La D'mouaîselle du Sellot - The Lady of Shalott

Eune vèrsion Jèrriaise dé The Lady of Shalott:
Tennyson's The Lady of Shalott in Jèrriais:

La D'mouaîselle du Sellot

The Lady of Shalott

Partie I

Ev'là, ès deux bords du russé,

y'a des longs camps dé seigl'ye et d'blié,

d'la pliatchiéthe au ciel êtrav'lés;

et par lé clios mène un c'minnet

ès tours et touothelles dé Canm'lot.

Tchi va-et-veint! Y'a-t-i' d'l'âll'lie!

Né v'là tchi craîssent tout l'tou des lis,

tout l'tou d'un îlet y pliaichi -

ch'est l'îlet du Sellot.

Des trembl'yes lus craînchent, des saux lithent bliancs,

des louêmes sont cachies par des vents

tchi ventent tréjous avaû l'couothant

tchi couort l'tou d'l'îlet au mitan

du russé tchi coule à Canm'lot;

et quat' grises tours, quat' grises muthâles,

mâtées où'est qu'des flieurs lus dêhalent

lé tou d'l'îlet où'est qu'dgéthet n'pâle

d'la D'mouaîselle du Sellot.

Abriés d'saux au bord dé l'ieau,

fliottent bein b'samment des longs batchieaux,

halés bein douochement par des j'vaux.

Nou n'èrmèrque dgéthe qu'nou vaile avaû

quédaine avaû-l'ieau à Canm'lot;

Mais tchi qui l'a veu faithe sîngna,

l'a veu mâté à sa f'nêt' là?

Est-alle connue entout, assa,

la D'mouaîselle du Sellot?

Raîque des avouôteurs en avoût,

tch'avouôtent lé blié tout à l'entou,

ouaient l'écho d'au liain du chant doux

tchi d'vale tchoeuthuement d'amont l'dou,

vithant cliaithement ès tours d'Canm'lot.

Lé dgèrbeux lâssé au cliai d'leune,

en travas ès dgèrbes qu'il arreune,

dit, "Eune faîtelle, oulle en est ieune,

chutte D'mouaîselle du Sellot."

Partie II

Là-haut ou trélîngue niet' et jeu

eune taile magique toute plieine d'couleu;

oulle a ouï qu'nou prédit malheu

s'ou aheuqu'te raîque eune pause en l'heu

pouor êpier là-bas d'vièrs Canm'lot.

Ou n'sait pon tch'est qu'est l'chorchéthon

tchi la fait trélîndgi au long,

et d'aut' dêm'nîn ou n'en a pon,

la D'mouaîselle du Sellot.

Èrfliéchi dans un mitheux cliai

l'avant à lyi à londgeu d'mais,

lé monde en ombres li'appathaît,

et là-d'dans ch'est chu c'mîn qu'ou vait

tch'en drédil'ye ava à Canm'lot;

et les couothants dg'ieau y moulinnent,

des valets, vaîthîns et vaîthinnes,

auve des sèrvantes en rouoges cap'linnes

pâssent du bord du Sellot.

Tchiquefais eune dgaîngue dé garces apèrtes,

bigathées êcarlates et vèrtes,

un abbé à j'va dé grôsse dgèrte,

ou un valet à crîngne dêcouèrte

lus arroutent ava à Canm'lot;

tchiquefais l'travèrs du bliu mitheux,

les c'valièrs trottinnent deux par deux.

Ou n'a pon d'c'valyi amouotheux,

qu'la D'mouaîselle du Sellot.

Mais acouo à sa taile achteu

à graie chein qu'y'avait dans l'mitheux;

souvent, ès heuthes d'vant sinne dé jeu,

un entèrrement à plieunmes et veues

et musique, allait à Canm'lot:

ou quand la leune grîmpait la niet,

douoches et galants v'naient mathiés;

ou s'faîthait, "D's ombres, j'sis êtchoeuthée..."

qu'la D'mouaîselle du Sellot.

Partie III

À portée d'la f'nêt' d'san châté,

il allait par les dgèrbes dé blié;

par les fielles, êgaluait l'solé

tchi trélûthait sus l'fa tchuivré

qu'i' portait, chu brave Sire Lanchelot.

Un c'valyi à rouoge crouaix à g'nouors

auve eune danme sus s'n êtchu d'amors

tchi lithait dans l'jaune clios du bord

d'l'île bârrée du Sellot.

