1968: Eune corvée méthitouaithe!

 Eune corvée méthitouaithe!

 

Le Ménage ès Feuvres,

St. Ouën.

 

Lé 28 septembre, 1968.

 

Moussieu l'Rédacteu,

 

Comme j'l'ai probabliément mentionné d'vant, j'passe man temps à lièthe lé dictionnaithe Jèrriais-Français quand j'n'ai rein d'aut' à faithe, et j'trouve toutes sortes d'choses întérêssantes dédans! En liêsant la définition des corvées à la page 126, par exempl'ye, v'la tchi m'ramémouaithe qué la corvée 'tait un d'vé à la pâraisse. Lé fait qué ch'tait un d'vé oblyigatouaithe né pathaîssait pon êt' r'senti par les parouaissiens. Au contraithe, i' r'gardaient l'affaithe comme étant tchiquechose dé méthitouaithe d'aîdgi à garder les routes en bouan êtat.  Les vièrs Jèrriais d'race 'taient bouans travailleurs dé natuthe. I' n'avaient pon apprîns la théorie modèrne dé “lé pus d'sou pour lé mains d'travas” tchi pathaît êt' l'êvangile d'un tas des jannes d'à ch't heu!

 

Quant à mé, j'ai tréjous creu qu'l'idée d'la corvée 'tait fanmeuse, et i' m'vînt à l'idée, en liêsant l'compte rendu dans la gâzette entouorre les travaux proposés dans nouot' églyise parouaîssiale, qué touos l's Anglyicans d'la pâraisse dév'thaient faithe eune corvée volontaithe pour lus églyises et prandre la pelle et la chuviéthe et dêgrader ch't'aithe-là tchi m'niche dé s'êcrouôler et d'engaumer l'orgue! S'il' y m'ttaient la main et la pelle dé bouan tchoeu, i' n'prendrait pon longtemps à mett' l'affaithe prête pour la nouvelle aithe, et i' n'en couot'tait rein à la pâraisse.

 

1967: La cathédrale dé Peterborough

 La cathédrale dé Peterborough

 

St. Servan-sur-Mer,

France.

 

Lé 22 d'juilet, 1967.

 

Moussieu l'Rédacteu,

 

Quand j'tais en Angliétèrre dreinement à faithe lé tou d's abbayes et des cathédrales jé c'menchis par les cheinnes du côté ouêst du pays jusqu'à Edîmbourg, et j'visitis les cheinnes du côté êst en m'en r'vénant. J'avais hâte dé vaie la cathédrale dé Peterborough, dêdiée ès Apôtres St. Pièrre, St. Paul et St. André, viyant qué j'savais bein qu'un Jèrriais avait 'té êvêque dé chu diocèse-là.

 

Il 'tait tard l'arlévée quand j'arrivis-là, et la cathédrale 'tait freunmée, mais i' faisait acouo jour assez pour liéthe les noms sus les tombieaux dans l'chinm'tchièthe des mouaines aut'fais. Là j'y trouvis l'tombé en marbre tchi couvre la tombé dé l'Êvêque Jeune. Ch'est un simpl'ye tombé en forme d'rectangl'ye, neuf ou dgiex pouces d'êpaisseu, à pliat sus la tombé. Y'a eune simpl'ye crouaix sus la surface, et l'înmage d'un mitre sculpté au bas d'la crouaix. Lé tou des côtés du tombé est l'înscription, en Anglais: “Francis Jeune, D.C.L. Né lé 22 mai, 1806. Consacré 25ième êvêque dé Peterborough lé 29 juin, 1864. Décédé lé 21 août, 1868.” J'y r'allis d'bouanne heuthe lé lendemain au matin pour en prendre un portrait atout ma machinne à dessiner. Malheutheusement, l'solé 'tait à jouer à s'muchi driéthe les nuages la grand' partie du temps, mais j'espéthe d'en aver un bouan portrait quand-mème.

 

1968: Y'a septante ans...

 Y'a septante ans...

 

Fort Lauderdale, Florida,

U.S.A.

 

Lé 6 d'avri, 1968.

 

Moussieu l'Rédacteu,

 

Quand j'viyais l'portrait d'L'Êtacq'sé dans la gâzette l'aut' sémaine, v'la tchi m'ramémouaithait l'temps qué j'tais mousse à La Forge siez Papa, et qu'j'allions sus les monts en d'ssus d'L'Êta au dînmanche l'arlévée.  Y'avait un c'mîn tchi m'nait du haut du Mont du Vallet (à gauche dévant d'valer l'mont) jusqu'à eune manniéthe dé grand'tchaise formée par des grosses pièrres. Ou' donnait justément en d'ssus et endrait l'Hôtel dé L'Êta d'chu temps-là.

 

Papa s'pliaîsait bein là à r'garder l'êtendue d'La Baie d'St. Ouën, et vaie les cârosses arrêter à l'hôtel. Dans un bieau jour d'êté y'avait un mangnifique air dé r'pos là-haut. Jé n'sai pon si ch'n'est qu'eune idée, mais i' m'sembl'ye tréjous qué l's êtés 'taient pus bieaux et cauds quand j'tais mousse tch'i' n'lé sont à ch't heu. I' n'y avait pon l'brit d'motos à disteurber la trantchilité d'la natuthe. Nou ouïyait l'chant d's ouaîthieaux et l'lappais d'la mé dans l'port quand oulle 'tait haute. Et nou ouïyait l'trot des j'vaux dans la route comme les vouaituthes appréchaient d'l'hôtel.

