1972: D'èrtou en Améthique

 D'èrtou en Améthique

  

Ottawa, Ontario,

Canada.

 

Lé 4 novembre, 1972.

 

Moussieu l'Rédacteu,

 

L's Améthitchains tch'ont marchi sus la Leune peuvent dithe tch'il' ont vrainment 'té dans un aut' monde. Si j'tais janne assez, j'éthais sans doute l'ambition d'y marchi étout, mais à m'n âge i' faut m'contenter d'êt', pour lé moment, dans l'Nouvieau Monde auprès aver passé les mais d'l'êté dans l'Vièr Monde... j'allais quâsi dithe lé Vièr Monde dé Jèrri, mais l'Île n'a pus la vie trantchile dé san vièr temps, ouaithe qué, grâce à la têtouangnîse des St. Ouenais tch'ont pèrsisté à r'fûser d'pèrmett' l'invâsion des Landes par l'ambition des champions touristiques, j'peux ocouo profiter d'un mio d'la trantchilité du Vièr Monde au Ménage ès Feuvres quand j'y d'meuthe. Ch'est quand mème vrai qu'la baithie tchi fait la richesse des aubèrges amène la disteurbe pour eune volée auprès onze heuthes au sé viyant qué l's êbédiés d'bouaisson, tchi d'meuthent par amont, pâssent par lé Ménage en moto et à pid. I' cachent lus motos comme des fos et abattent fossés et muthâles, et les cheins tchi sont à pid chantent à tue-tête comme des ânes.

 

Nou sait bein tch'i' sont cauds d'baithe, ches pouores achocres, et i' vouos font penser à la junment à Rabot tch'avalit san poulain et tchi riait d'sa bêtise. Mais nou-s-est dans l'Paradis compathés ès pouorres villais, car j'pouvons penser au vier diton “Auprès grand vent, grand calme!” eune fais qu' ches habitués d'dgèrgotes-là sont passés et qu' nou peut dormi en r'pos, mais les villais en souffrent pus longtemps qu' nou viyant tch'i' sont entouothès d'cabathets et qué l's êbédés veinnent dé touos les côtés.

 

Man viage en l'air pour l'Améthique par l'avion Pan American fut accomplyi acouo eune fais sans avârie. Ch'est si r'mèrquabl'ye qué tant d'pèrsonnes sont transportées par avions tchi volent à pus d'trente mille pids en d'ssus d'l'Atlantique en seûtheté niet et jour qué ch'est seux qué L'Bouan Dgieu y met la main. V'la tchi m'fait penser ès mots du onzieme vèrset du nénant'tch-ieunième Psaume, tchi nouos disent : “Car Il donnera charge de toi à Ses Anges afin qu'ils te gardent en toutes les voies!”

 

Comme i' pathaît s'arriver touos l's ans, j'ai ieu à tchitter l'Île sans aller dithe “À la préchaine” à un tas d'anmîns. Ch'est tréjous d'mème. Nou-s-a trop à faithe à la dreine minnute. Et pis nou s'fait dans l'idée d'aller vaie chînq ou siex anmîns, mais nou pâsse trop d'temps siez les preunmièrs et nou finnit par en visiter trais à la pliaiche dé six. Enfîn, j'espéthe d'êt' pardonné par les cheins qu' j'ai mantchi d'aller vaie. Ch'n'est pon manque dé penser en ieux. J'ai d'si bouans anmîns partoute l'Île, et j'lus sis bein èrconnaîssant pour la beinv'nue tch'i' m'donnent tréjous en arrivant, et pour l'hospitalité si fanmeusement Jèrriaise tch'i' m'accordent quand j'sis-là. Ch'est les bouans anmîns tchi font la vie valer la peine dé vivre.

 

Au moment d'tchitter l'Île, j'ai ieu l'pliaîsi d'vaie qu' les lecteurs dé la gâzette né m'oublient pon dans la colonne des êcrivains d'lettres au Rédacteu. Madanme du Dû Banc, bouanne et belle Êcossaise qu'oulle est, m'appelait à l'ordre pour l'aver prînse pour eune Angliaîche. Mes apologies à la chiéthe danme! Mais san nom m'pathaissait Angliais, et san d'vis s'fait sans l'rouôlement d'ses r, et jé n'l'ai janmais veue fardés dans touos les falbalas qué nou vait sus les soudards à cotillons d'san pays natal. Habilyie d'mème, ou s'sait l'admithâtion d'touos les membres d's Êtats s'oulle 'tait membre d'La Chambre, et j'sis acouo d'avis qu' ou f'thait un bouan Député ou Sénateu!

 

J'sis r'connaissant au Sieur Leonard Turcotte, dé Ste. Foy à Tchubec, pour ses complyîments dans sa lettre du 19 octobre. J'ai conneu et visité pèrsonnellement les mêssieux tch'i' mentionne comme étant un nombre tchi s'en fûdrent à La Côte. John Le Masuthi et Stanley Hotton 'taient à Grande Grève. Lé Sieur Le Masuthi 'tait l'oncl'ye à man vaîsîn, Mait' Percy L'Masuthi d'La Pointe à St. Ou. Sa maison à Grande Grève dominnait l'vaîsînné comme un mangni, et il 'tait dîngne d'en êt' lé Seigneur. J'tions clèrcots dans Hill Street en Jèrri en mème temps, Stanley Hotton et mé. À La Riviéthe ès R'nards, j'ai gouôté et profité d'l'hospitalité d'Cyril Le Garignon et d'san bieau-fréthe Kennedy, et, sans doute, j'connais l'fréthe Jack Le Garignon en Jèrri étout. J'eus l'pliaîsi d'vaie Walter L'Tchêne l'année d'vant san décès. J'connaîssais l'Sieur Sam de la Haye étout. Lé Sieur Lewis Gibaut est ocouo pliein d'vie à St. Jean, en Jèrri, et a nommé sa d'meuthe Chlorydormes.

 

V'la tch'i' s'sa p't êt' d'intéthêt au Sieur Leonard Turcotte dé ouï tch'i' y'a au mains huit pèrsonnes du nom d'Turcotte dans l'directouaithe du téléphone à Detroit, Michigan, eune ville tch'était otchupée par des Français-Canadgiens dans ses p'tits jours!

 

George d'La Forge.