'hommes et femmes mathiés veulent souvent travailli pour gângni assez pour y suffithe. Lé rêsultat en est qu'un tas d'mousses sont laîssis pus ou mains à lus dêpautchi du mus tchi peuvent, et ch'est ieune des raisons du ''vandalisme'' dans l's êcoles tchi couôte des millions d'dollars annuellement au contribuabl'ye.
La dreine folie est l'idée d'ordinner des femmes-prêtres dans l's Églyises Êpiscopales, Anglyicannes et Romaines. La tchestchion a 'té sus l'tapis ichîn et au Cannada pour tchique temps, et au moment actuel un prêtre dé l'Églyise Êpiscopale est d'vant eune Cour Ecclésiastique à Washington pour aver pèrmîns à des femmes-prêtres ordinnées illégalement, dé célébrer la Sainte Cène.
À ches drein j'ai liu les ''Pilote'' mensuels dé l'Églyise en Jèrri pour ch't' année, et j'vai qu' l'idée a trouvé san c'mîn en Jèrri étout. Eune chose tchi m'fait pliaîsi est qu'les contributions du Vice Douoyen Peter Manton et de ''Pinpoint'' ont rêvilyi l' ''Pilote'' et tch'i' c'menche à êt' întérêssant à liéthe. J'sis absolument du même avis d'ches deux-là au sujet d'femmes-prêtres, et j'espéthe qué touos les changements et abandon d'ordre et d'disciplinne tchi tormentent l'Églyise Anglyicanne – et l'Églyise Romaine étout, quand à ch'la – né s'en vont pon finni par les dêtruithe.
L'appointement du Révérend Peter Manton comme Vice Douoyen né m'pathaient pon aver 'té r'chu auve enthousiasme par les Recteurs de l'Ile, car i' n'y a qu'un minnistre Anglyican, lé Révérend Terry Hampton, dé St Aubîn tchi – dans l' ''Pilote'' [individuelles des églyises et chapelles d'aise dans l'''Pilote''] du mais d'mar – lé mentionne comme Vice Douoyen et lî souhaite tout bonheu. Mais eune chose est bein cèrtaine : Ch'est qu'v'la tchi n's'en va pon lé d's'encouothagi. I' n'est pon court dé pé, et la contrariêté n'li fait pon peux!
Jersey Weekly Post 29/5/1975
[In the original article, there seems to be a typo in the last paragraph]
No comments:
Post a Comment