Hommage à 'George d'La Forge'

 Hommage à 'George d'La Forge'

 

 

L'Assembliée d'Jèrriais a voulu faithe hommage à Moussieu George F. Lé Feuvre (“George d'La Forge”), dévant san r'tou au Nouvieau Monde au mais d'octobre. Ayant 'té l'preunmié ségrétaithe à sa fondâtion en 1951, il a tant fait pouor L'Assembliée avaû l's années d'pis, mais sustout comme contributeur au Bulletîn d'Quart d'An et en întèrprétant un cantique en Jèrriais pouor lé Sèrvice Annuel touos l's ans, et cèrtains membres avaient décidé tch'il 'tait temps d'mouontrer un mio d'èrconnaissance à propos envèrs li. Et don, à la rêunion mensuelle dans la Salle Pârouaissiale dé St. Jean, lé sé du 22 d'août, la Dlle. Ruth Anmîn, la ségrétaithe, liut eune vîngtaine dé vèrsets tch'avaient 'té composês à l'exprès. Enfîn, lé Sieur Lé Feuvre, tchi fut bein surprîns, èrchut les grands appliaudissements dé la chentaine dé membres présents.

 

Dans les difféthentes pliaiches tch'i' vit

I' s'otchupe tréjous d'san Jèrri,

Même quand il êcrit en Angliais

Sa pensée est toute en Jèrriais.

 

Raide bouon êcolyi toute sa vie,

I' tcheint sa propre philosophie;

J'en avons tous lé bénéfice

Dans ses articl'yes propices.

 

Év'chîn un fis du fond d'St. Ouën

I' nouos l'a dit - c'menchit auve rein;

Rachinne et volanté 'taient là,

La fouai, l'travas - et pis né v'là!

 

I' n'dit janmais des choses améthes

San caractéthe est si sîncéthe;

Homme d'èrligion et d'crainte dé Dieu,

Charité en tout est s'n aveu.

 

Il a mémouaithe tchi nos êtonne,

Faits oubliés i' nouos les donne

Et des choses d'aniet i' n'manque rein;

Un bouôn chèrvé - i' s'en sèrt bein.

 

I' connaît bein des pèrsonnages

D'aniet, dé hièr, dé touos les âges

Qu'ont fait lus c'mîn manniéthe ou aut'

Resté pauvres ou remplyi lus pautes.

 

Vrai Jèrriais "péripatétique",

Êcrit d'touos les coins d'l'Améthique;

Un riche vocabulaithe, amouotheux d'mots,

I' porte lé dictionnaithe Le Maistre sus l'dos!

 

La gâzette a la chance d'aver

Tchiqu'un si sage qu'êcrit si cliai;

Liêsant, chonna pathaît aîsi

Mais pour l'êcrithe faut travailli.

 

Janmais n'pathaît mantchi d'idées,

Avaû l's années i' n'n'a eune suée;

J'connaîssons bein les choses tchi lî pliaîsent

Et les siennes tchi crait sont des foutaises.

 

Châque articl'ye est vrai travas d'art,

Bein composée, bein d's heuthes dé sa part;

Lé sien qu'êcrit janmais n's'ennyie,

I' jouit tréjous d'l'esprit d'la vie.

 

I' n'est pas contre les choses modèrnes

(Améthitchain n'est pas babaine!)

Abandonner chein qu'est ancien -

Est-che vraiement pour lé piéthe ou l'bein?

 

I' dgette not' p'tite vie politique,

Vait grand méthite dans choses antiques;

Pour li, tradition est d'tchi bouon

Pourvu qu'lé publyi n'enhanne pon.

 

I' veurt garder la pliaiche d'la pâraisse

Y dêmontrer sa valeu sans cêsse;

Ch'est qu'lé Jèrriais sé trouve siez li

Auve Connêtabl'ye, Chent'nyi, Vîngt'nyi.

 

Lé type Jèrriais i' comprend bein,

Tréjous raide bouôn diton d'amain.

Êcrit auve forche, sîmplyicité -

Nou lié et lié sans janmais s'enn'yer.

 

Il a êcrit pièches dramatiques,

A traduit psaumes, vèrsets, cantiques;

Êcrit deux livres, lé seul l'ayant fait,

Tout en Jèrriais dé haute qualité.

 

Év'chîn un homme dé grand' distinction,

D'la liste d'Jèrriais d'érudition -

Mathet, Langliais, Mouothant, Lé Gros,

Le Maistre, Douothey, Luce et Picot.

 

Nou s'rappelle bein qu'en chînquante-deux

Fut parmi Jèrriais qui 'taient seux

Qu'eune Assembliée 'tait nécessaithe -

Ch'tait li lé prunmyi ségrétaithe.

 

Touos ses anmîns ont longtemps pensé

D'lî faithe honneu - pas d'main - aniet

Et dé dithe, ichîn, dans L'Assembliée

Combein j'l'admithons comme bouôn Jèrriais!