 

1969: Rêunion mensuelle

 L'Assembliée d'Jèrriais

Rêunion mensuelle

 

 

La rêunion mensuelle eut lieu vendrédi, l'28 dé novembre, dans la Salle Publyique dé St. Martîn et dans les huiptante membres lus y rêunîtent.

 

D'vant c'menchi les affaithes, l'Président, l'Sénateu P. J. Romeril, d'mandit ès membres dé lus l'ver et obsèrver eune minute dé silence en mémouaithe dé Mde. A'court.

 

Lé rapport du jeu d'cartes du mais d'octobre fut liu et accepté. Siex nouvieaux membres fûtent êlus.

 

Lé Président, auprès l's affaithes finies, dit qu'la séthée avait 'té annoncée comme des items dé l'Eisteddfod mais y'avait des artistes des deux pièches dé théâtre qui n'pouvaient pas v'nîn. Il espéthait qu'les membres s'saient pas trop d'sappointés auve chein qu'avait 'té arrangi.

 

1969: D'èrtou en Améthique!

 D'èrtou en Améthique!

 

Trenton, Michigan,

U.S.A.

 

Lé 8 dé novembre, 1969.

 

Moussieu l'Rédacteu,

 

Eh bein, m'èrvéla en Améthique! Lé viage dé Jèrri à Londres par avion fut rapide. L'année passée, j'eus la chance d'êt' assis à côté du charmant Connêtabl'ye Edgar Reynolds Mouothant d'La Trinneté, mais ch't année jé n'vis pèrsonne qué j'connaîssais à bord du Vanguard ouaithe qué toutes les pliaiches 'taient otchupées - chose tchi m'pathut r'mèrquabl'ye pour lé preunmyi d'novembre!

 

I' faut êt' capabl'ye d'marchi dêliêment sus ses pids d'driéthe ches jours quand nou viage par avion, car les distances entre lé point d'attèrrissage et l'chein d'embèrquément pour eune aut' destinnation dans les grands aérodromes (comme lé chein d'Heathrow à Londres) allouangnent touos l's ans. Ch'est vrai qu'eune beusse vouos porte du point d'attèrrissage à un bâtiment tchelconque, mais arrivés là eune janne fille, habilyie dans l'costeunme officiel dé l'aérodrome, vouos dit d'suivre les èrchelles sus les muthâles et les lampes êlectriques tchi mènent, en fîn d'compte, au conteux mèrtchi “International transfers”. Pour y'arriver i' faut marchi l'travèrs d'un tas d'corridors ou pâssages jusqu'à qu'nou sé d'mande si nou-s-est sus l'bouan c'mîn. Enfin, nou-s-arrive au point înditchi, et en présentant l'titchet d'pâssage nou r'chet eune carte vouos autorisant d'aborder l'avion transatlantique en temps et lieu, et montrant l'nunmétho d'la hèche tch'y mène.

 

1968: Ch'est la mauvaîtchi tchi sort!

 Ch'est la mauvaîtchi tchi sort!

 

Le Ménage ès Feuvres,

St. Ouën.

 

Lé 7 dé septembre, 1968.

 

Moussieu l'Rédacteu,

 

Tch'est qu'les jannes d'à ch't heu ont dans la couënne? Nou n'vait qu'des accomptes dé lus dros dans la gâzette! L'aut' sé, eune bande dé ches malfaiteurs-là - car i' n'sont qu'des malfaiteurs - poussîdrent les hauts-mus d'eune bouanne londgieu d'muthâle à L'Êta dans l'canné et l'clios à côté. Y'a d'ches pièrres-là tchi pèsent entre deux et trais chents livres; ch'est en tchi v'la tchi fut fait auve la malice dans l'esprit, et pon par accident, car i' fallait un coup d'alfaure pour dêgagi et tchulbuter les pièrres. Pouv'ous m'dithe, bouannes gens, tchi sorte d'pliaîsi qu'des gens peuvent trouver à faithe d'ité mêche? Auve le couôtage dé la main d'oeuvre d'aujourd'anièt, ch'est eune affaithe dé p't êt' eune chînquantaine dé louis pour les r'mett' en pliaiche et les r'machonner!

 

L'aut' sémaine, ch'tait des d'gâts ès Tchenn'vais à St. Brélade. Quand nou liet ch'la dans la gâzette i' nouos est tréjous dit qu'la police s'en va s'en entchêter, mais tch'est qu'ou' peut en faithe, la police? Les mauvais sujets tchi lus abûsent à faithe lé ma n's'en vont pon lus présenter siez l'Chent'nyi et avouer lus fautes! Nou liet mème qué les bouëtes pour les pauvres et aut' offrandes dans l's églyises ont les portes forchies et l'cont'nu volé. S'i' y'a d'tchi honteux, ch'est la vol'lie des sou dêdiés au sèrvice du Bouan Dgieu!

 

1968: St. Martin l'Vyi

 St. Martin l'Vyi

 

Le Ménage ès Feuvres,

St. Ouën.

 

Lé 31 d'août, 1968.

 

Moussieu l'Rédacteu,

 

Eune anmie m'disait l'aut jour qu'oulle avait rencontre un moussieu d'St. Martîn tchi li'avait dit tch'i' n'tait pon trop en peine dé liéthe ches lettres ichîn, viyant qué ch'tait tréjous entouorre St. Ouën qu'j'êcrivais, et qué jé n'mentionne janmais St. Martîn!

