1916: Miss Lonôre goes to the Show

 Miss Lonôre goes to the Show

 

"Tchès qu'tu'en pense?" que j'dit l'aut sé a Piteur, quand j'fûmes couochis et qu'la veue fut èsteinte [...] à dithe vrai, j'nos 'taimes couochis [...] veue; avec chu "daylight-saving," nous y vèt ocquo assez a s'couochi sans chandelle; et j'peux brînji mes ch'veux a tâtons sans diffitchulté; ch'est eunne habitude que j'prins etant fille, de brinji et rabrenji pour un bouan quart-d'heuthe - v'la tchi les fait r'lîzé. Lonôre est coumme mé souos chu raport la; car, ch'est pas pour [...] mais si s'adounnait qu'ou la vîssiêtes, le sé, justement d'vant que s'couochi, d'u endrét san mitheux, toute en blianc ov ses long c'veux avaut l'dos, et ses bieaux bras bliancs a râtlé cheunna que les dents du pienne en volent par la chambre, ou restéthaites en éxtase.

 

Mais r'venons a nos moutons. "Tchès qu'tu'en pense?" que j'dit a Piteur, l'aut' sé, quand j'eûmes nos têtes sur l'ouothillyi. "J'sis en même d'allé proumné ma fille au Show d'Roses. Toute la Haute Classe y s'a; y'étha d's officiers èspais coumme grille, et tchès qui sait - enfin - comprends tu?"

 

Piteur fut ouillinne - même qu'i m'dounni deux shlings pour accaté eunne èscharpe en mouslinne bliue pour amathé atouôre de la taille a Lonôre.

 

Nos v'là don, toutes les deux, dans toutes nos attifaiches, siez l'Gouverneux d'Jerri, parmi toute la Noblièche. Les siens d'vous qui n'taient pon au Show en ont oui pâslé, sans doute, et que j'y étaimes! Tout l'monde se dèstouonait quand j'passaimes; Lonôre a très pas l'avant a mé, ov san parasol l'vé haut pour ne pon muchi san chapé, sa robe qu'ou laissait traîné sus l'gravi tout du long, coumme tchi dithait "Y'a des sous pour en acaté d'autre": s'n èscharpe qui croch'tait dans les branques d'arbuste; ses haut talons qui faisaient des creux dans l'herbe du "lawn." Jusqu'a un photographe muchi driethe eune touffe de feugiethe a prendre not' portrait "on the sly." Y'eut même un offici, ov un long sabre, qui s'en vint pâslé a Lonôre. Ch'est absolument coumme j'vos l'dit! Sans doute, ch'qu'i' lis dit fut seulement: "Keep off the grass!" Mais v'la tchi fut dit d'eunne si nice moniethe, avec un tet "smile," et il avait d'si belles moustaches! J'en avons r'pâslé bin des fais d'pis, entre mé et ma fille.

 

Et pis nou s'proummi partout. Dans les gardins, parmi l's allées, a l'entou d'la musique; et partout nou s'dèstouonait a admithé Lonôre. Y'en eut même qui s'mintes a nos siethe partout ou-ès qu'j'allaimes; d'autres, des jeunes officiers, qui nos rattrapaient, nos passaient, et pis s'en r'venaient sus lus pas pour avé ocquo eunne autre chance d'admithé ma fille. Y'en avait même qui souffliait la feummée d'lus cigarette souos san chapé (v'la tchi veur dithe, en language de soudard, "J'voudrais vos pâslé.") et, driethe mé, j'en entendi yun dithe a san camarade, en lis montrant Lonôre: "Dem fine fat gurl; ooos she?" Sus tchi je m'dèstounôni a lis dounné yunne des cartes-de-visite a m'n'houmme:

 

Piteur Pain, Gent.

"Evening Post."

 

Mais la ou-ès qu'j'eut la miyeu preuve que Lonôre n'est pas la preumié v'nue, coumme y'a des jaloux qui vos l'dithaient, ch'fut souos la tente ès roses. Quand j'entrîmes y'avait un fliotchet d'monde atrouplé atouôre d'eunne rose, eune belle rouoge rose, mème couleu qu'la fache a Lonôre sinon un mio pus rouoge si ch'tait par la. "La pus belle rose du Show," que l'monde s'ent' disait. Et, m'créthous? Quand j'pûmes apprechi, l'nom d'chutte belle rouoge rose la, ch'tait: "LeonPain"!

Leon Pain! ch'est a dithe, Eleonore Pain! la pus belle flieur siez l'Gouverneux! Ah, ha!

 

Je r'passîmes souvent dans l's envithons, et toutes les fais, pour que les gens sussent, j'disais tout haut: "Lonôre! Allons admithé la rose qu'est noummée coumme té," et j'faisais des ptits saluts et des "how-di-doo" d'la tête a drouette et a gauche, et tout l'monde nos siézait pour vaie chutte flieur qu'avait yeu l'hounneu d'être noummée après Miss Pain, la fille a Piteur et Laïzé Pain, autfais d'la Fosse-ès-Cabots, a ch't'heu du "Post," et ch'est là qu'faut èscrithe pour en savé pus long sus la d'mouêzelle qu'a prêté san nom a eunne rose qu'a gagnyi l'preumié prix.

 

Missis Laïzé Pain

The Jersey Weekly Post 1/7/1916