1910: "La s'maine passèe, j'r'venais de faithe unne p'tite touannèe dans la Cohue"

 Eune articl'ye du Caouain (dans La Chronique de Jersey 5/3/1910)

 

 La s'maine passèe, j'r'venais de faithe unne p'tite touannèe dans la Cohue et j'mé muchi dans un creux souos les pids de King George pour yaidgi à l'y cauffer l'ortés et l'dèslâssé un miot, car dépis tchique temps le pouor balloc est obligie de se t'nin sus un pid et pour qui s'en âlle pas dans le biau bâtisse de Broad Street, ils l'on amathé.

J't'ais là depis l'moment quand un houmme s'en vint avec un èstchèlle et unne bringe. De peux d'êtes collé avec les posters iou qu'est écrit "l'ami du peuple," bein vite j'm'èscapi et j'men fut tout drait me muchi dans ma niche à la gâzette, au haut du vièr marchi, mais pas iou qu'unne sardine est à conté un tas de menties et de sornettes jusqu'au temps qu'ou s'sait happèe par un maquereau.

Y-avait tchique temps que j'tais là quand je vit sortir du Halkett deux ou trais messieurs que je connais bein. Iun d'ieux dis : T'en vas tu allé au meeting siéz Mac à ces sé.

Bein vite, me v'là hors de ma niche et j'men fut sièz Mac, iou que j'me muchi dans l'creux du portico.

Quand vint la niét, j'tais tout l'temps à man poste quand j'ententendit unne vouais qui disait tchique chose coumme : J'veur la justice, et v'là qu'est tout, j'nai pas besoin de vot'e aide.

La croisée du meeting room étant ouverte, vite j'vais me muchi souos la tablle.

Tchi bad luck, garçons, j'fut quasiment ècrasé.

Un mousieu meins ses pids sus iunne de mes plieumes. J'criyais que ch'tait le steam roller tellement que ses souyés taient grands, mais j'vit qu'il avait des cauches et que ieunne avait, couomme nou dit, unne patate au but.

Une fais que tout le monde fut arivé et que le major ieu pris place dans le fauteuil, ils se mirent à d'vizer.

D'après chein que je pouvais en comprendre, la tchestion était de s'avai si eunne vaque de six ans et eun mais pouvait être eune vaque de sept ans !! Oui, y en a qui disait que chutte vaque-là ne pouvait pas entrer dans la classe de trais à six ans.

Un chantegni disait que lorsque son fis passi ses examens pour le "civil service" il avait vingt ans et tchique mais, et y fut bein accepté, quoique le "civil" était qu'il fallait qui passe de 16 à 20 ans. Il dit étout que ce qui avait été fait était correct, et il proposa de passé outre et de ne pas accepter le protêt.

Un mousieu qui d'visait en angliais pasly de discrétion au sujet de chutte proposition et s'mit à dize que la lettre de Chas. n'était pas iun protêt.

Joe fit tchique ermerques et ne v'la que le grand John s'mit a dire : C'est pas parce que vous êtes - que vous allez nous traiter comme des èsfants qui vont à l'école. J'pense que c'est à peu près chunna qui lus dit, car il y en avait tant qui d'visaient et qui étaient excités, que, ma fé, j'pouvais pas bein entendre chein qui fut dit.

Un aoutre se lève – j'pense que ch'est l'sien tchi fit la proposition – et i' lûs dis : Tout chounna n'est pas eunne tchestion de savé tchi qu'est dans l'drouèt ou dans l'tort. Nan, ch'est eunne tchestion de jalousie et de spite.

Chein qui m'a l'pus surprins, ch'est que Charles n'tait pas au meeting, car j'eut biau ergardé, je'n le vit pas.

Toute chutte histouèthe n'est pas occouo fini et j'pense qu'i s'en va y'avé un aoutre meeting la s'mainne tchi vein, à meins qu'nou mette le tout sus l'shelf ou le louogi au greffe.

Frainque se comportit coumme un homme : aussin, j'pense bein que Joe l'î d'mand'a occouo une feîs d'avé eunne gomme de cartes ov' li.

A bétôt.

Caouain

5/3/1910