I' n'plieut tch'i' n'vèrse!
Fort Lauderdale,
Florida,
Lé 22 d'févri, 1975
Moussieu l'Rédacteu,
J'vai qué j'tais en erreur quand j'disais, dans ma lettre du 8 dé févri, qué l'Sénateu Krichefski m'donnit l'impression en 1946 tch'il 'tait d'la nouvelle êcole tchi s'appelait “Démocratique”. La gazette du neuf janvyi, qué j'veins d'èrchéver, nouos dit dans la colonne dé “Meridian” qué ch'tait l'contraithe - lé Sieur Krichefski 'tait iun des fondateurs du parti “Progressif” tch'était supposé être en opposition au parti “Démocratique”. En tout cas, pour mé, tch'est Conservateur dans l'âme et trop vyi pour touanner câsaque, Démocrate, Progressif, Socialiste, etc. est toute la mème boutique. Touos ches partis politiques-là m'font penser au vièr diton tchi nouos dit qu' “Les barbièrs s'ent-râsent!”
J'vai dans la gâzette, étout, qu'la renchiéthe continnue comme qué d'pus belle et qu'l'êlectricité couôte dé pus en pus et qu'les cheins tch'aiment lé chucre sont vont aver à lus contenter d'en faithe sèrvi mains ou payi la renchiéthe de neu pennîns (1s. 10d. - quâsi deux ch'lîns du temps pâssé) pour deux livres.
Et i' s'en va faller mett' pus d'tîmbres sus les lettres. Mais la renchiéthe tch'est r'mèrquabl'ye est l's “horaires” du docteu pour l'analyse des ieaux d'eune pèrsonne atchûsée d'cachi un moto souos l'înfluence dé la bouaisson. J'mé d'made si l'atchûsé a à payi si l'analyse est en sa faveur? Si oui, il éthait raîson d'èrfûser l'analyse viyant tch'il éthait à payi ouaithe tchi né s'sait p't-êt' pon coupabl'ye. La tchestchion n'veurt pon dithe qué j'ai autcheune sŷmpathie pour l'ivrouangn'nie. Au contraithe, j'sis d'avis qué si eune pérsonne bait ou n'dév'thait pon cachi un moto, et qué si ou cache ou n'dév'thait pon baithe. Mais j'crai tch'i' dév'thait y'aver tchique moyen d'dêtèrminner, à miyeu marchi, si eune pèrsonne a bu trop.
Et l'ivrouangn'nie n'pathaît pon moli en Jèrri. La gâzette du neuf janvyi nouos dit qu' un pouorre dgiâtre, êbédé par la bouaisson, sautit à sa mort dé iun d's êtages du garage dans La Rue des Sablions. I' iut trais chent huitante-siex pèrsonnes condamnées d'vant la P'tite Cour l'année pâssée pour aver cachi lus motos souos l'înfluence dé la litcheu. Est-ch'qué ch'n'est pon honteux?
Et la tragédie siet la vitesse. Quand j'liet les rapports d'accidents dans la gâzette v'la tchi m'fait craithe qué la vitesse est la cause dé pathels accidents, car s'il' avaient ieu lieu à eune vitesse raîsonnabl'ye lus motos né s'saient pon si endommagis.
Et ch'est des rapports dans eune seule gâzette. Y'en a d'mème dans toutes les gâzettes. Mais pèrsonne ne pathaîssent craithe en Jèrri qu'la vitesse dév'thait êt' réduite. Pourtant, dépis qu'oulle a 'té réduite à 55 milles à l'heuthe en Améthique (à la pliaiche dé 70 et 75) le nombre d'morts par accident en moto a dinminnué dé trente pour chent.
J'vai dans la gâzette qué l'tourisme promet bein pour ch't'année. Comme la vie a changi en Jèrri! Quand j'tais janne ch'tait les patates tch'am'naient l'profit - comme nou peut s'en d'menter en r'gardant l'bieau portrait des vainnées d'bathis sus l' “Weighbridge" prînt par Cap'taine Èrnon, Maître d'Port au c'menchement du siècl'ye.
Par contre, j'vai qu' les pouorres fèrmièrs ont fait chent chînquante mille louis d'mains duthant l'mais d'octobre, 1974, qué dans l'mème mais en 1973.
Et l'montant r'chu pour l'exportâtion d'patates dé sept mille huit chent quatorze louis est pitchabl'ye. Ch'est les tonmates tchi pathaîssent aver rapporté l'pus, suivies par les iliets.
Où'est tch'est l'temps tchi y'avait des gardîns à pommièrs en Jèrri, et tout pliein d'pommièrs dédans? Les fèrmièrs né lus gênaient pon d'tonmates ni d'flieurs dans chu temps-là, mais i' faîsaient du cidre à gogo. En 1912, Mait' Jean Dorey (défunt) êtampait, au Dou, à St. Jean, pus d'onze chents barritchies d'cidre dé chent vîngt pots!
Ché n'tait pon d'la p'tite biéthe, mes bouannes gens - ch'est l'moment dé l'dithe! Dans ches temps-là, les gens savaient acouo gouôter l'cidre. Dans cèrtaines fèrmes il' en b'vaient acouo à touos les r'pas, mais la preunmié dgèrre laîssit tout ch'là driéthe et les patates c'menchîdrent à payi si bein qué les fêrmièrs clièrgîdrent lus gardîns à pommièrs pour en craître dédans. La patate a rempliaichi l'cidre, les flieurs rempliaichent hardi les patates. Lé tourisme m'niche dé rempliaichi l'agritchultuthe et l's Angliais et l's êtrangièrs rempliaichent les Jèrriais. Tchi pataflias, mes frêres!
No comments:
Post a Comment