1974: Dans la gâzette

Dans la gâzette

 

San Antonio, Texas,

U.S.A.

Lé 21 dé dézembre, 1974

 

Moussieu l'Rédacteu,

 

L'încèrtitude d'au jour d'aniet est la poste. J'avais quâsi pèrdu espéthance dé janmais r'chéver des gâzettes dé Jèrri, mais à ma grand' surprînse - et grand pliaîsi en mème temps - j'en ai r'chu quatre chutte sémaine, trais l'même jour et la quatrième deux jours pus tard. La dreine èrchue est la cheinne du sept dé novembre, ch'est en tchi ou viyiz qu'les nouvelles dé Jèrri sont siex s'maines en r'tard. Mais i' n'en sont pon les mains beinv'nues, car ouaithe qué jé n'sis pon malheutheux en Améthique, mes pensées sont l'pus souvent en Jèrri.

 

Eune chose qué les gâzettes dé Jèrri m'annoncent est la même chose ichîn étout - la renchiéthe des vivres et d's habits et d'toutes sorte d'marchandises continnue. J'vai qué l'lait est deux ch'lîns la pînte à ch't heu dans l'Île. Sans doute lé prix dé dgiex pénîns n'pathaît pon tèrribl'ye quand nou l'vait par êcrit, mais ch'est quand même deux ch'lIns! Et avouo j'comprends qué l'pouorre fèrmyi n'peut pon faithe dé profit sus l'l'ait d'ses vaques. Où'est tch'est lé r'miède? Sans doute Moussieu Percy L'Masuthi nouos en donne eune idée quand i' nouos dit qu'les boulets qué nou donne ès vaques a r'doubliée d'prix - dé quarante-chîn louis l'tonné à nénante - et qu'l'engrais a r'doublié étout - dé trente-chîn louis à septante. Ch'est seux qué l'fret d'transport dé l'engrais et des boulets d'Angliétèrre en Jèrri a ieu hardi à faithe dans la renchiéthe, et ch'éthait 'té un bouan sujet à distchuter auve lé Ségrétaithe Général du Sŷndicat d'Transport, quand il 'tait en Jèrri vèrs la fîn d'octobre, mais à la pliaiche dé l'apostrophier au sujet, j'vai qué L's Êtats donnîdrent un dîner à s'n honneu à l'Hôtel l'Horizon! Nouos anciens éthaient bein vite dit qué "Nouos couochons n'veulent pus d'chours" si d'ité avait ieu lieu dans lus temps!

 

En pâlant d'couochons (respé vouot' honneu - m's anmîns raffinnés m'dithont qué dév'thais pûtôt dithe "Bêtes à Saie" mais j'ai voulu mentionner l'mot comme nou l'dit dans l'diton) j'vai dans eune des gâzettes qué les Ste Mathiais s'en vont pèrdre l'honneu d'aver ieune des pus belles et modèrnes cotte dé l'Île dans lus pâraisse. san portrait dans la gâzette du 17 octobre est supèrbe - un palais à bêtes à saie compathé ès cottes qué nou viyait dans les bels des bèrmes quand j'tais mousse. I' faut penser qu'les gens à l'entou s'en vont garder un bouan souv'nîn du parfum tchi dispathaîtra auve la démolition. quant à mé, ouaithe qué j'crai bein tch'il en est trop tard à ch't heu, j'éthais voulu proposer qu'au mains ieune des cottes éthait 'té amênagie un mio, mais pon assez pour pèrdre san parfum, pour y louogi lé Sieur Peter Tombs à la clié et "à perpétuité" comme disent les êcrivains!

 

J'sis bein content d'vaie qué l'Parti Communiste en Jèrri a condâmné l'Sieur Tombs. Ch'est danmage qué les cheins tchi voulaient lî mett' la patte sus l'co la séthée tch'i' s'montrit sus la télévision n'en eûdrent pon la chance viyant tch'i' mênagit à s'êcapper. enfîn, lé Parti Communiste méthite un "Hourras" chutte fais.

 

Mes félicitâtion à l'Avocat Ph'lippe Bailhache tchi s'en va êt' nouot' préchain Avocat Général. J'ai connu san papa, tch'était iun d's êcrivains dans La Rue des Trais Pigeons quand j'tais clèrcot dans l'office à Moussieu Binet. J'n'ai pon l'honneu d'connaître l'Avocat, mais i' pathaît bieau garçon par san portrait dans la gâzette. Jé n'sis pon seux, car nou n'peut pon vaie l'driéthe dé sa tête dans l'portrait, mais si ses g'veux sont longs en driéthe il étha l'honneu d'êt' lé preunmyi Offici d'la Couronne à long g'veux dépis qué ch'tait la mode y'a tchiques chents ans. Si tel est l'cas, comme nou l'dit en Angliais, "History repeats itself!" Ch'n'est pon par manque dé respé qué j'mentionne chenna - ch'est eune affaithe historique - l'idée m'a frappé en r'gardant san portrait. Enfîn, v'là tch n'l'empêche pon d'êt' au-fait dans sa carriéthe et j'lî souhaite succès et santé dans san nouvieau grade, et j'sis bein content d'vaie qu'j'avons acouo d'bouans Jèrriais à sèrvi la Couronne.

 

en pâlant d'Jèrriais, comme j'l'ai mentionné d'vant, i' dispathaîssent à grands pas. Sus chînquante-tch'ieune naîssances dans l'entchi des quat' gâzettes èrchues dreinement, i' n'y a qué dgiex vrais noms Jèrriais. Deux aut' noms m'pathaîssent Dgèrnésiais. V'là tchi m'a fait penser qué j'dév'thais examinner les noms dans l's annonces des fianchailles car i' s'sont les pathents d'la fututhe généthâtion. Hélas! Sus tchînze coupl'yes, j'trouve trais noms vraînment Jèrriais parmi les jannes hommes, et chînqu parmi les jannes filles. Malheutheusement, les filles né comptent pon car les êfants n'portéthont pon lus noms.

 

Ch'est vrai tch'i' y'en a un tas à l'êtrangi, d'Jèrriais, mais lus êfants d'veinnent ditouoyens des pays d'lus naîssance - et i' sont pèrdus à lus Île natale!

 

George d'La Forge