1980: Lé routchi

 Lé routchi

 

Trenton, Michigan,

U.S.A.

Lé 3 d'mai, 1980.

 

Moussieu l'Rédacteu,

 

Quand j'tais en Jèrri l'année pâssée, tchitch'un m'dit qué les routchièrs 'taient payis souoxante-chîn louis la s'maine. Si j'avais 'té sans travas et dans l'bésoin j'n'éthais pon pèrdu d'temps, eune fais ouï chenna, dévant m'n aller vaie l'Connêtabl'ye et lî d'mander d'm'embaûchi!

 

J'ai tréjous gardé un bouan souv'nîn du temps qué j'tais Ségrétaithe au Connêtabl'ye (pus tard Juré-Justicier) Francis Vibert Le Feuvre à St. Pièrre y'a eune septantaine d'années - disons dans les 1908. Dans chu temps-là, l's anciens d'la pâraisse (et d's aut' pâraisses étout, sans doute) tchi n'avaient pon mênagi à sauver assez d'sou pour souangni des bésoins d'vieillèche sans travailli, et tchi considéthaient que ch'tait honteux d'êt' "sus la pâraisse" ou d'èrchéver d'la charité d'autcheune pèrsonne, dév'naient routchièrs pour la pâraisse. I' n'gangnaient pon d'hauts gages, mais il' 'taient payis toutes les s'maines et n'taient pon accabliés d'travas. Les maladifs et les sîmpl'yes d'esprit, et généralement les cheins tchi, par hâsard împrévu, 'taient sans travas, pouvaient êt emplyiyés comme routchièrs au bésoin étout.

 

Ou-s-allez p't-êt' penser qué ches gens-là n'étaient pon capabl'yes dé faithe un bouan jour dé travas pour la pâraisse, mais j'peux cèrtifier qué ch'tait l'contraithe. Ch'est vrai tch'i' prannaient lus temps, mais à ch't' êpoque-là les gens avaient ocouo eune honnêteté et un ordgi dans lus travas, et j'vouos asseûthe tch'i' y'avait mains d'sèrcl'ye et d'mauvais hèrbe lé long des fossés d'l'Ile tch'i' n'y'a à ch't heu.

 

Les routchièrs 'taient appelés "Cantonniers" dans chu temps-là et il' 'taient seurvilyis par un "Chef-Cantonnier" Tchu souangnait d'ieux et d'lus bein-être comme un péthe, et il avait l'appias et l'souôtchein du Connêtabl'ye.

 

J'en ai connu, d'ches Chefs-Cantonniers, tch'avaient des caractéthes întérêssants. Naturellement, il' 'taient chouaîsis d'parmi touos l's aut' routchièrs à cause dé lus êducâtion (comparative, sans doute) et lus réputâtion dans la pâraisse. Il' avaient un sens dé responsabilité èrmèrquabl'ye envèrs lus travailleurs et la pâraisse, et ch'tait l'Chef-Cantonnier tchi faîsait sans rapport au Connêtabl'ye toutes les s'maines et tchi r'chévait les gages en blo pour distribuer à ses hommes au but d'la s'maine.

 

Les routes n'étaient pon macadamisées dans chu temps-là, et ch'tait eune affaithe dé les caûchi atout la pièrre câssée qu'nou viyait dans l's êcarceurs, atout l'aigue du roûleux ("steam-roller"). Lé travas s'faîsait par les corvées en ûsage dans l'temps - quand un homme avait a fourni tant d'jours par an pour aîdgi à r'pather les routes. Nou-s-appelait ch'la "faithe ses c'mîns." Au bésoin, les pus robustes routchièrs aîdgeaient ès corvées. Lé Chef-Cantonnier à St. Brélade 'tait un haut maigre du nom d'Gavey. J'ai oublyiyé tch'est tch'était san preunmié nom, mais j'mé r'souveins tout-à-fait bein dé s'n appathence. Il avait eune vouaie autoritaithe, et i' m'sembl'ye acouo l'ouï donner ses ordres à châque routchi d'bouane heuthe au matîn. "Et té, Ph'lippe, t'en vas prendre ta pèlle, et t'en vas t'en v'nîn auve mé au roûleux!"

 

Y'a eune chose tchi n'faut pon oublier. Ch'est que généralement, les routchièrs, anciens ou maladifs ou sîmpl'yes d'esprit, sauvaient un tas d'sou à la pâraisse. A la pliaiche d'êt' "sus la pâraisse", tout en travaillant trantchilement i' gardaient les r'liés des routes propres à un couôtement raisonnabl'ye.

 

Dans la pâraisse dé St. Pièrre, i' prannaient du goût à faithe lus travas, et à cèrtaines distances lé long des fossés nou viyait l'rêsultat - l'atchumulâtion d'la gratt'tie d'sèrcl'ye du r'lié bein arrangie en mouoché, appelé un mouoché d'bann'lais, tch'était aîsi à ramâsser et chèrgi dans l'hèrnais.

 

Châque pâraisse avait eune vendue d'chu bann'lais touos l's ans. Les fèrmièrs lé faîsaient sèrvi pour remplyi un fias ou ameublyi eune taque dans l'clios our pour picoter des tonmates ou aut' pliantes. J'pense qué ch'la s'fait acouo au jour d'aniet, mais i' m'sembl'ye qué j'vai bein p'tit d'bann'lais par les c'mîns quand j'sis en Jèrri à ch't heu, probabliément viyant qu'les routes sont macadamisées. Et j'n'ai pon veu fort dé ches routchièrs tchi sont payis souoxante-chîn louis la s'maine. P't-êt' qué l'chein tchi m'dît chenna 'tait à m'embliûter. Mais si ch'est vrai, i' daivent êt' d'aut' sorte d'routchièrs qué les cheins dé y'a septante ans!

 

George d'La Forge