1955: Merrienne r'veint d'Djernezi

 Merrienne r'veint d'Djernezi.

 

La Merrienne r'vint Mardi matin de Djérnezi dans une vétuthe qu'oulle avait print sûs la cauchie. Oulle avait prèsque une doûzaine de patchets, un ouaisé dans une cage, et une r'chétte pour fricachi des vlicots qu'nou y'avait donné au Tortéva.

 

Ach'teu, Moussieu, ou comprendrez que j'avais print mes m'suthes pour ausseûthé que tout s'sait en ordre quand ou r'veindrait. Le Bram avait envié sa Sophie le Sam'di matin pour nétti la tchuîsine et lavé la vaisélle, et mé j'avais tâchi de r'pathé l'poulaillyi du mûs que j'pouvais. Il est vrai que y'avait trais poules et un canard tchi mantchaient, mais ch'tait p'tite-chose considéthant que j'éthais peut pérdre tout.

 

La Sophie m'avait apporté une doûzaine d'oeufs pour prouvé que j'avais 'tait vais ès nids touos les matins comme la Merrienne a tréjous yeu l'habitude de faithe; j'avais nétti l'êtablye, les bêtes 'taient au clios, la catte avait yeu sa souostâssée d'lait, et don, grâce à la Providence, la Merrienne ne trouvit pas à r'dithe pûs qu'chonna, sinon qu'ou n'comprenait pas comment qu'trais d'ses poules avaient attrapé un coup d'solé au mais d'Octobre.

 

Quand vint l'sé ou m'racontit tchèsque oulle avait fait et tchèsqu'oulle avait veu en Djérnezi, épis ou voulit savé tchèsqu'y s'était pâssé en Jêrri. J'l'y dit que j'n'avais pas peut allé ès shows d'bêtes, de tchi qu'ou r'mértchit que chonna n'm'avait pas fait d'ma, épis j'ajouôtit que l's'Etats avaient tait conv'nus pour Lundi. Tout d'suite la v'la intérêssie.

 

“Ch'est une drôle de saison pour une séance des Etats,” ou s'fit. “Tchèsqu'y y'a don à distchuté?”

 

“Pus d'une chose,” j'l'y dit, “et ch'est tout hardi important. A qu'menchi y faut décidé si Jêrri est pour avé un Député-Baillyi, et ouèsque est l'homme tch'est capablye de faithe la djobbe. Aut'fais, quand l'Baillyi avait des Lieutenants tch'y counaissaient la louai et avaient une longue expéthience, y n'y'avait autchune diffitchulté, mais au jour d'agniet n'y'a pas yun d'nos douze tch'y peut faithe. Epis, avec chonna, y n'faut pas oublié que la vacance pour Avocat-Général n'a pas tait remplyie. Ch'est une situâtion comme nou n'avait jamais veu, et quant à mé je n'sais vraiement pas comment qu'nou s'en va s'en dêshallé, car ch'est bein seux que j'n'avons pas l's'hommes d'aut'fais, ni sûs l'banc des Magistrats ni dans l's'Etats.”

 

“Ch'est d'notre faute,” ou dit, “et chonna nos sert bein. Si Jêrri n'avait pas fait chais bêtises-là après la libération, ou ne s'sait pas ach'teu dans chu pité-là. Mais y dait y'avé aut-chose étout, Ph'lip. Y m'semblye que j'ai ouï pâslé d'un contrat pour les êgouts tchi n'a pas pliut à l'assemblyiée, et en Djérnezi j'rencontrit un moussieu après la chapelle, tch'y tait bein intérêssi. Y voulait dithe que d'bein drôles de choses s'arrivaient en Jêrri tchi ne s'saient pas tolérées dans s'n'île. J'éthais voulu l'y donné un avis d'allé s'couochi, mais ch'tait Dîmanche, et je m'contit d'l'y dithe de s'mêlé d'ses affaithes. Je n'put pas m'empêchi d'ajouoté qu'au mains en Jêrri nou n'trouvait pas des sauvages comme j'avais rencontré au Tortéva.”

 

J'eut à rithe un mio, Moussieu, quand la bouonnefemme me dit chonna, mais je n's'y pas si seux que chu Djérnesiais n'avait pas raison. Ch'est une affaithe assez complitchie que nos Etats éthont à distchuté Lundi, mais à ma veue n'y'a qu'une chose à faithe, et j'ai dans l'idée que l'Sénateur Le Mérquand, et plusieurs autres sont d'la même opinion. Ch'est de dithe que chein qu'un certain Comité propôsait d'faithe ne peut pas être fait.”

 

“Mais crais-tu, Ph'lip,” ou d'mandit, “tch'ils éthont l'couothage de mettre lûs pids bas chutte fais?”

 

“Je n'peux pas dithe,” j'l'y dit, “mais si nos campagnards les supportent y'a toute éspethance qu'à la fin du jour y étha yeu une grande victouaithe dans la Chambre pour le parti tchi veur vais l's'affaithes condites comme y faut.”

 

Ph'lip.

1955