 

Sans doute, la raison est bein simpl'ye: Étant Gris-Ventre dé naissance et d'domicile dans mes p'tits jours, et à ch't heu que j'sis r'vénu en Jèrri dans mes vièrs jours dé temps en temps j'connais St. Ouën bein mus qu'St. Martîn! Et j'n'ôse pon pâler trop des pâraisses qué jé n'connais pon fort. Mais j'ai tréjous aimé St. Martîn et La Trinneté - où'est qu'j'ai d'bouans anmîns. Eune chose est bein cèrtaine: Ches deux pâraisses-là éthont l'honneu d'chârer, auve St. Ouën, la triste fîn d'l'usage dé la langue Jèrriaise!

 

1969: À beintôt!

 À beintôt!

 

Le Ménage ès Feuvres,

St. Ouën.

 

Lé preunmyi d'novembre, 1969.

 

Moussieu l'Rédacteu,

 

J'né s'sait pus d'chu côté 'chîn d'l'Atlantique quand ou vèrrez chutte lettre ichîn dans la gâzette. J'éthai crouaîsi la mé - mais à trente-trais mille pids en l'air, et j'n'en éthai mème pon veu fort. À chutte hauteur-là nou n'vait qu'des nuages en d'ssous d'sé. I' sont bliancs comme la né, et quand nou vait eune taque tch'est mannièthement bliue ch'est la mé tchi s'montre viyant tch'i' y'a un creux dans les nuages.

 

La dreine sémaine en Jèrri fut bein trop courte. Ch'est tréjous d'mème. Nou veurt dithe “À la préchaine” à touos l's anmîns et pathents, et nou finnit par en mantchi tchiques-uns, mème des pathents. Ch'est seux qué quand j'éthai des nouvelles à Noué d'mes couôsîns Briard dé St. Brélade, i' m'dithont: “Tu n'vîns pon nouos dithe 'À la préchaine' dévant t'en aller en Améthique!” Et ma couôsinne Elizabeth (la femme à man couôsîn 'Dâlpheusse George), tch'est seurvillante dans l'office du B.U.A., m'êcritha probabliément la mème chose étout - et auve toute justification. Et y'en étha bein d'autres. Mais tch'est qu'ou voulez, bouannes gens, les jours né sont pon longs assez pour faithe tout qu'nou voudrait faithe. J'fais d'man mus - comme les vieaux tchi lus êtrangl'yent! Nou n'peut pon faithe pus. À touos les cheins qu'j'ai mantchi d'aller les vaie, j'lus d'mande dé m'estchûser - ch'n'est pon qué jé n'pense pon en ieux - et j'êprouvethai à aller les vaie deux fais à la pliaiche dé ieune l'année tchi veint!

 

1971: Des nouvelles dé Jèrri!

 Des nouvelles dé Jèrri!

 

San Antonio, Texas,

U.S.A.

 

Lé 13 dé févri, 1971.

 

Moussieu l'Rédacteu,

 

Jé n'sai pon tch'est tch'i' y'a d'mal auve les sèrvices des postes. Ch'est seux tch'i' y'en a, car j'veins d'èrchéver trais “Jersey Weekly Posts” quâsi en mème temps - la cheine du 17 dézembre preunmièthement - et pis les cheinnes du 10 et du 24 dézembre en mème temps! I' m'sembl'ye aver ouï pâler d'eune grève des travailleurs dé la poste en Angliétèrre, mais j'n'en ai veu rein dans les gâzettes ichîn en Améthique, et ch'est p't êt' là la raison pour lé r'térgément des livraisons - prîncipalement les livraisons dé deuxième classe.

 

Comme j'l'ai mentionné d'vant, ch'est tréjous grand' fête pour mé d'èrchéver des gâzettes dé Jèrri et d'pouver vaie tch'est tch'i' s'y passe quand j'n'y sis pon! J'tais intérêssi d'liéthe, dans les discours des Membres d's Êtats à l'occâsion des distchusions au sujet d' L'Apèrchu pour ch't année, que l'Sénateu Krichefski annoncit des dépens inattendus dans l'couothant d'la preunmiéthe année d' l'administrâtion des Postes. Jèrri a la chance que l'affaithe n'est pon piéthe qu'ou n'l'est. En Améthique, la renchiéthe sus tout, prîncipalement deue ès grèves irresponsabl'yes des travailleurs dans touos les mêtchièrs, est si considéthabl'ye tch'i' faut s'attendre qué l's apèrchus s'en vont quâsi r'doublier d'vant qu'un bâtisse, construction ou entréprînse tchelconque es'saient finnis. L'affaithe est dév'nue si mal qué l'Président Nixon a propôsé un projet d'louai au Congrès pour aboli les grèves en faveur d'arbitrâtion, mais j'liêsais dans la gâzette l'aut' sé qué v'la tchi n'avait autcheune chance dé passer, car les Démocrates - tch'ont la mâjorité dans les deux Chambres du Congrès - ont peux d'offenser les grosses têtes des sŷndicats travaillistes et d'pèrdre lus vouaix dans la préchaine êlection.

 

1968: La rêunion mensuelle

 L'Assembliée d'Jèrriais

La rêunion mensuelle

 

 

La rêunion mensuelle eut lieu vendrédi, l'29 dé Novembre, dans la Salle Pârouaîssiale dé St. Pièrre, et dans les 150 membres lus y rêunîtent.

 

Les affaithes c'menchîtent par lé rapport dé la rêunion du mais d'octobre et trais nouvieaux membres fûtent êlus.

