1965: La Floride

 La Floride

 

Fort Lauderdale, Florida,

U.S.A.

 

Moussieu l'Rédacteu,

 

Ichîn, au bieau solé, nou-s a d'la peine à craithe tch'i' y'a du mauvais temps dans l'monde! Dans la ville dé Fort Lauderdale - eune ville dé 150,000 habitants - 25 milles au nord dé Miami, i' pathaît tch'il y veint trais millions d'touristes dans l'hiver pour prendre avantage du bieau temps. La grand' partie des gens tchi d'meuthent dans l's Êtats du Nord (où-est tch'i' fait fraid comme au Canada) et tchi peuvent y'affaurder, veulent y passer un mais, ou pus pour raccourchi l'mauvais hiver siez-ieux. En passant dans la ville ch't arlévée, j'viyais un sîngne tchi disait qu'la tempéthatuthe 'tait 84 dégrés. Étant si près d'la mé, y'a tréjous eune brise dé vent tch'aîgue à supporter la chaleu, et ch'tait eune tempéthatuthe confortabl'ye. La grève lé long d'la ville a siex milles dé long, et l'sablion est quâsi blianc comme la né. Nou peut s'y bangnier confortabl'yément touos les jours dé l'année. Pour les cheins tch'aiment aller à la pêque, y'a tout pliein d'gros paîssons à prendre, mais i' faut aller en mé. I' n'y a pon d'mathée pour dithe, et i' n'y a pon telle chose comme d'aller à basse-ieau comme en Jèrri!

 

Ch'est r'mèrquabl'ye dé vaie d'la vèrduthe et des flieurs partout. Les bouais qu'nou vait l'pus sont les palmiers, à cocannettes et dé toutes les sortes. Dans l'gardîn à côté d'la maîson où-est qu'jé d'meuthe, ch'est l'palmier rouoyal, et au cliai d'la leune nou s'créthait en Êgypte sénon qu'ya des flieurs en abondance. Y'a des bouais d'pamplemousse, et d's orangièrs en mâsse, et des bouais" avocatiers". La paithe d'avocat tchi crais d'ssus est chiéthe à acater dans l's Êtats du Nord. Y'a étout, des bouais "manguiers". Des manniéthes dé pêches craissent dessus - appelés des "mango" - tchi sont hardi douoches et ieauseuthes.

 

Sans doute y'a des d's'avantages en Floride, comme dans touos les pays. Y'a, en saison, des tornades tchi peuvents même abattre des maîsons, mais à ches drein y'en a ieu dans l's Êtats du Nord étout. Eune partie d'La Floride, appelée Everglades, et eune vraie jungl'ye, l'habitat des bêtes sauvages comme les alligators et l's ocelots (un gros cat sauvage), les ratons laveurs ("raccoon" en Améthique), etc., et des sèrpents à sonnettes et deux-s'trais aut' tchillieuvres vénimeuses. Y'a des lacs, p'tits et grands, et un tas d'paîsson dans certains. L's ouaîsieaux n'y manquent pon. Des grands comme lé flamant, lé pélican et l'toucan, et des pus p'tits. La fanmile des pics, atout lus bieaux plieunmages, est bein r'présentée.

 

Comme dans touos l's Êtats du Sud, lé vautour, et sustout l'busard, sont les nettisseurs des routes. Quand nou-s est en moto, nou vait souvent eune grand' néthe taque liain d'vant sé en plieinne route. Quand nou-s en apprèche, la taque dispathaît en l'air et nou vait qué ch'tait eune douzaine dé busards en trains d'dévorer les restes d'un lapîn ou d'tchiqu'aut' anima êcrasé par les motos la niet! I' s'envolent quand l'moto apprèche et s'èrmett' au festîn eune fais tch'il a passé. Eune fanmeuse maniéthe dé garder l'air sain dans les pays cauds!

 

La ville dé Fort Lauderdale est appelée "La Vénise d'Améthique". Lé nom dé "Lauderdale" lî fut donné en 1837 viyant qué ch'tait l'nom d'un cap'taine dé la'rmée tch'y bâtit un fort dans l'temps qué l's Îndgiens dé la tribu Seminole faîsaient acouo la dgèrre ès envahisseurs dé lus pays, mais ch'tait quâsi 80 ans pus tard qué la ville fut fondée - en 1915 - et dans chu temps-là, i' n'y avait qu'500 habitants là. Ch'est r'mèrquabl'ye qu'la population d'eune ville peut craître dé 500 à 150,000 dans eune affaithe dé 50 ans!

 

La Floride, presqu'île et mathécageuse, fut dêcouverte par les Espangnos en 1512. L'Êtat est s'pathé d'l'Île dé Cuba par lé Canal de Floride, et a eune laize mouoyenne dé chent milles et eune londgieu dé 450 milles. Sa côte a eune londgieu dé 1,398 milles, dé tchi 957 milles longent lé Golfe du Mexique. ch'tait l'explorateur Ponce de Léon, gouvèrneux dé Puerto Rico en 1513, tchi lî donnit l'nom dé "La Florida" viyant tch'il y trouvit tant d'vèrduthe et d'flieurs. En 1564 un groupe dé Huguenots y vîndrent à terre et êtabl'yîdrent eune colonie sus la péninsule, mais lé rouai Ph'lippe deux d'Espangne, craignant qué rouai d'France èrcliâméthait la région, env'yit eune expédition contre la colonie tchi la machacrit. Les Français eudrent lus r'venge pus tard. Dominique de Gourgues (1530-93) fut env'yé par lé rouai d'France en chèrge d'eune expédition pour èrgangni la colonie. Il y réussit et pendit tout la garnison Espangnole tchi restait à la fîn d'la batalle!

 

Par chu temps-là, la colonie 'tait connue comme St. Augustîn, et chutte fais ch'tait l's Angliais tchi s'en mêlîdrent. Messire Francis Drake prînt St. Augustîn des Français en 1586. L's Espangnos avaient tréjous resté d'tchiquebord sus la péninsule, et i' la cédirent à l'Angliétèrre en 1763 par lé Traité d'Paris. L'Angliétèrre la gardit jusqu'en 1783 et la r'donnit à l'Espangne en êchange pour l'archipel de Bahama. En fîn d'compte, l'Espangne vendit la Floride ès Êtats-Unis pour chîn millions d'dollars. Tchi mangnifique bardgîn pour l'Améthique!

 

George d'La Forge

Evening Post 29/12/1965