Futile Attempts to Live Up to their Income
"All hands sus l'pont! que j'dit a nos gens le lendemain après dèsjeuné; et, tant qu'a faithe, Samuel n'étha qu'a nos dounné un coup-d'main. J'avons a trouvé moyen de dèspensé quat' mille louis par jour."
"Man doux seigneur! s'fit Laïzé en l'vant les bras en haut: ch'que j'craignais est arrivé! Le monde et ses atraits, a touoné la tête a tan pouore péthe, qu'ou dit a Lonore en la prennant dans ses bras: et ou s'mint vite a fiélté sa Bibye pour trouvé tchiq' vérsét pour me calmé.
"Ch'n'est qu'eune supposition, que j'dit bin vite d'vant qu'ou n'eusse le temps de s'met' a liéthe: ch'est l'Editeu qui m'a c'mandé d'vos consulté la d'sus pour vaie coument qu'j'en r'path'ons" - et j'lus éxplyitchi ch'qu'en 'tait.
Quand tous eutes eunne fielle de papi et un crayon, nous s'assit atouore la tabye, et j'lus explyitchi l's'ordres du Chef. Trouvé moyen d'dèspensé quat' mille louis par jour, Dinmanche et sus s'maine, plieuve ou vents, touos les jours de l'année sans en mantchi un seul!
Je c'mench'ons, que j'dit, par avé d's hytres touos les matins pour dèsjeuné; un gobin - un gros gobin - d'boeu pour diné, ov du podin tous les jours - tu'entends, Laizé? - du podin touos les jours, et i' faudra des mervelles et deux sortes d'gache au tée. J'm'en vais m'met' a feummé des cigares de quat' sous; et soigne qu'y'ai trejous eunne boutelle de tchiq'chose sus l'drécheux.
"J'pouorai ti allé eunne fais la s'maine ès pictures, pépée?" s'fit Lonore. Oui, oui, m'n'èsfant, que j'responds: et je n'sais pas ravi qu'nou pouorait affordé a t'dounné un neu chapé offuche touos les mais! Ou m'embrachi la d'sus.
Laizé pretendait qu'oul avait veu d'bieaux longs ridjeaux siez Vibert et Burnham, la neuve boutique dans la rue d'Driéthe, et qu'je s'ait pas un ma d'en c'mandé très ou quat' pathes si n'taient pon trop chiers. L'tapis des d'grès, étout, c'menchait a montré la tremme - nous îthait a eunne vendue. "Y'a étou les Collectes; qu'ou dit en me r'gardant par en d'sous: j'puorais p'têtre augmenté mes contricutions. Et j'pouoraîmes faithe servi du tée a deux sh'lings?"
Samuel - ch'est un malin pendard - nos èscoutait sans dithe mot; mais je l'viyais ritounné en chuchant l'bu d'san crayon. "Tchi d'jantre te fait ritounné? éspêce de buzard," que j'dit.
"J'ritounne, qui dit, a vos oué pâslé. Au compte qu'ous allez, ou n'dèspens'ez seul'ment quat' mille louis par an - sans pâslé d'par jour!"
"Gas déouelle! tout d'même, que j'dit: tchès qu'ch'est que d'savé chiffré! R'quemenchons!"
Chantchun s'mint a travaillui d'san coté, en mértchant bas sus san papi; et quand j'eumes fini, ne v'chin a bin près l'résulta.
Lonore. - Des fros en souée ov hardi d'ribans: allé a touos les tées et distributions d'Prix de toutes les Chapelles: eune montre en or: tout plien d'chucrins: des gants d'kid pour le Dinmanche: un chucri en argent pour quand l'Pasteur vindra béthe-du-tée: allé tchiq' fais en extchursion a Dinard: allé l'arlevée mangi d'la patich'ie dans les tea rooms a Orviss: s'faithe photograffé souos un rosi en flieurs.
Mé. - Du vin pour touos les r'pas: allé tout seu à Paris vaie par mé même si ch'est eunne ville de per-êdition, coumme nou dit: diné souvent siez Trémel: être offici dans la Milice: joindre le Clob a tchans pour poué alé au bantchet: des c'minzes emp'zées touos les jours: allé d'meuthé tchinze jours dans man vier hant d'la Haute Crouex pour èsgallué mes viers vaisins: du café après diné.
Laizé. - Du neu meubye dans la bouonne chambre: augmenté sa souscription pour les "Fallen Sisters": accaté un enorme troussé pour Lonore: souscrithe a tchiq' gazette pieuse: un neu bonnet si y'avait moyen - l'main est couleu d'roui: eune neuve rouolette a pate: met' un èstchu a toutes les collectes par les bancs: allé tchiq' fais en 'bus vaie nos gens a la campanne.
Quand j'montrîmes not' travas a Sam, i' s'èsgouffi a rithe! "Ou n'en appréchis seulment pas d'un bouan bu," qui dit. R'quémenchis! Et fliantchis mé vos sou a banchie - ou n'en verrez jommais l'bu.
"Semnâge! que j'fit: j'aithaimes don pus d'moyens qu'Moussieu d'Saint Ou! R'esprouvons! Et tâchis d'faithe mus! que j'dit ès femmes. Quand nous a quat' mille louis de r'venu par jour, nou peut gazouollyi un mio. Faut s'mé a grande vollée - nou n'erverra jommais la coue!"
Mais v'la qu'Laizé - en attendant chu neu meubye de bouanne chambre - voulu s'n'allé faithe san bernage dans la tchuizinne: Sam avait a s'n'allé met' de l'encre dans l'encri a l'editeu: mé, j'tais attendu pour me faithe hallé eunne dent dans la forge a Vouezin; et Lonore avait a r'touoné san bliu fro qu'ou met l'matin. La suite au prochain numétho, coumme no dit.
Lonore pâsle d'accaté eunne p'tite carosse en ozi ov eunne âne, pour allé s'proumné sus la cauchie vaie les batieaux arrivé.
Morning News 14/2/1914
No comments:
Post a Comment