 

Lé restant d'la séthée 'tait des filmes qué l'Chentnyi G. R. Le Masurier avait prîns à la grand' tchéthue et au Fort qué Mde. Eileen Le Sueur nos montrit.

 

1967: Tchi temps!

 Tchi temps!

 

Trenton, Michigan,

U.S.A.

 

Lé 11 dé mar, 1967.

 

Moussieu l'Rédacteu,

 

Comme j'l'ai probabliément mentionné d'vant, nou peut s'trouver dans deux difféthents clyimats dans l'mème jour ichîn en Améthique. Un jour la s'maine passée j'tchittis un bieau solé - ch'tait comme en êté - à San Antonio, dans l'Êtat d'Texas, à sept heuthes du matîn, et siex heuthes et deux mille milles pus tard j'tais à Detroit, dans l'Êtat d'Michigan, et parmi la né. La chaleu d'êté du Texas avait 'té êchangie pour la fraid des pays du nord. Ch'tait un avion à rêaction tchi m'avait transporté si vite d'un clyimat à l'autre - dé San Antonio, Texas, à Houston dans l'mème Êtat, et pis dé là à Chicago, Illinois, et en fîn d'compte à Detroit, Michigan.

 

J'sommes huit fréthes et soeurs en Améthique. Ouaithe qué iun des fréthes et les deux soeurs d'meuthent au Canada, nou peut quand-mème dithe qué j'sommes tous en Améthique, car lé Canada - ouaithe qu'un tas d'gens n'lé rêalisent pon - est partie d'l'Améthique du Nord. J'sommes trais d'nous, mes fréthes Sydney et Fraînque et mé, en d'ssus d'septante, et un quatrième, nouot' fréthe John Giffard, en appréche. Lé pus janne dé nous a 57 ans, John veint d'pèrdre sa femme, et ch'tait pour aller à s'n entèrrement qué j'ai tchitté l'pays du solé d'un jour à l'autre. Ch'est la preunmié mort dans nouot' fanmile pour bein d's années, mais né v'la l'temps arrivé tch'i' faut s'attendre tch'i' y'en étha d'aut' dans l'couothant d'tchiques années l'avant à nous. Ch'est l'sort de la vie, et i' n'y a rein d'pus cèrtain dans l'monde!

 

1967: Choses et autres

 Choses et autres

 

San Antonio, Texas,

U.S.A.

 

Lé 18 dé févri, 1967.

 

Moussieu l'Rédacteu,

 

Les gâzettes dé Jèrri arrivent ichîn pus vite tch'i' n'avaient fait pour eune volée. J'en ai r'chu deux chutte sémaine, les cheinnes dé janvyi 19 et d'janvyi 12. Véthe, dans ch't ordre-là - ch'est souvent d'mème! Enfîn, pour bein tch'il' arrivent toutes en fîn d'compte ch'est tout ch'tch'i' faut, car nou peut au mains liéthe les nouvelles sans en mantchi la siète, et ch'la est d'împortance pour lé Jèrriais à l'êtrangi!

 

Accouothe un meurtre dans nouot' vielle pétite Île, si paîsibl'ye et trantchile aut' fais! J'mé r'souveins qué quand i' y'en eut iun dans man janne temps et qué l'coupabl'ye fut pendu - ch'tait-i' pon en 1908? - nou frémissait quand nou v'nait à penser qu'pathelle chose pouvait s'faithe en Jèrri, et n'en v'la combein - trais ou quatre, i' m'sembl'ye - dans l'couothant du mème nombre d'années ou mains! Ch'est tèrribl'ye! I' faut espéther qué l'coupabl'ye s'en va êt' dêcouvèrt. À m'n idée, ch'est eune bêtise qué l's Angliais ont fait quand il' ont aboli la peine dé mort, car les meurtriyèrs la méthitent bein!

 

Eune chose tch'i' m'pathaît drôle est la nouvelle dans la gâzette du 19 dé janvyi qué l'gérant d'la compangnie dé p'tun est d'avis d'arrêter la vente en gros dé cigarettes ès boutiques tchi voudraient les vendre au d'bit à miyeu marchi. Pour bein qué l'prix en gros n'est pon en jeu, tch'est qu'ch'la peut li faithe, si l'boutitchi est satisfait d'réduithe san profit pour lé bénéfice dé ses pratiques? Ichîn, en Améthique, ch'est un fait bein èrconnu qué la competition est l'âme du commèrce, et j'avons mème eune louai - lé “Sherman Anti-Trust Act” - tchi d'fend ès commèrçants, en gros ou au d'bit, dé s'associer pour êtablyi un prix commun d'vente d'autcheune marchandise. Ch'est don eune affaithe dé vendre au miyeu marchi pour attither des pratiques, et v'la tch'a eune tendance dé garder les prix bas. Ou-s avez grand bésoin d'tchiquechose dé mème en Jèrri.

 

1967: Dans les cathédrales en Angliétèrre...

 Dans les cathédrales en Angliétèrre...

 

Le Ménage ès Feuvres,

St. Ouën.

 

Lé 15 dé juilet, 1967.

 

Moussieu l'Rédacteu,

 

Nou-s-en vait-i, man bouanhomme, des choses întérêssantes dans les belles grand' cathédrales et l's abbayes d'Angliétèrre!  Nou-s-en vait mème tant qu'nou-s-en oublie quâsi la maîntchi par lé temps qu'nou-s-en a visité eune démié-douzaine! Et i' sont si belles qué nou pouorrait passer au mains un jour entchi dans châque. J'm'èrsouveins qu'la preunmié fais qué j'visitis la cheinne dé Cantorbéry j'y passis deux jours dé siette sans en r'sorti sénon pour prendre mes r'pas!