Auve la bijout'tie d'san bridot

et la sonn'nie d'cliochettes au trot,

coumme eune ramée d'êtailes à fliot,

eune galaxie grée d'or ès cros,

i' trottait ava à Canm'lot.

Il en avait eune bodoliéthe,

auve sa bioug'se en argent driéthe,

et toutes ses armes sonnaient bein cliaithes

au ras d'l'île du Sellot.

Lé ciel 'tait bliu, i' faîthait bé,

lé tchui d'sa graie 'tait dgiamenté,

san helme auve la plieunme au copé

brûlaient ensembl'ye en eune fliaûmée,

coumme i' trottinnait à Canm'lot.

Coumme souvent par eune niet d'violette,

par-d'ssous les fliotchets d'êtailettes,

touîndgie d'sa riche traiche, eune conmète

s'traîne par-d'ssus du Sellot.

Lé solé lithait sus san front,

sus les chabots dé s'n êtalon,

hors san helme, corlaient ses g'veux longs,

crîngnis, et nièrs coumme du tchèrbon,

coumme i' chabolait à Canm'lot.

Du bord du russé, en êcliat

i' géthit dans l'mitheux d'crista;

i' chantûthait d's êcalifias,

qu'i' chantait, l'Sire Lanchelot.

Ou laîssit sa taile, san mêtchi;

lé travèrs dé s'n aître engambit;

oulle êpyit l'lis dg'ieau à flieuthi;

oulle êpyit l'helme ensolilyi;

ou r'gardit ava à Canm'lot.

La taile s'êtrilyit, fliottit hors;

lé mitheux cratchit d'bord en bord;

ou briyit, "Ah lé v'chîn, man sort,"

qu'la D'mouaîselle du Sellot.

Partie IV

Dé l'Êst volait eune ventâl'lie,

les jaunes bouaîs'sies 'taient affouaiblyies,

l'russé chèrgi 'tait êlaîsi,

du bas ciel, i' tchiyait d'la plyie

b'samment sus les tours dé Canm'lot.

Ou d'valit, trouvit un baté

lâtchi souos un saux à fliotter,

et êcrivit chennechîn sus l'nez:

La D'mouaîselle du Sellot.

Et avaû-l'ieau du nièr russé,

d'ité coumme un tchéthaûd trans'mé

tch'y vait l'haînu d'sa destinnée,

oulle avait la minne êbliavée

en r'gardant ava à Canm'lot.

À la tchête du jeu, d'eune blianche main

ou d'samathit, s'couochit au drein;

et l'russé l'êlouongnit au liain,

la D'mouaîselle du Sellot.

Êtrav'lée à bord, habilyie

en blianc coumme d'la né abantchie -

les fielles tchiyaient douochement sus lyi -

pâssant la niet du bord d'ses brits,

ou fliottait ava à Canm'lot:

coumme san baté filait s'n avant

par saux et clios, par vaux et camps,

nou l'ouïyait chanter san drein chant,

la D'mouaîselle du Sellot.

Ouïyait san saint cantique d'èrtas

qu'ou chantait haut, qu'ou chantait bas,

entréchîn qu'ou pâssîsse lé pas,

ses ièrs dêteints à l'êtoupas

dgettant les touothelles dé Canm'lot;

car d'vant d'pouver aveindre lé lis

d'la preunmié caûminne y bâtie,

chantant sa chanson, ou mouothit,

la D'mouaîs'elle du Sellot.

Pâssant des touothelles et balcons,

par muthâles, gal'lies et becqu'tons,

ou fliottait, coumme un leunmîngnon,

morte et pale parmi les maîsons,

arrivant sans brit à Canm'lot.

I' lus dêhalaient sus les tchais:

seigneurs et danmes, c'valièrs, bourgeais;

san nom sus lé d'vant, i' liêthaient:

La D'mouaîselle du Sellot.

Tchi qu'ch'tait? Et tch'est qu'i' y'avait ieu?

Et dans l'palais êcliaithi d'veues

fut teu tout brit rouoya d'bonheu,

et i' lus crouaîsaient touos ieux d'peux,

les c'valièrs dé Canm'lot.

Mais Lanchelot eune pause reunminnit,

"Oulle a eune belle fache," qu'i' r'mèrtchit.

"Qu'lé Bouôn Dgieu prenge au Paradis

la D'mouaîselle du Sellot."

Tennyson

vèrsion Jèrriaise dé Geraint Jennings 2017