1981: Mes p'tits jours

 Mes p'tits jours

Trenton

Michigan, USA

Lé 29 d'août, 1981

Moussieu l'Rédacteu,

À ch't heu qué j'sis vyi et qu'j'ai un pid dans la tombe, j'pènse souvent à mes p'tits jours siez Papa et Manman à La Forge ès Landes, à St Ouën. Tch'il heutheux jours! Tchi bouannes mémouaithes! Tchi bieaux jours, mes p'tits jours – p'tits mais grands en mémouaithe dé la jouaie d'vivre, dé grandi, d'obsèrver et d'apprendre. Tchi trésors! En nommer, d'ches trésors, ou dites?

Eh bein, iun des pus grands 'tait d'êt' né dans eune fanmil'ye tchi n'tait pon riche en sou et tchi avait à les mênagi. V'là tchi m'apprîns à couoyer et apprécier la valeu des choses dé la vie d'touos les jours. Quand j'vai l'gaspillage dé toutes sortes d'choses ichîn en Améthique v'là tchi m'fait penser qu'ch'est eune bénédiction d'êt' né pauvre. Dans un cas d'même i'n'faut pon grand chose pour fourni un mio d'pliaîsi et d'satisfaction dans la vie.

J'm'èrsouveins du pliaîsi qu'ma preunmié pathe dé neu souliers m'donnit. J'allais à l'Êcole du Dînmanche à l'Églyise dé St Georges et j'avais à bliatchinner mes bottes dé touos les jours au sanm'di pour aller auve mes habits du Dînmanche – mes bouans habits, comme nou l's appelait. Lé temps vînt tch'i' m'fallait d'neuves bottes, j'avais veu des souliers tch'étaient fabritchis auve du manniéthe dé brun cannevas qué nou-s-appelait des “jaunes souliers”. À ma grand surprînse Manman m'dit qu'ou m'en acait'tait eune pathe la préchaine fais qu'j'îthions en ville. J'n'oubliethai janmais l'grand pliaîsi qu'j'eus quand j'les mîns la preunmié fais pour aller à St Georges. J'tais ordgilleux comme un poux tchi marche sus du v'loux, man bouanhomme!

Lé Jour dé Noué 'tait eune fête attendee împatiemment d'un but d'l'année à l'autre. La légende dé Papa Noué et la cheunm'née 'tait bein rêelle pour un mousse, et l'orange et les codrettes dans la cauche pendue à l'ais du foyi 'taient un trésor pour lé chein tchi n'les viyait qu'eune fais par an. Man preunmié arbre d'Noué 'tait eune belle branque dé dgèrrue bein touffée, copée dé d'ssus un fossé et mînse dans un grand pot à flieurs sus eune pétite tabl'ye dans la carre dé la tchuîsinne, et ornée atout deux-s'trais p'tites lantèrnes auve des f'nêtres couleuthées qué ma Marraine m'avait donné, et des mios d'riban d'difféthentes couleurs. J'avais r'gret quand fallait s'en dêfaithe auprès l'Jour dé l'An.

Eune aut'jouaie pour les mousses 'tait l'prix d'l'Êcole du Dînmanche. I' m'sembl'ye que j'vai acouo la rangie d'livres sus eune tabl'ye dévant l'autel dé l'églyise et la jouaie d'saver tch'i' y'en avait iun pour mé parmi ches'-là. Et Manman m'disait tch'i' fallait êt' seux d'dithe “Mèrcie, Moussieu” à haute vouaix quand l'Minnistre vouos l'présentait.

Et pis y'avait l'thée d'l'Êcole du Dinmanche. Trais pâraisses, St Ouën, Ste Mathie et St Pièrre, lé fêtaient ensembl'ye. Ch'tait ieune des grand' fêtes pour nous, mousses, car v'là tchi voulait dithe êt' portés dans eune vainne à tchique aut' partie d'I'Île. Et pis un vraie festîn dans eune grand' tente. Ch'tait ieune des seules fais d'l'année qu'un tas d'nous avaient des p'tites finnes beurrées d'beurre et de g'l'ée et d'la gâche à beurre et à corînthe à mangi et Manman m'disait tréjous dé n'en prendre pon pus qu'eune tranche de châque sorte sans d'mander pèrmission, pour n'êt' pon appele un gourmand et mal êl'vé.

J'n'oubliethai janmais lé d's'appointement tch'était un vraie chagrîn pour mé quand i' tchiyait d'la plyie chu jour-là et tch'i' y'avait grand dangi qué l'thée éthait à êt' èrmîns à un aut'jour. En mé l'vant et viyant la plyie, jé d'mandais à Papa si l'temps s'en allait s'clièrgi.

“P't-êt' bein,” i' m'disait. “I' pouôrrait p't-êt' amender d'ichîn méjeu, mais i' n'faut pon trop s'y fier. Ch'est du temps du Bouan Dgieu, mais ch'n'est pon d'san miyeu.”

Tchi jouaie s'i's'clièrgissait, et tchi catastrophe s'i' continnuait à tchaie d'la plyie et tch'i' fallait r'mett' la fête.

Eune aut' fête dé ma jannèche etait quand j'allions deux ou trais fais par an baithe du thée siez m'n oncl'ye Ph'lippe Le Feuvre et ma tante Mélie (née Le Ruez) en ville. I' d'meuthaient dans “Great Union Road.” Ch'tait doubl'ye fête pour mé si m'n oncl'ye Ph'ippe 'tait à tèrre auprès iun d'ses longs viages en mé car il 'tait contrémaître à bord des grands navithes au long cours et il avait tréjous tchique bouanne aventuthe à nouos raconter. Il 'tait l'fréthe à Manman L'Feuvre, de la fanmil'ye dé La Ville La Bas.

Comme ou viyiz la vie sîmpl'ye et trantchil'ye asseûthait la jouaie d'vivre, et ches bieaux jours dé jannèche n'erveindront janmais.

George d'La Forge