 

Chutte fais, j'en ai visité ieune ou pus touos les jours pour tchînze jours. Ieune des cheinnes qué j'trouvis hardi întérêssantes fut la cheinne dé Worcester, dédiée au Christ et à Nouotre Danme. J'avais tréjous ouï qu'deux Giffards, d'scendants des c'valièrs Giffard tch'étaient auve Dgillaume lé Contchérant à la Batâlle dé Hastings, avaient 'té êvêques dé Gloucester et d'Worcester respectivement, et comme ma m'mèe 'tait d'scendue - qu'j'ai tréjous ouï - des Giffards d'Angliétèrre, j'tais întérêssi d'dêcouvri s'nou viyait des monuments ès Giffards dans ches deux cathédrales-là. J'n'en vis pon autchun sîngne dans la cheinne dé Gloucester, mais j'n'eus pon d'peine à en trouver dans la cheinne dé Worcester. Dans chette-là, l'tombé d'l'Êvêque Geoffrey Giffard (1235-1302) habilyi dans ses vêtements sacèrdotaux, et mitré, est à côté d'la chantrerie du Prince Arthur, fils ainé du Rouai Henry sept. Es pids d'l'êvêque est l'tombé d'La Danme dé Clifford, femme en deuxième neuches dé “Lord” Giffard, tch'était pathenté à l'êvêque tch'est montré en êffigie sus san tombé, et tch'était probabliément lé d'scendant en lîngne directe du Seigneur dé Longueville en Nouormandie, dépis tch'i' portait l'titre dé Monseigneur.

 

1967: Maladies des p'tchiots

 Maladies des p'tchiots

 

Peterborough,

en Angliétèrre.

 

Lé 8 juillet, 1967.

 

Moussieu l'Rédacteu,

 

Dans les temps qué j'fus né - ch'tait en mil huit chent nénant'-tch-ieune - y'avait un tas dé p'tchiots tchi mouothaient d'la fliue. Tant pus qu'j'y pense, et tant pus qué j'compathe l'hygiène dé chu temps-la à la cheinne d'à ch't heu, tant pus j'sis êrmèrvilyi que j'eus la chance dé rester en vie duthant les preunmiéthes années d'ma jannèche!

 

Au jour d'aniet les p'tchiots sont habilyis ligièthement, justément assez pour les garder cauds, et quand l'temps est bé i' sont mîns d'houors à prendre l'air - au mains ch'est d'mème qué j'les vai êl'vés en Améthique, et i' faut penser qu'ch'est d'mème en Jèrri étout. Quand la m'mèe lus donne la boutelle, ou' met l'chuchot directement sus l'goulet, et chuchot et boutelle sont stérilisés chaque fais qu'l'êfant s'en sèrt. Quand i' c'menche à mangi, sa nouôrrituthe est régliée et divèrsifiee, les vitaminnes nécessaithes pour eune diète bein balanchie étant considéthées eune responsabilité par la méthe. Les mousses continuent à baithe du lait jusqu'à l'âge dé dgiex-sept ou dgiex-huit ans. En Améthique la grand partie d's êcoles en donnent ès êfants dans la journée. Le rêsultat en est qué l's êfants la-bas craissent pus grands et pus hauts qu'lus pathents.

 

1968: Lé chein tchi fait d'san mus n'peut pon faithe pus!

 Lé chein tchi fait d'san mus n'peut pon faithe pus!

 

Le Ménage ès Feuvres,

St. Ouën.

 

Lé 17 d'août, 1968.

 

Moussieu l'Rédacteu,

 

En liêsant l'travèrs du dictionnaithe, le mot “Chanteplieuthe” mé ramémouaithe eune pétite aventuthe tchi s'arrivit à man fréthe Fraînque quand j'tions mousses et tch'i' d'meuthait à La Forge siez nouot' oncl'ye Adolphus. Ch'tait auprès la mort dé Papa, et jé d'meuthais à La Mouaie à St. Brélade dans l'temps.

 

Lé pârrain à Fraînque 'tait l'Sieur Françot L'Cornu (d'la fanmile Le Cornu d'la Hauteur), tchi d'meuthait au Carrefour d'l'aut' côté d'siez Maît' Tanminne Le Cornu dans chu temps-là. Un homme hardi au-fait, chu Françot L'Cornu-là! I' pouvait faithe autcheune chose - forgi, cârrier, machonner, et i' creûsait des pits au bésoin. Fraînque l'aimait bein, san pârrain, et il allait l'vaie et lî garder compangnie sus san travas s'i' s'adonnait êt' dans l'vaîsinné.

 

Un jour, quand Fraînque 'tait auve li d'mème, san pârrain lî d'mandit d'aller au carrefour lî remplyi sa boutelle dé cidre. Il en gardait eune bârrique dans eune pétite êtabl'ye dans l'bel en driéthe dé la maîson. Fraînque, tréjous obéissant et d'bouan tchoeu d'natuthe, né pèrdit pon d'temps. Arrivé dans l'êtabl'ye, il avait la boutelle souos l'goulet d'la chanteplieuthe dans un clyîn dg-yi. Mais - eune avârie! Quand la boutelle 'tait trais-quarts plieine, il êprouvit à touânner la clié graduellement pour arrêter l'êcoulement justément d'vant qu'la boutelle emplyîsse jusqu'à haut pour n'en pèrdre pon, mais pas mouoyen d'touânner chutte clié-là du tout! Et né v'la la boutelle plieine et l'cidre à couler dans l'aithe! Tchi faithe, à ch't heu?

