1975: L'Assembliée d'Jèrriais - Le vingt-traisième dîner annuel

 L'Assembliée d'Jèrriais

Le vingt-traisième dîner annuel

Lé 23ième dîner annuel dé L'Assembliée d'Jèrriais eut lieu mêcrédi, lé 12 dé févri, à l'Hôtel de France. D'vant c'menchi lé r'pas, Mde. L. Bichard, Maître dé Cérémonies, criyit sus lé Président, lé Connêtabl'ye W. J. Tomes, qui payit tribut à deux membres bein fidèles qué L'Asembliée avait pèrdu dans les dèrnié jours et d'mandit ès membres dé lus l'ver et obsèrver eune minute dé silence en mémouaithe dé Moussieu Ph. Ahier et lé Dr. A. L. Carré.

Auprès, Moussieu P. J. Romeril fit la priéthe et lé r'pas c'menchit; tout bein sèrvi. Pis Mde. L. Bichard d'mandit au Président dé proposer la santé dé Sa Majesté la Reine, Notre Duc.

Auprès tchiques minutes, les autres santés fûtent proposées, à c'menchi auvec Moussieu T. Raymond de Gruchy, qui proposit la santé dé L'Assembliée d'Jèrriais en disant qué ch'tait un grand honneu pour li d'aver à faithe chutte tâche et èrmèrcyit les siens concernés d'aver d'mandé à sa danme et li dé v'ni, pour aver eune bouanne séthée, du bouan mangi et bouanne compagnie.

Ayant r'chu des bulletîns du Dr. Le Maistre, Moussieu de Gruchy viyait bein qué L'Assembliée avait ieu des membres distîndgis à proposer les santés et i' r'mèrcyit L'Assembliée acouo eune fais pour li'aver pâssé lé complyîment.

Ch'est dommage, i' dit, dé n'vaie pas pus d'jeunes gens à prendre un întéthêt dans la langue, étant qué y'en a hardi qui la connaissent.

Moussieu de Gruchy racontit tchiques histouéthes et ieune d'un Jèrriais qu'avait ieu un fa fait en Dgèrnésy, mais quand il arrivit en Jèrri lé fa 'tait trop p'tit. Lé Dgèrnésiais lî dit, “Tu'est un pus grand houmme en Jèrri qu'ichîn!”

Moussieu de Gruchy offrit ses félicitations au Dr. Le Maistre sus san travas à prêserver la langue, et dit qu'il admithait lé travas qué les membres dé L'Assembliée 'taient à faithe pour tâchi d'consèrver la langue; mais, malheûtheusement, un jour ou s'pèrdétha. Ch'tait dommage dé vaie Jèrri changi si vite, et ch'tait bein difficile d'être en gouvèrnément ches temps. Dé pus en pus ch'tait coumme l'Angliétèrre. Les Angliais veinnent ichîn parceque Jèrri est Jèrri.

En finissant san discours, Moussieu de Gruchy souhaitit toute prospéthité à L'Assembliée et dit qué l'av'nîn est asseûthé pour acouo longtemps auvec les bouans officièrs.

Le Président rêponnit à la santé en r'mèrciant Moussieu de Gruchy pour ses patholes et tous applaudîtent ches r'mèrques. Quant à li, Moussieu Tomes dit qu'i' 'tait bein pus à s'n aise a pâler lé Jèrriais, et les siens qui l'savent dévthaient aver honte dé l'pâler pas. Lé Président racontit étout tchiques histouéthes et r'mèrcyit ses officiérs pour lus travas, et dit étout qué ch'tait bein pliaîsant dé vaie tant d'Dgèrnésiais à chu dîner.

Auprés, Mde. Bichard d'mandit à Moussieu K. W. Syvret dé proposer la santé des officièrs.

