G'zettes et Pipos!

Elie mouothit y'a chent ans en 1918 et don ch'est l'chent'naithe dé sa mort ch't' année. Né v'chîn ieune d'ses poésies.

Elie died 100 years ago this year, and for the centenary of his death here's one of his poems.

G'zettes et Pipos!

Nou vait des g'zettes
Dans les valettes;
L'hiver a dispathu,
Y'a des pipos
Le tou des clios,
Ch'est le r'Nouvé qu'est v'nu.



A raidde brache
Amont la cache,
Sautant, les p'tits bichos,
Ches affrontès,
Vont pitchi l'nèz
Jusque dans les pipos.

Et pis des g'zettes
I' font lus jouettes,
Sauticottant tout l'tou',
I' souffl'yent d'dans
Pour un instant
Et sont r'hors d'un coup!

Escouant lus tête
Boutant les biêtes
L'vant les dghéthets en haut
Par sus l'fossé,
L'travers du pré
I s'en vont à grands sauts!

L'mouton rumine
Et n'fait pon mine
D' aperchever lus jeux;
Tchest qu'il en est
Si rein n'lis pliaît,
Ch'n'est qu'un vier roupilleux!

Ah! Pipos, G'zettes,
Côtis et ruettes,
Qu'i' fait bé par ichin.
D'ville et d'maison,
Ne m'pâlez pon,
Avec tout lus hertchin!

Elie