1955: Ph'lip et Merrienne au show

 Ph'lip et Merrienne au show.

“Y'a d'bouannes Bêtes en Jêrri.”

 

Moussieu l'Editeu,

 

J'vos vit au grand Show Mêcredi, mais j'n'eut pas l'temps de v'nin vos pâslé, car j'avais la Merrienne ôv mé, et oulle avait grand peux que s'ou n'me t'nait pas par le bras tout l'temps, j'me trouv'thais en mauvaise compagnie. Ou comprendrez chein que j'veur dithe par chonna, et ou comprendrez étout que je n'fut pas lien de crevé d'sé.

 

Heutheusement j'arrivîmes de bouonne heuthe, car autrement j'éthions yeu à nos t'nin d'but la pûs grande partie du temps, car le ring 'tait bein p'tit, le Comité ayant décidé que l'football 'tait pûs important qu' les bêtes. La Merrienne ne comprenait pas chonna, dîsant qu'oulle avait tréjous creu que Springfield appartenait ès férmiers, mais j'explitchit que d'nos jours le Département est forchi de trouvé du rév'nu ouèsqu'y peut, et que l'football ramène hardi d'sous.

 

Quand la preumié clâsse entrit, (ch'tait les g'niches r'nouv'lées), je n'criyais pas qu'éthait du run pour le lot, car y'en avait dans les quarante, et quand y s'mintes à faithe le tou du ring le mûsé d'yunne touchait la coue à l'autre. Dans les circonstances les Juges avaient une raide forte djobbe, mais ma fé, y n's'en dêshallites pas mal, sinon qu'pour mé j'éthais préféthé la deuxième à la preumièthe.

 

Dans les jeunes vaques une assez forte clâsse étout, les Juges ne fîtes pas d'mêprinses pour dithe, et j'admithîmes hardi les deux preumièthes, que sans doute nou r'vêrra au mais d'Octobre, et y faut dithe ach'teu que la bouonnefemme et mé, j'éthions préféthé autchune des deux à la g'niche r'nouv'lée tchi fit rêsérve pour le championnat. J'eut même d'la peine à empêchi la Merrienne d'allé dithe ès Juges tchèsqu'ou criyais d'yeux, mais ou décidit à la fin que la femme tch'y va à la chasse perd sa plièche, et n'bouogit pas.

 

Dans les vieilles vaques, la sienne à Missis Mouothant ne pouvait pas être battue, mais quand j'dis à la Merrienne que ch'n'tait pas êtonnant qu'ou pathaissait si jeune et si fraiche pour une vaque de huit ans, ou me d'mandit si ch'tait vrai qu'oulle avait 'tait à séc pour trais ans ou d'même.

 

“Oui,” j'l'y dit, “et sûs un sens oulle est chanceuse d'être en vie, car hardi d'propriétaithes n'éthaient pas yeu la patience d'arrêté si longtemps.”

 

“Nan,” ou s'fit, “bein seux, mais étout sûs un autre sens oulle a tait chanceuse étout, car ch'est les mousses tch'y font la minsèthe à une femme. Si j'n'avais pas yeu chutte raccachie-là, mé j'pathaitrait vingt ans pûs jeune que je n's'y, mais enfin y n'ont pas touôné mal et nous est contents de l's'avé sûs ses viers jours.”

 

Dans les boeux, quand ou vit l'énorme bête au Sieur Gotel ou s'êcriyia. “Tchèsqu'y y'ont donné à mangi, grand doux, à chutte créatuthe-là?” ou s'fit. “Y dait p'sé bétôt un tonné.”

 

“Dans les seize à djais-huit chents, sans doute,” j'l'y dit, “mais ch'est un noblye boeu quand-même, et je n'crais pas tch'y peuvent l'y hallé l'prix.”

 

Yun qu'la bouonnefemme aimait bein étout ch'tait l'sien à Harold Le Bro, tchi pathaissait chent fais mûs qu'au mais d'Mai. Mais je crai qu'les clâsses tchi l'y fites le pûs d'pliaisi ch'tait les viaux d'un an et les g'niches pliennes. Oulle éthait voulut félicité l'Sieur Horace Ayhi pour avé fait pour la deuxième fais l'preumyi dans les viaux et les boeux d'un an, mais je n'pûmes pas l'trouvé, et don che s'sa pour une autre fais.

 

Après avé veu l'show, Moussieu, pérsonne ne peut dithe que n'y'a pas ocquo hardi d'bouonnes bêtes en Jêrri. Tout ch'qu'y faut ach'teu ch'est d's'ach'teurs, et p't'être que l'show et la vendue l'préchain mais, f'thont du bein sûs che point-là. Y faut souhaité tout succès à ch't'affaithe-là.

 

Ph'lip.

1955