Thursday 24 December 2020

Des Festîns Hors Jèrri

Des Festîns Hors Jèrri

par Messire Arthur dela Mare

Dans l'hémisphéthe du Nord, ch'est à dithe en Ûrope, au Cannada, ès Êtats-Unis, au Japon et à la pliûpart d'La Chine, la saison d'Noué veint en pliein hivé, et nou l'associe auvec la né, lé feu dans l'âtre et l'confort dé par dédans. Mais dans les pays du Sud, Noué veint en pliein êté et quand i' fait eune caleu dé chent degrés et pus nou n'pense pas ès grands r'pas qué nou-s-a ichîn, ès assiettées plieines dé picot ou d'ouaie et dé podîn tchi vos èrhaûche lé paids d'eune livre la bouochie. Nânnîn, s'nou vit près d'la côte nou va à la mé s'bangner et nou prend un coupl'ye d'"sannouiches" pour mangi. S'nou-s-est trop liain pour aller à la mé nou mange déhors, chein qu'il' appellent un "barbecue".

Un "barbecue", v'là tchi veurt dithe qué nou s'assied trais ou quatre heuthes sus un banc mal confortabl'ye qué les pigeons ont visité, et qu'nou tâche, sans succès, dé sé d'fendre des moûques, tout en mangeant d'la viande crute ou brûlée à chendre, et qu' nou s'met à penser tchi pliaîsi qué ch's'rait si la saison d'Noué pouvait finni pus tôt qu'ou n'fait.

Je l'sai bein car dans man mêtchi j'ai ieu à pâsser bein des Noués dans les pays cauds, et quand j'pense ès jours dé Noué quand j'tais mousse en Êgypte à la Trinn'té jé m'd'mande; "Tchi sorte d'achocre que j'tais d'aver abandonné chutte bouanne vie Jèrriaise pour m'en aller hors pays". Et quand j'tais à Sîngapour et en Thaïlande, si près d'La Lîngne qu'à Noué i' faîsait eune caleu împossibl'ye et qué, jour et niet, nou sue à d'gouts, jé m' d'mandais si les autorités n'éthaient pas deu mé mett' à l'Âsile, car j'tais certainement leunatique.

Mais un acouo pus grand d'savantage dé vivre hors pays et surtout, coumme mé, d'l'aut' but du monde, ch'est d'être s'parés dé ses êfants. Les Noués les pus mînséthabl'yes qué ma femme et mé j'eûnmes janmais pâssé ch'tait les plusieurs fais qué nos filles n'taient pas auvec nous. Pisqué j'tais Ambassadeu ou Haut Commissaithe et d'même Chef d'la commeunauté Britannique dans les pays où'est qué j'taîmes, ch'tait à ma femme et mé d'être les prîncipaux dans les fêtes dé Noué et d'faithe la minne dé nos rêjoui, mais quand j'èrvénaîmes à la maîson et qué j'taîmes touos seurs, j'avaîmes touos les deux les lèrmes ès ièrs dé penser à nos chiéthes filles qui 'taient si liain d'nous. La vie diplomatique n'est pas tréjous aussi agriabl'ye qu'oulle est vantée!

Au jour d'aniet, pour les marchands et les boutiques, la saison d'Noué n'est qu'eune occâsion pour faithe des sou. Mais jé n'dévons janmais oublier la vraie raison pour célébrer Noué, qu'est l'annivèrsaithe d'la naîssance du Sien tchi vînt nos apprendre qué tout l'monde sus chutte tèrre, n'înmporte dé tchi pays ou dé tchi race ou couleu, sont fréthes et soeurs et qué j'dévons nos accorder en paix.

Coumme nou vait dans l'pays tchi, d'autre temps, 'tait la Yugoslavie, j'sommes acouo bein liain d'aver apprîns chutte léçon. I' faut espérer et tâchi d'faithe dé sorte qué, chu Noué, j'allons tous èrdoublier nos êfforts pour y'arriver.

Quant à mé, jé n'prétends pas saver pourtchi qu'j'avons 'té mîns sus chutte tèrre, mais j'sis cèrtain qué ch'n'tait pas pour nos entré-tuer. Comment qué j'voudrais qué l'message dé Noué éthait prîns réchinne en nous! 

 

Dans Les Nouvelles Chroniques du Don Balleine, No15 Noué 1992

No comments: