1948: Election Expenses

 Election Expenses

Merrienne Gives Her Views

Moussieu l'Editeur

"Tchèsque chonna veur dithe, Ph'lip?'' s'fit la Merrienne hier matin.

" Tchèsque tchi veur dithe?'' j'l'y d'mandit, un mio brusquement, car j'avais faim, et ou n'avait pas ocquo fait l'tais.

"Ch'est chu papi, tchi veur dithe qu'a l'av'min un candidat pour autchune poste ne s'sa pas permint de dêpense pûs qu'une certaine somme. Man grande pèthe beni! est-che vrai?

"Si tu t'mettais à prépathé man dêjeuné au lieu d'lièthe la gâzette à l'heuthe tch'il est, v'la tchi m'conveindrait mûs,''j'l'y dit.

"Et si tu n'tais pas si roupilleux,'' ou raiponnit, "j'accordethaimes ben mûs. "Fricasse tes patates, si tu es si prêssi.'' Et la v'la t'chy se r'met à lièthe le papi.

Pour une pôse je n'dis rain, mais quand vint un temps j'cliérgit ma gorge, et j'm'appréchit d'la bouonnefemme. "Ecoute, Merrienne,'' j'l'y dit, "j'admets que y'a des bordées que je n's'y p't'être pas raisonablye, mais quand un homme à faim y dit tchiquefais des bêtes de choses. Epis, pour dithe vrai je n'me trouve pas trop ben à matin.''

"Eh ben,'' ou s'fit, se l'vant et attrapant la cast'role, "d'pis qu'ch'est de même, ch'est fini. Mais j'voudrais ocquo savé la véthité entouore chais dêpenses.''

"Mais ch'est ben simplye, ma vieille,'' j'l'y dis, " Un candidat pour Juge ou pour Connêtablye, ou Député, même pour Surveillant, tch'y s'trouvait oppôsé a tréjous dépense chen tch'il a voulu pour attrapé les vouâix.''

"Et pourtchi pas?'' ou dit. "Tchi ma tchi y'a à faithe ditet? Absolûment, un homme peut faithe chen tch'y veur avec ses sous. Et tchi chance tch‘il éthait yeu aut'fais s'y avait pas viédgi sa pouchette? J'me r'souvains d'un Saint-Ouennais tch'y dêpensit pûs d'mille louis pour être Député, et si n'l'avait pas fait it éthait tchais de d'sous. Quand nou s'met candidat y faut s'attendre que y'etha des dêpenses.''

"Y fut dans l's'Etats siez ans ch't'y-la,'' j'l'y dit, "et la seule fais tch'il ouvrait sa bèque ch'tait pour dithe ‘contre'. Mais v'la tchi n'a rain à faithe ôv la tcheschon. Seûx et certain qu'y'étha une limite au montant qu'un candidat pouôrra dêpensé.''

"Et comment qu'nou veindra a savé tchèsque il a dêpensé?''

"Oh, damme!'' j'l'y dit, "che s'sa une djobbe. Mais sans doute chonna nos s'sa explitchi dans la louai.''

La Merrienne hallit la cast'role de d'sûs l'feu, et m'donnit une assiétée d'patates. Epis  - ‘‘Si ch'est d'même,'' ou s'fit, "tchèsque nou gagne d'avé une vouaix? J'n'ai jamais donné la mainne pour rain, et quand veindra l's'êlections, si j'n'ai pas un neu chapé, ou au tout mains une pathe de cauches, je n'bouoge pas d'ichin.''

Et la v'la tch'y s'met à dèjeuné

 

Ph'lip

Morning News 29/5/1948