 

1967: D'èrtou en Améthique!

 D'èrtou en Améthique!

 

Trenton, Michigan,

U.S.A.

 

Lé 4 dé novembre, 1967.

 

Moussieu l'Rédacteu,

 

M'èrvélà en Améthique! Et avant hièr j'tais en Jèrri. Ch'est quâsi încriyabl'ye quand nou pense qué man p'pèe et ma m'mèe prîndrent bétôt un mais à viagi la mème distance en 1901. J'pense qué ch'tait vîngt-siex jours. Le Dawn, eune brigantinne dé 165 tonnieaux, fît un si bouan passage chutte fais-là qu'ou' battit iun des pus grands navithes ès Robîns. I' sortîdrent dé la cauchie d'St. Hélyi en mème temps, mais l'grand navithe prînt trente-trais jours à faithe la travèrsée à Paspédgia! J'soulions en pâler l'bouanhomme John Le Cocq et sa bouannefemme et mé quand j'allais les visiter à Malbaie à La Côte dans lus vivant. Il' 'taient à bord du Dawn auve man p'pèe et ma m'mèe et mes fréthes Sydney et John chu viage-là. Est-che possibl'ye qué 66 années sé sont passées dépis chu temps-là? Quand j'sis en Jèrri, j'en pâle souvent à m's anmîns Stanley et Elsie Anmîn au Mont Mado. Elsie est la nièche du défunt bouanhomme John Le Cocq. J'attends tréjous fête d'aller les vaie quand j'arrive en Jèrri, mais quand j'îthai l'année tchi veint (si j'en vai l'heuthe!) i' faudra qué j'mett' mes bouans habits pour entrer dans l'palais tch'i' s'en vont otchuper quand i' tchit'tont à garder boutique à Noué!

 

1968: I' faut paître là ou'est qu'nou-s-est fitchis!

 I' faut paître là ou'est qu'nou-s-est fitchis!

 

Le Ménage ès Feuvres,

St. Ouën.

 

Lé 10 d'août, 1968.

 

Moussieu l'Rédacteu,

 

Eune chose qué j'ai souvent r'mèrtchi est tch'i' y'a un tas d'monde tchi craient tch'il éthaient fait mus dans la vie s'il' avaient chouaîsi eune difféthente vocâtion ou un aut' mêtchi. J'avais un oncl'ye - i' n'est pus, l'pouorre baloque - tchi m'disait tréjous: “Si j'm'en 'tais allé à La Côte, à la pliaiche d'êt' bête assez dé m'mathier, j'n'éthais p't êt' pon l'nez sus la meule à ch't heu!” Y'a tout lieu d'craithe tch'i' sé s'sait mathié à La Côte s'i' y'avait 'té, mais pour li, resté à d'meuther et travailli en Jèrri jusqu'au jour dé san décès, ch'tait tréjous la pensée qu'un homme avait l'chouaix du mathiage ou d's'en aller houors-pays. Il avait eune bouanne femme, pourtant!

 

La chose en est qu'les jannes tchi s'en allaient au Cannada pour les Robîns ou les Boutillièrs ou les Fruïngs à l'âge dé dîsons treize ou quatorze ans, èrvénaient en Jèrri auprès lus apprentissage chînq ou siex ans pus tard pâsser deux-s'trais mais siez lus gens dévant lus en r'aller à La Côte. Comme nou peut s'y attendre, i' r'vénaient habilyis comme au Dînmanche, atout eune blianche quémînse et eune dgène emb'sée, et un dû chapé sus la tête, et, endueurchis par la fraid d's hivièrs à Paspédgia et à Barachouais ou à Gaspé, il' 'taient forts comme des capestes, et quand i' racontaient l's histouaithes dé lus vie d'aventuthe là-bas, ch'est naturel dé penser tch'i' faîsaient un mio d'lus tchian et faîsaient l'affaithe pathaître pus pliaîsante qu'ou' n'l'était en rêalité! Actuellement, i' n'avaient pon un tas d'sou dans lus pouchettes, viyant qu'les chînquante louis accordés pour les chînq ans d'apprentissage 'taient quâsi deus à lus maison d'conmèrce pour habits et fournituthes dans l'couothant des chînq ans. Mais les jannes hommes restés siez ieux en Jèrri n'savaient pon touos ches dêtails-là, et viyant iun d'lus âge à s'promener touos les jours atout ses habits du Dînmanche sus l'dos les faîsait penser tch'il' éthaient deu aller à La Côte étout!

 

1967: Tchiques vièrs mots Jèrriais

 Tchiques vièrs mots Jèrriais

 

Fort Lauderdale, Florida,

U.S.A.

 

Lé 9 dézembre, 1967.

 

Moussieu l'Rédacteu,

 

“Tch'est qu'ch'est qu'un abot?” man fréthe Percy mé d'mandit l'aut' jour.

 

“Bon!”, j'lî dis. “Où'est qu'tu'as ouï chu mot-là, té?”

 

“Mais ch'tait té-mème tchi l'fit sèrvi quand j'tions siez t'n anmîn Jèrriais au Cannada l'aut' jour!” i' m'dit.

