1954: Reunion Mensuelle à La Trin'te

 L'Assembliée d'Jèrriais

Reunion Mensuelle à La Trin'te.

 

La Réunion Mensuelle du mais d'Mars eut lieu Samedi, lé 27, et les membres sé trouvîtent à la Trin'té, dans la Salle Parouaisiale, à 7.30 heures du sé.

 

Les affaires dé la rêunion fûtent raccourchies viyant qué j'avions un tas d'gens qui s'taient joints ès membres pour jouer ès cartes ensemblyes chutte sérrée-là.

 

Lé rapport fut liu et adopté, et ensuite suivit l'élection d'nouvieaux membres. I'y en eut sept dé proposés et tchi fûtent élus à l'unanimité. Heureusement pour nous, lé nombre augmente à chaque rêunion.

 

Vers huit heures né v'là tout l'monde qui s'plièche ès tablyes pour c'mmenchi lus jeux. I'y avait 34 tablyes, et i' 'taient toutes remplyies - v'la tchi montre qué nos membres et lus ammins né sont pon occouo enniès d'lus jeux d'cartes. Auve lé Sieur J. W. Le Breton comme maître dé cérémonies, l'affaire marchit fanmeusement, et la sérée s'pâssait d'eune faichon hardi amicale et, sus un sens, bein trop vite.

 

Le jeune Jean Le Maistre s'promnit d'un but d'la Salle à l'autre, en vendant lé Bulletin No. 6. N'ou vait bein qu'i' sait comment s'y prendre pour collecter les sous sans faire eune seule faute. Il en vendit un bouan patchet, et n'ou peut vraiment dire qué y a des choses hardi intérêssantes dans chu numéro-là.

 

Dé vièr dgieux heures n'ou s'arrêtit pour aver des raffraïchissements, et ch'fut là l'moment ouaisqu' tout l'monde put d'viser à son tchœur content. La preuve en fut qué bein seûre nos gens s'pliaïsent à pâsler lus Jèrriais.

 

Quand vint la fin d'la sérée, Madame Crill présentit les prix ès gagnants, et l'Président ermèrcyit lé Connêtablye dé la Trin'té pour l'usage dé la Salle et les membres du Comité Social pour tout l'travas tch'ils avaient ieu en organisant eune si bouanne sérée.

 

1954