Un but d'la Bibl'ye - Bible snippet

Aniet ch'est la Fête d'la Transfidguthâtion. Et né v'chîn un but d'la Bouonne Nouvelle s'lon Mar, chapitre 9, vèrsets 2-9:

 

Today is the feast of the Transfiguration. And here's text from the Gospel according to Mark:

 

Jèrriais · La Bouonne Nouvelle s'lon Mar: Chapitre 9, vèrsets 2-9

 

La Bouonne Nouvelle s'lon Mar: Chapitre 9, vèrsets 2-9

 

Siêx jours pus tard Jésû emm'nit acanté li l'Rotchi et Jînmîn et Jean et les m'nit amont eune haute montangne cârrée, à lus tout seu, Et i' vînt transfidguthé l'avant à ieux, et ses habits vîndrent blianchis à êgaluer, dé sorte qué fis d'âme sus la tèrre né pûssent les blianchi. Et v'là tch'appathûdrent à ieux Élie acanté Moïse, tchi 'taient à pâler auve Jésû. Épis l'Rotchi dit à Jésû, "Maît', ch'est bein qué j'sommes ichîn, faîthons trais d'meuthes, ieune pouor té, ieune pouor Moïse, et ieune pouor Élie." I' n'savait pon tchi dithe, ch'est en tchi i' 'taient êpeûthés. Épis un nouage vînt l's ombrer, et dé d'dans l'nouage eune vouaix prêchit, "Ch'tî-chîn est man Fis, l'Bein-Aimé; êcoutez-lé!" Et d'un co quand i' r'gardîdrent à l'entou dg'ieux, i' n'viyaient d'aut' pèrsonne acanté ieux sénon Jésû. Comme i' d'valaient la montangne, i' lus c'mandit dé n'rein dithe à fis d'âme entouor chein qu'il' avaient veu, d'vant qu'lé Fis d'l'Homme sait souôl'vé des morts.

Legend of old Grouville windmill and the devil's tithe

Jèrriais · Lé Moulîn d'Vèrcliut (eune légende)

 

Lé Moulîn d'Vèrcliut

ou L'Vièr Moulîn d'Grouville

Par Geo. W. Bertram

Légende racontée par les anciens d'la fanmil'ye Bertram, d'La Rocque (texte dans Lé Bulletîn d'Quart d'An dé L'Assembliée d'Jèrriais, Vol. 3, Nos. 1 et 2, 1965; liu par Geraint Jennings 2021)

 

Dépis bein des siècl'yes les dgiêmes ont 'té levées auve forche dé louai sus l's habitants d'châque pâraisse. Eune dgiême, aut'fais payabl'ye en espèces, était deue qué ch'fûsse au bénéfice dé la Couronne ou au bénéfice ecclésiastique.

Les fèrmièrs dévaient des dgiêmes, les monnièrs, etc. Touos les Minnistres d'pâraisses èrchévaient don lus part dé dgiêmes. Mais i' pathaît, d'après eune légende, qu'un cèrtain Moulîn d'vait des dgiêmes pas à l'églyise, mais au Dgiâtre li-même. Ch'la ch'tait bein èrmèrquabl'ye, mais pèrsonne n'en savait la raison ni l'originne.