1967: Historique

 Historique

 

Le Ménage ès Feuvres,

St. Ouën,

Lé 28 d'Octobre, 1967.

 

Moussieu l'Rédacteu,

 

Quand j'tais mousse j'ai souvent ouï Papa (et tchiquefais Manman étout) dithe: “Il a tréjous l'nez fouôrré dans les livres, chu mousse-là!” Eh bein, i' faut avouer qué ch'tait vrai. J'm'èrsouveins qué quand jé c'menchis à aller à l'êcole siez Miss Mabel Maugi, près d'l'églyise dé St George, à l'âge dé sept ans, j'n'appranais pon grand'chose sénon la lectuthe. Pour mé, ch'fut eune aventuthe tchi m'portit en esprit partout l'monde, la lectuthe, car j'liêsais n'împorte tchi - autcheun mio d'papi tch'avait d'l'înmprînmethie d'ssus. Iun des livres amain 'tait La Sainte Bibl'ye, et comme i' s'adonnit qué la preunmié fais qu'j'en trouvis ieune j'l'ouvris à la page tchi donnait un accompte dé la cruxifixion dé Notre Seigneur, v'la tch'i' m'fit eune împression qué j'n'ai janmais oublyiyée. Toute chutte lectuthe 'tait en Angliais, et comme j'n'avais pon connu autcheune aut' langue qué l'Jèrriais jusqu'a chu temps-la, jé n'savais pon comment prononcer la grand'partie des mots qué j'tais à liéthe, et j'les prononçais phonétiquement. Trais ans pus tard, quand j'allis à l'Êcole Wesleyenne au Haut du Mathais, i' trouvîdrent qué jé n'savais pon grand'chose, mais quand i'm'êprouvîdrent à liéthe, jé l's êtonnis tous vivant qué j'liêsais couothamment touos les livres tch'i' m'ttaient d'vant mé - mème les chiens d'la septième classe. Mais jé n'savais pon pour tch'est tch'il' 'tait touos à rithe dé m'ouï : Ch'tait ma prononciation d'l'Angliais! Enfin, j'ai apprîns un mio d'Angliais d'pis!

 

I' faut qu'j'avoue qué j'n'ai janmais pèrdu l'habitude d'aver l'nez dans les livres. Comme ou l'savez bein, quand nou 'tait mousse dans chu temps-la, i' fallait liéthe à la veue d'la lampe à paraffinne au sé, ou à la chandelle, et v'la tchi n'a pon fait d'bein à ma veue avau l's années. J'pense bein qué ch'est ch'la tchi m'fit aver à mett' des leunettes par lé temps qu'j'avais eune chînquantaine d'années! Mais nou n'peut pon souffri d'ennion quand nou-s-a un livre d'vant sé, et né v'la ou'est qué j'pliains les pouorres înforteunés tch'ont pèrdu la veue!

 

Ches jours, ch'est dans L'Dictionnaithe Jèrriais-Français qu'j'ai l'nez fouôrré l'pus souvent. Jé l'trouve fascinnant, viyant qu'les couôteunmes du temps passé sont dêtaillies dans bein des pages. Y'a mème eune vîngtaine dé d'vinnailles et lus rêponses à la page 162! Mais l'aut' sé, pour un r'change j'mé mîns l'nez dans “La Chronologie d'Jèrri”, êcrite par man vier anmîn et protecteur, feu l'Avocat Edmund Toulmin Nicolle, Vicomte dé Jèrri, dé mémouaithe respectée, et publiyée par lé Sieur Ralph Mollet, étout d'mémouaithe respectée, en 1935. Ch'est un p'tit livre tchi nouos donne les dates d'un tas d'choses tch'ont ieu lieu en Jèrri dépis l'année 540, quand la Chrétchienneté fut apportée dans l'île par St. Hélyi. Il y vêtchut appathemment tchînze ans, ayant 'té martyrisé en 555. Mais j'tais pûtôt întérêssi à liethe tch'est tch'i s'passait ichîn y'a trais chent ans.

 

Lé Rouai Charles preunmyi d'vînt rouai d'Angliétèrre en 1625. Il est d'întéthêt spécial viyant tch'il 'tait lé p'pée au Prince Charles tchi s'réfugyit en Jèrri en 1646 quand la dgèrre civile 'tait en allant en Angliétèrre et tch'il 'tait en dangi d'sa vie. Il arrivit l'dgiex-sept d'avri et d'meuthit dans L'Châté 'Lîzabé en ville. Il allit à l'Église de St. Hélyi pour lé Sèrvice Divîn lé 26 d'chu mais-là, et 'tait à La Grand' R'veue d'La Milice Rouoyale lé 29 sus l'sablion dans La Baie d'St Aubîn. À ch't occasion-là, Mousiseu Philippe de Carteret, Seigneur dé St Ouën, fut crée Chevalier par lé Prînce tch'avait dêjà crée Messire George de Carteret Baronnet dans L'Chaté 'Lîsabé lé 24 d'avri.

 

Appathemment, lé Prince n'était pon considèthé et en seûtheté en Jèrri car i's'en fut en France lé 25 dé juîn d'la mème année, mais i' r'vînt en Jèrri lé 17 dé septembre 1649 et allit r'démeuther dans L'Chaté 'Lîsabé.

 

J'crai bein qué l'Prince Charles est l'seul tch'a 'té procliâmé rouai deux fais en Jèrri. San p'pée, lé Rouai Charles preunmyi, eut la tête copée à Whitehall en Angliétèrre lé 30 janvyi 1649 et l'Prînce fut procliâmé rouai souos l'nom d'Charles deux lé 17 dé févri, dans L'Vièr Marchi à St Hélyi, par lé Vicomte Laurens Hamptonne. Ch'tait l'onze dé févri, 1650 qué l'nouvieau Rouai donnit l'territouaithe en Améthique à Messire George de Carteret tch'a tréjous 'té appelé “New Jersey” d'pis, et deux jours pus tard lé Rouai s'en r'allit en France. I' prînt sa pliaiche sus l'trône d'Angliétèrre à la restauration d'la monarchie lé 29 dé mai 1660, et l'deux d'juîn i' r'fut procliâmé Rouai eune deuxième fais dans L'Vièr Marchi chutte fais par lé Vicomte Edouard Hamptonne.

 

N'en v'la-t-i', d'l'histouaithe pour un p'tit pays comme lé nôtre! D'en liéthe dé mème vaut bein le peine dé s'mett' lé nez dans les livres! Et comme St. Ouënnais, j'sis ordgilleux d'liéthe qué l's illustres anchêtres dé Moussieu d'St Ouën ont tréjous affirmé lus louoyauté et supporté les forteunnes et l's aventuthes des Rouais d'Angliétèrre, Ducs dé Nouormandie!

 

George d'La Forge