1955: Rêunion Mensuelle

 L'Assembliée d'Jèrriais

Rêunion Mensuelle.

 

La rêunion mensuelle eut lieu Vendrédi au sé, lé 21 d'Octobre, à 8 heures, dans la Salle d'Agritchulture, St. Hélyi, souos la présidence du Connêtablye S. G. Crill, qui rempliaichit lé Sieur Chs. Billot - nouvieau Président. I'y avait à peu près eune chentaine dé membres présents.

 

Après la lecture du rapport dé la dernière rêunion du mais d'Septembre, Moussieu Crill dit comment qui' 'tait heûreux dé faire la beinv'nue à un Jèrriais, lé Sieur Arthur Blampied - du Sud dé l'Afrique. I' tait v'nu par l'invitation des membres, et ch'tait un pliaisi dé l'ervaie après tant d'années. Lé Sieur Blampied ermèrcyit l'Assembliée, pour lus beinv'nue. I' n'a pas oubliyé son Jèrriais, et à la fin d'la sérée, i' s'èrtrouvit parmi plusieurs dé ses vièrs ammins d'aut'fais.

 

Nouvieaux membres.

 

Les nouvieaux membres êlus, sont:-

 

Mme. Olive Mourant, lé Sieur H. Myerscough, Mme Mildred A'Court, lé Sieur W. de Faye, et Mme de Faye, lé Sieur Ph. Luce, et Mme Luce, lé Député Ph. Le Masurier, lé jeune David Moon, et Neville de Gruchy.

 

Divèrtissements.

 

Lé Sieur Ph. Ahier, B. ès Sc., nos offrit des problièmes auve des chiffres, qu'taient hardi amusants. Il est maître dé son sujet, et i' rêvillyit l'audience dans tchiq' minutes, tellement qué les membres 'taient prêts à en êcouter bein des exemplyes. Ils en fûtent êdifiés, et mystifiés étout. Ensuite les membres du Comité, et autres, sé mîntent à d'mander des tchestchions à l'audience - principalement entouore des couotumes, ou vièrs bâtisses ou rues, ou locales pas bein connus en Jèrri.

 

Pour fini la sérée, lé Sieur G. W. Bertram, auve son Ciné Film, nos montrit des portraits qu'il avait prins à l'occasion dé not' p'tit viage en Normandie au mais d'Juin. La câuchie à Granville, les grandes clioches dé Villedieu, les ruines dé St. Lo, les biaux gardins à Coutances, etc., etc. Les membres fûtent charmès des magnifiques couleurs, et i' montrîtent lus appréciation par lus appliaudissements.

 

Ermèrciements.

 

Lé Président ermèrcylit lé Sieur Bertram, pour tout l'temps qu'il avait mins, à préparer ses portraits et pour la peine qui' s'tait donné en nos les montrant. Ch'fut un pliaisi pour tout l'monde.

 

Des r'mèrciements fûtent offerts étout au Sieur Ahier, qu'est tréjous prêt à nos aidgi, sait d'eune manière ou d'l'autre, et en l'faisant dé si bouan tchoeu pour l'Assembliée.

 

Lé Président annoncyit qué la préchaine rêunion éra lieu lé 25 dé Novembre.

 

1955