 

“Véthe dgia, ma fîngre!”, j'lî dis, “Tu'as raison. San mousse en avait iun, un abot, gros comme eune rouôlette dé fi, sus lé p'tit dé, et j'li dis, “Tu'as trop d'abot pour eune faillie p'tite cope au dé, man garçon! La cope sé r'fétha pus vite si tu flianques l'abot dans l'âtre, et li donnes d'l'air!” Et quand i' m'dit qué ch'tait pour êtantchi l'sang tch'i' y'avait mins l'abot, j'li dis qu'un tchias dé p'tun ou eune ithangnie valaient mus!”

 

1971: La rêunion mensuelle

 L'Assembliée d'Jèrriais

 La rêunion mensuelle

 

 

Vendrédi, l'26 d'févri, fut eune séthée ouvèrte où'est' qu 150 membres et lus anmîns lus rêunitent, dans la Salle Publyique dé St. Martin, pour vaie les pièches dé théâtre données à l'Eisteddfod.

 

D'vant c'menchi, l'Président (l'Sénateu P. J. Romeril) fit la beinv'nue à tous, et y'eut eune proposition faite qué les rapports fûssent lius à la rêunion mensuelle du mais d'mars.

 

“La Nouvelle Erchette”

 

Lé Président annoncit qué la séthée s'n'allait c'menchi par la pièche dé théâtre dé St. Saûveux, “La Nouvelle Erchette”, les caractéthes étant: Ph'lippe Lêcaudé (Michael Vautier), Una Lêcaudé, sa femme (Mde. Mabel Le Seelleur), la D'mouaîselle des Vaux, Inspecteu des louages des États pour lé Conmité d'Habitâtion (Mde. Phyllis Green), Missis Èrnon (la Dlle. H. de Veulle), et Missis Le Gros (Mde. Eileen Le Sueur), deux vaîsinnes à Una. La scène: Eune appartément siez Ph'lippe Lêcaudé dans un louage au traîsième êtage du haut bâtisse dans Green Street, dé vièrs siez heuthes du sé. Una est à faithe un patchet; ch'est un cadeau pour les neuches d'argent à san bieau-fréthe. Oulle est changie pour aller s'prom'ner.

 

1967: Les changements sont en mode!

 Les changements sont en mode!

 

Fort Lauderdale, Florida,

U.S.A.

 

Lé 2 d'dézembre, 1967.

 

Moussieu l'Rédacteu,

 

“Oublies-tu tan p'tit Jèrri quand tu'es 'chîn?”, man fréthe Percy mé d'mandit l'aut' jour quand j'tions en c'mîn pour La Floride. “Eh bein,” j'lî dis, “Jé n'sis pon oublieux d'ma sorte, et j'n'ai pon 'couo mangi d's oubliettes! J'm'èrsouveins d'man traîsième annivèrsaithe dé jour dé naissance comme si ch'tait à ch't heu! J'tais sus les g'nouors à nouot' tante Ada L'Feuvre (1880-1910) dans la tchuîsinne a La Forge. Ou' v'nait d'mé laver les mains et la fache, et ou' m'dît: 'Tu'as trais ans aniet!'  J'm'èrsouveins, étout, tch'i' tchiyait d'la plyie avèrse, et qué j'la viyais ruisseler ava les carrieaux d'la f'nêtre!

 

Jé n'pouorrais sans doute pon t'dithe qué j'm'èrsouveins d'tout ch'tchi s'est passé dans ma vie d'pis chu jour-là. Il a passé gentiment dg'ieau l'tou d'La Corbiéthe dépis chu temps-là! Mais, dé chein qué j'peux vaie l'tou d'nous ches jours, lé passage du temps n'a pon amendé la jouaie d'vivre. Ch'est vrai tch'i' y'a bein pus d'conforts par les c'mîns et qu'les gens gangnent lus vie pus aîsiement, mais v'la tchi n'lus a pon enduèrchi l'caractéthe. Tant pus tch'il' ont des beins d'la vie, tant pus il' en veulent - mais san travailli pour! J'liêsais eune articl'ye dans la gâzette ichîn en Améthique l'aut' sé tchi disait qu'à l'av'nîn la technologie étha tellement avanchi qué l'travas d'l'homme sé f'tha dans un coupl'ye d'heuthes par jour! I' n'nouos est pon prédit tch'est qu'les travailleurs f'thont l'reste du temps. P't êt' mêché!

 

1977: Lé service dé Noué

 L'Assembliée d'Jèrriais

 Lé service dé Noué

 

 

Sanm'di, lé 10 d'dézembre, 1977, lé sèrvice dé neu leçons et cantiques dé Noué eut lieu dans la Chappelle Méthodiste d'Ebênhézer à huit heuthes lé sé.

 

Lé Sieur W. G. Perchard fit la beinv'nue, annoncit l'preunmyi cantique et fit la priéthe, et “Notre Père” fut chanté. Lé préchain cantique 'tait “Seigneur Jésus” et auprès, lé Président, lé Sieur J. N. Richard, liut la preunmié leçon et lé sèrvice continnuit sans arrêt. Huit membres du tchoeur chantîtent ensembl'ye et lé Sieur John Picot chantit “Aujourd'hui l'Églyise en fête”. La Dlle. Ruth Amy chantit “Le Fis d'Marie” et lé tchoeur “Il est né le Roi du Monde”. Les membres suivants liûtent les autres leçons - les Dlles. C. de Gruchy et Audrey Le Feuvre, Mesdanmes Hilda Syvret et J. Vautier, les Sieurs E. B. de Gruchy, S. J. Le Breton, K. W. Syvret et J. D. Richardson, Connêtabl'ye d'la Trinn'té.