Moussieu Syvret dit qu'i' n'tait pas v'nu coumme êcrivain, ou v'là tchi s'n'allait couôter chi à L'Assembliée! Ch'tait un pliaîsi pour li dé proposer chutte santé et admither lé grand travas et întéthet qué tous prennent pour aîdgi à prêsèrver la langue.

L'Assembliée est hardi chanceuse d'aver dé si bouans officièrs; les rêunions vont dé forche en forche. Moussieu Syvret dit qu'il avait veu qué L'Assembliée avait ieu un dêbat, “Jèrri s'en va es tchians”. Y'a un vièr diton - les siens qui s'mêlent auvec les tchians r'ch'vent des puches! Les Jèrriais dévthaient r'garder bein qu'i' n'sont pas laîssis à netti les bouêtes ès tchians! J'avons un magnifique système honorifique et i' tait bein content d'vaie qué lé fis au Président avait 'té assermenté Protchuleux-Général, et il espéthait qué j'prêsèrv'thaimes nout' héritage. L'Assembliée avait un bouan Président et parmi les Vice-Présidents y'avait deux danmes. La liberté des femmes est veue dans L'Assembliée, auvec la Sécrétaithe et s'n assistante, mais acouo bein, la bourse 'tait acouo dans les mains d'un houmme!

Séthieusement, Moussieu Syvret dit qué ch'tait vraiement un grand honneu pour li dé d'mander ès membres dé lus l'ver et béthe à la santé des officièrs et félicitit les officièrs et souos-conmités acouo eune fais.

La Dlle. Hacquoil rêponnit à la santé et r'mèrcyit lé Sieur Syvret pour ses patholes. Ch'tait un grand honneu pour yi à rêpondre d'la part des officièrs. Ch'tait pliaIsant dé vaie toutes les danmes dans lus belles robes.

Y'a chent ans y'éthait pas ieu d'danmes - ch'tait rein qu'les hounmes qu'allaient es dînièrs.

Il est temps qué les danmes rempliaichent les hoummes dans l's Êtats, coumme Mde. Thatcher en Angliétèrre! La Dlle. Hacquoil 'tait ben concèrnée pour la libéthâtion des femmes et fit un bouan discours sus chenn'chîn.

Lé Sieur Richard proposit la santé dé L'Assembllaïe d'Guernesiais et dit qué ch'tait bein pliaIsant d'en vaie tant au dîner.

Auprès aver crouaîsi l'Atlantique il espéthait qu'il' avaient ieu eune bouanne séthée et qu'i' s'n allaient lus rêjoui auprês lé diner! Les membres d'L'Assembliée avaient tréjous eune si bouanne réception en Dgèrnésy et i' sont èrchus à bras ouverts.

Lé Sieur Richard dit qu'i' souhaitait tout succès et prospéthité es Dgèrnésiais et d'mandit ès membres dé lus l'ver et béthe à lus santé.

Moussieu Robilliard rêponnit d'la part du Président de L'Assembllaïe d'Guernesiais et r'mércyit lé Sieur Richard pour ses patholes et les membres dé L'Assembliée pour lus beinv'nue.

Sa femme et li 'taient hardi fièrs d'aver ieu l'opportunité dé v'nîn. Ch'est bouan dé vaie deux sociêtés auvec eune entente cordiale, les deux à tâchi d'prêsèrver la langue. Lé Sieur Robilliard félicitit L'Assembliée et la r'mèrcyit acouo eune fais pour la beinv'nue, lé bouan r'pas et la séthée à v'nîn.

Auprès y'eut des présentations ès Danmes H. Tomes, D. de Gruchy et M. Robilliard, la Dlle. Amy (Sécrétaithe) et au Trésôryi.

Lé restant d'la séthée 'tait dans les mains du Sieur Alan Mollet auve san “trio” pour la danse. Y'eut deux chansons par les Dlles. Anne Germain et Ruth Amy et Mde. Eileen Le Sueur r'citit et amusit la compagnie. La séthée s'pâssit bein trop vite et tous lus étaient rêjouis hardi.