La Chasse au Co

 La Chasse au Co

par A.L.P.

J'mé rassouveins touos l's ans quand Noué appraiche dé not' expéthience un bouân matîn, un jour ou deux d'vant Noué. Ch'tait lé Noué dé dgiex-neuf chents quarante-trais, et janmais j'n'oubliêthai coumment qué j'fûmes bein près dé pèrdre not' dîner d'Noué.

Ma M'mèe avait acaté un bieau gros cotchet au c'menchement du mais d'Dézembre et, n'ayant pas d'poulailli, j'lé gardaîmes dé jour dans la sèrre au bas du gardîn, mais d'peux d'l'aver volé par les Allemands dé niet, j'lé mettaîmes dans eune bouête et j'lé tchéthiaîmes au haut d'la montée des d'grés d'la maîson au pid des mansardes touos les sièrs. J'crai bein qu'i' n'tait pon trop en peine d'être èrmué d'la sorte touos les jours, ou bein qué s'n înstînct lî dit qu'i' n'en avait pas pour longtemps dans chu monde, mais né v'là-t-i' pon un bouân matîn qu'à mié-c'mîn du gardîn i' l'vit l'couèrcl'ye qu'était justement posé sus la bouête et, faîsant un brit âffreux, s'en fut les ailes êtendues, coumme un êpart dé feu, à travèrs du gardîn et par-dessus eune muthâle d'au mains sept pids d'haut, dans la route dé l'autre côté.

J'pensaîmes qu'i' sé s'sait p't-être êtaûdi en tchiyant dans la route, mais nou-fait, par lé temps qué j'nos trouvîmes dans la route étout, not' dîner d'Noué avait pâssé l'travèrs d'un banc d'êpine et 'tait bein en route avaû un clios!

Av'-ous janmais dé bouân matîn, dans des finnes chavettes, ichi la chasse à un co à travers dé deux's-trais betchets d'tèrre brîsie, par dessus des fôssés et dans d'l'hèrbe trempée d'rôsée? Jé l'fînmes nous! Not' co 'tait p't-être bein gros mais, sâpresti, ch'est qu'il 'tait dêlié! Sans menti, j'fînmes lé tou du vaîsinné sans gângnyi d'ssus du tout, car toutes les fais qu'i' volait par en d'ssus d'un fôssé ch'tait tréjous à eune pliaiche où'est qu' jé n'pouvaîmes pas pâsser et par lé temps qué j'avaîmes fait lé dêtou nécessaithe i' r'tait bein avolé avaû lé préchain clios.

Nos vaîsîns né d'vaient pon aver 'tait bein matinnas chu jour-là car jé n'vîmes corps d'âme pour nos rendre s'cours.

Chu fichu ouaîsé-là allait coumme un possédé; ch'est bein seux qué jé n'l'éthaîmes janmais èrveu sinon qu'heûtheusement j'étaîmes acouo toutes les deux d'eune âge dé pouver couôrre assez vite pour lé garder en veue!

Enfîn, pour coper d'court, j'taîmes à mié-c'mîn d'un clios quand j'vîmes qu'il 'tait resté sus l'haut du préchain fôssé. J'appréchîmes douochement, nos faîsant saieuses qu'i' 'tait enhèrmélé parmi des ronches et qu' y'éthait p't-être la chance dé lî mettre la patte sus l'co. Mais il avait tant galvaûdé qu'il en 'tait à but et 'tait êtendu là comme un mort! I' nos en éthait pas fallu fort d'autre n'tout pour qué j'éthaîmes 'té dans l'même êtat coumme li.

Quand M'mèe lé fouôrrit souos san bras i' n'dgéthottit seulement pas. Êssoûffliées, et ayant l'air à deux êpeûthas, j'nos en r'fûmes siez nous lé mettre dans la sèrre. Jé n'pèrdîmes pas d'temps à d'mander à iun d'nos vaîsîns dé lî teurtre l'co dans tchique temps dans l'jour. J'avions manniéthement èrgret pour lé malheûtheux co, mais i' faut qué j'diche qu'il avait l'goût d'èrva-s-y quand i' faut bein rôti lé dîner d'Noué!

 Les Nouvelles Chroniques du Don Balleine, No11, Noué 1991