 

1967: La gâzette apporte jouaie à l'exilé!

 La gâzette apporte jouaie à l'exilé!

 

San Antonio, Texas,

U.S.A.

 

L'preunmyi d'avri, 1967.

 

Moussieu l'Rédacteu,

 

Ch'est tréjous eune jouaie pour mé d'èrchéver eune gâzette dé Jèrri, et ch'tait eune doubl'ye jouaie chutte sémaine viyant qu'j'en ai r'chu deux en mème temps, les cheinnes du neuf et du vîngt-trais d'févri. La cheinne du seize févri 'tait v'nue y'a tchînze jours. Il' arrivent dé mème à Dgi l'adèrt dé temps en temps, mais v'la tchi n'l'est fait pon mains beinv'nues!

 

Pour un Jèrriais à l'êtrangi y'a tant d'choses întérêssantes dans ches deux gâzettes-là qué v'la tchi li donne eunne idée du “penser” des gens dans la communauté d'un Jèrri tchi n'est cèrtainement pon l'Jèrri d'ma jannèche! Quand j'vai, par exempl'ye, en liêsant l'compte rendu des discours dans l's Êtats qué lus apèrchu pour 1904 'tait trente mille louis, et qué l'aperchu d'aujourd'aniet est un d'mié million d'louis pour lé départément des téléphones seulement, sans pâler d'touos l's autres, ch'est assez pour faithe les vièrs membres d's Êtats d'y'a septante ans touânner dans lus côffres! Et v'la tchi m'ramémouaithe qué quand j'tais mousse dans “Hill Street” lé salaithe du Bailli 'tait mille louis par an. Dans chu temps-là nou criyait qué ch'tait eune vraie forteune! Mais à ch't heu? Dans san discours dans l's Êtats au sujet du propos d'payi les membres, lé Sénateu Cyril Lé Mèrquand mentionnit tch'i' y'a deux-s'trais fonctionnaithes dans l's offices du gouvèrnément d'Jèrri tchi gangnent trais fais autant par an!

 

1967: Rafales du temps passé

 Rafales du temps passé

 

Le Ménage ès Feuvres,

St. Ouën.

 

Lé 10 d'juin 1967.

 

Moussieu l'Rédacteu,

 

À ch't heu qu'm'èrvéla à St. Ouën, j'peux marchi par les c'mîns et r'vaie les pliaiches fanmiliéthes quand j'tais mousse. À L'Êta, y'a la p'tite forge à côté d'la carriéthe au bas du Mont Hueûlin où-est qu'man papa r'griyait et trempait l's ôtis pour les cârrieurs tchi travaillaient pour Mait' Ph'lippe Gallichan tchi la louait d'la pâraisse.  J'y'allais auve papa au sanm'di, dans la p'tite forge. Tout l'monde travaillait siex jours la s'maine dans chu temps-là.

 

Francis Le Breton, fis Edouard (sa m'mèe, Eliza Ann Le Feuvre, 1851-1929, 'tait nouot' couôthinne dé liain), d'meuthait d'l'aut' côté d'la route dé la p'tite forge, et jé jouais auve li. Y'avait un p'tit canné l'long d'la muthâle du côté d'la forge. Nou l'clièrgissait bein et nou m'ttait des p'tits buts d'bouais d'dans au haut. Nou l's app'lait des p'tits batchieaux, et pis nou les suivait comme i' d'valaient l'canné. Quand i' v'naient au bas du mont nou s'disait tch'il' 'taient dans la cauchie. L'pouorre Françot L'Breton mouothit janne. I' m'sembl'ye aver ouï qué ch'tait la conseunmtion tchi l'emportit. Y'en avait un tas tch'en souffraient quand j'tais mousse.

 

1981: J'allons-t-i' à r'tchulons?

This summary is not available. Please click here to view the post.

1981: D'bouâns anmîns sont des trésors

 D'bouâns anmîns sont des trésors

 

Fort Lauderdale,

Florida, U.S.A.

 

Lé 14 dé févri, 1981.

 

Moussieu l'Rédacteu,

 

L'articl'ye “Under the Clock” par “Meridian” dans la gâzette dé Jèrri est supèrbe. Ou nouos rappelle souvent d's êvènements du temps pâssé, et v'là tchi m'întérêsse hardi viyant qué j'sis du temps pâssé mé-même, ayant 'té né y'étha nénante ans ch't' année. Dans la gâzette du treize dé novembre, 1980, “Meridian” nouos montre un bieau portrait du stînme Le Cygne tchi faîsait l'viage dé Gouôrray à Carteret, en Nouormandie, jusqu'à 1913.

 

J'm'en r'souveins tout-à-fait bein, d'chu p'tit stînme-là, ayant viagi à bord mé-même. Tchiques années d'vant 1913 - j'crai qué ch'tait probabliément 1909 ou 1910 - l'Avocat Edmund Toulmin Nicolle, dé mémouaithe respectée, m'enm'nit auve li à bord du Cygne à Gouôrray pour faithe un tou en bicyclette en Nouormandie. J'm'èrsouveins qu' nouot' preunmié arrêt pour la niet fut ès Pieux, et qu' j'eunmes eune omelette pour lé r'pas du sé viyant tch'il 'tait trop tard pour lé dîner ordinnaithe. Ch'tait la preunmié omelette qué j'avais janmais mangi, et j'la trouvis délicieuse!