1870s?: Dans man jeanne temps

Dans man jeanne temps nou n'payait qué deux sous la s'manne pour aller à l'êcole. Nou n'payait rein pour les feu, en hivé; car châque êfant apportait touos les lundi matins sa p'tite chouque à l'êcole. Au Vendredi B'nêt (Saint) les êfants apportaient lus p'tit lot d'flieu et un oeu à la maitresse, et pis ou lus faisait des fliottes. L'Assise dé la Veille, ou la prumiêre fais qué la veille sé t'nait, était lé prumi lundi oprés lé 1 mi dé S'tembre (ou chu jour ichin si s'adonnait lé lundi) et nou continuait à villyi jusqu'au Vendredi B'nêt (Saint), autché temps il 'tait jugi qué les jours étaient assez longs pour qué châtchun vîsse sans alumer d'voeue (sei ou matin) - coume chu diton ichin l'dit: "Au Vendredi B'nêt, i' faut enfoui ses crâssets". Nou fleurissait les veilles, ch'est à dire les pathais et les rouaies du run ouêque nou villiait, atou du blianc-bouais, des vèrges d'or et d'argent, d'l'hèrbe dé St. Jean, des coues d'ernard, des tourne-soleil, de la satinète, et des aspèrges en graine. Des rouaies i' pendait des cèrclles flieuris atou des flieurs artificièles faites dé drap ou dé papi d'couleu, qu'nou-s ap'lait des mainnagières, et sus l'aire nou-s êtendait du p'sais, dé l'êtrain, d'la feûgiêre, ou du g'nêt, sus tchi nou s'assiévait pour sé garder cauds, car nou n'avait pas d'feu. Nou faisait servi dans chu temps-là dé manniêres dé lampes qu'nou-s ap'lait des crâssets, et qu'nou croch'tait à un vilain (oeune p'tite bétêne dé bouais qu'était dent'lée) qu'nou pendait à ieune des rouaies.

 

Aut'fais lé jour dé Noué les êfants du pouôre monde allaient dé maison en maison crier lus Noué. Il' allaient ofuche oeune demi-douzaine ensemblle et s'mettaient à chanter à la porte des maisons: "Man Noué, man Noué, s'i' vos pliaît!", lestchels mots i' chantaient jusqu'à qu'nou vînsse lus apporter châtchun lus bouan gobbin d'gâche. Lé prumi jour dé l'An, i' rchantaient oeune aut'e chanson sus l'même ton; les uns croyaient: "Mes ériviêres, mes ériviêres, s'i' vos pliaît!" et l's autre: "Ma hodgignole, ma hodgignole, holà!: Du pain dé Noué s'i' y'en a!". À Pâque il' allaient crier: "Ma mouosole, ma mouosole, s'i' vos pliaît!.....

 

[Lé restant du fieillet est dêchithé.]

 

J.D.