Lé Cantique du Pommyi

Lé Cantique du Pommyi

Dans l'gardîn y'a un pommyi;
dé tchi j'tchilyons les frits.
Mathie nos donnit un fis;
san nom est Jésû Chri.

Dans l'gardîn y'a un pommyi;
san frit est dans l'preinseu.
Mathie nos donnit un fis;
tch'est not' chièr p'tit Saûveux.

Dans l'gardîn y'a un pommyi;
bév'tonnons un lèrmîn.
Mathie nos donnit un fis;
tchi touônnit l'ieau en vîn.

Dans l'gardîn y'a un pommyi;
lé mar est êglianmi.
Mathie nos donnit un fis;
et pouor nous i' sangnit.

Dans l'gardîn y'a un pommyi;
san cidre a du pitchet.
Mathie nos donnit un fis;
pouor qu'san sang fûsse vèrsé.

Dans l'gardîn y'a un pommyi;
lé pus bé d'touos les bouais.
Mathie nos donnit un fis;
qu'nou cliouit à la crouaix.

Dans l'gardîn y'a un pommyi;
san frit est bouôn et bé.
Mathie nos donnit un fis;
tchi des morts fut souôl'vé.

Dans l'gardîn y'a un pommyi;
dé tchi l'doux cidre nou bait.
Mathie nos donnit un fis;
tch'est not' Seigneu et Rouai.

Dans l'gardîn y'a un pommyi;
à Noué ses branques sont nues.
Mathie nos donnit un fis;
tchi fait flieuthi l'salut.

Dans l'gardîn y'a un pommyi;
vèrsons-lî eune vèrrée.
Mathie nos donnit un fis;
j'vos souhaitons un Bouôn Noué.