Lé Six d'Janvyi

Aniet ch'est un jour partitchulyi. D'vant qu'lé Jour d'la Libéthâtion d'vînsse la fête nâtionnale, ch'tait l'six d'Janvyi tchi mèrtchait l'expression d'eune identité patriotique pouor les gens d'Jèrri. Y'en a tchi dithent qué ch'tait raîque eune p'tite aventuthe au mitan d'eune grande dgèrre entre les Britanniques et les colonnistes Améthitchains et les Français et l'dgiâbl'ye à quat' - mais pouor les Jèrriais du temps pâssé, ieux, il' aimaient mus craithe qué ch'tait grâce ès êfforts d'la Milice dé Jèrri souos lé c'mandement d'un janne offici Angliais (quand touos l's aut's grands officièrs 'taient hors pouor Noué) qu'la grande victouaithe fut gângnie dans l'Vièr Marchi.

Ch'tait mangnifique d'pouver vaie en 2012 dans l'exhibition au Musée d'Jèrri l'grand portrait d'la Mort du Mâjeur Peirson, prêté par la gal'lie Tate. Et ch'est bein d'penser qu'auve lé Jour d'la Libéthâtion au mais Mai, l'annivèrsaithe du protêt du 28 d'Septembre 1769 r'connu à ches drein par l's Êtats, et les célébrâtions du six d'Janvyi, y'a au mains trais dates dans l'almonnas pouor ramembrer des moments împortants d'not' histouaithe.

Et y'a d'l'histouaithe tch'est ramembrée dans not' littéthatuthe étout. Un Saint Louorenchais, tchi 'tait Ph'lippe Langliais, êcrivit eune poésie pouor l'six d'Janvyi au dgiêx-neuvième siècl'ye. (Nou peut la chanter sus l'air d'Auld Lang Syne)

Lé six d'Janvyi

Jèrriais, souv'n-ous du six d'Janvyi,
Dé chu jour mêmothabl'ye,
Tchi fut têmoins dans not' Jèrri
D'eune action admithabl'ye.

Jèrriais, souv'n-ous dé chu jour-là,
Jour d'honneur et dé glouaithe;
Jèrriais, souv'n-ous dé chu jour-là,
Gardez-en la mémouaithe.

Les anciens n'fûdrent pas couoyons,
I' s'mouontîdrent des hommes;
Mouontrons qué lus p'tits fis sont bouons,
Qué lus d'cendants jé sommes.

Jèrriais, souv'n-ous dé chu jour-là,
Jour d'honneur et dé glouaithe;
Jèrriais, souv'n-ous dé chu jour-là,
Gardez-en la mémouaithe.

Séyons tréjous à not' déver
Et à l'amour fidèles,
Sus nous pouôrront tréjous compter.
L'vièr Jèrri et ses belles.

Jèrriais, souv'n-ous dé chu jour-là,
Jour d'honneur et dé glouaithe;
Jèrriais, souv'n-ous dé chu jour-là,
Gardez-en la mémouaithe.

Séyons tréjous Jèrriais dé tchoeu,
Aimons touos not' patrie,
Qué dé notre île lé bonheu
Sait lé but dé not' vie.

Jèrriais, souv'n-ous dé chu jour-là,
Jour d'honneur et dé glouaithe;
Jèrriais, souv'n-ous dé chu jour-là,
Gardez-en la mémouaithe.

À la mémouaithe dé Peirson
Rendons honneu et louange,
Qué la r'connaissance à san nom
Parmi nous janmais n'change.

Jèrriais, souv'n-ous dé chu jour-là,
Jour d'honneur et dé glouaithe;
Jèrriais, souv'n-ous dé chu jour-là,
Gardez-en la mémouaithe.

Lé six d'Janvyi 1781, lé monde n'taient pon rêvilyis chu matîn-là car ch'tait l'Vièr Noué. L'almonnas avait justément changi tchiques années dé d'vant et bein des gens gardaient tréjous Noué s'lon l'vièr almonnas - au mais d'Janvyi, coumme les Russes lé font acouo au jour d'aniet. Don ché s'sa Noué d'main en Russie, et l'Vièr Noué ichîn s'lon la couôteunme dé nos anchêtres.