1955: Les choses au Portinfé.

 Les choses au Portinfé.

 

Moussieu l'Editeu,

 

Mé et la Merrienne j'avons liut les rapports dans la Post de chein tchi s'est pâssé dans l's'Etats chutte semaine, et pour dithe vrai, Moussieu, j'n'y viyons qu'bliâse. Tout ch'que j'pouvons vais ch'est qu'y'a pûs d'dêpenses que jamais et que dans deux ou trais ans Jêrri s'sa souos l'fou. La Merrienne, tch'y n'est jamais encouothante, prédit qu'l'année tchi veint y'étha d'nouvelles taxes et que, comme de couôtume, les pouôres férmiers en paiethont la pûs grande partie.

 

Je n's'y pas tout-à-fait de ch't' opinion-là, car j'avons un raide bouon président du Comité d'Agritchultuthe, et absolûment y'a assez d'campagnards dans l's'Etats pour êvité un patheil catastrophe. Avec chonna, quand j'pense ès êgouts, à l'êducation, es Travaux Publyiques, à chein qu'les cauchies s'en vont nos couôté, et à bein d'autres choses, je s'y convaintchu que l'temps apprèche quand l's'Etats n'pouôrront pas péyi vingt ch'lins au louis avec le rév'nu actuel. Une mauvaise saison d'patates et je s'sons dans la soupe.

 

Y'a d'autres choses tchi gènent la Merrienne. Par exemplye, ou s'en fut en ville au qu'mench'ment d'la s'maine pour vais les boutiques, et ou r'vint sans avé accaté même un mouochet ou une paithe de cauches. Ou veur donné des présents comme de couôtume à nos garçons et nos filles et lûs dgainges de mousses, mais ou n'sait vraiement pas comment qu'ou s'en va l'faithe ch't'année. Ou dit qu'les boutitchiers en ville sont une bande de brigands, et qu'la piupart dév'thaient être en prîson.

 

Epis, étout, j'avons tréjous yeu l'habitude d'accaté un picot pour le jour de Nouë que j'pâssons une fais ichin et une fais là, siez yun ou l'autre de notre famillye, mais j'crains hardi que ch't'année je n'pouôrront pas faithe mûs qu'un couplye des vieilles poules à la bouonnefemme, ou p't'être l'ancienne lapine tch'a 'tait mathiée bétôt une doûzaine de fais ch't'année, sans autchun r'sultat. La raison en est que quand j'm'en fut à la Ville Bagot Dimanche au sé pour tachi d'accaté un picot, nou m'en d'mandit huit ch'lins la livre, pliumes et tout. A chu compte-là, Moussieu, j'en éthais yeu pour au mains chinq ch'lins par bouochie, et sans doute j'me s'sais engoué du premié coup.

 

La Merrienne dit qu'ch'est d'ma faute, et qu'si j'l'avais êcouté j'éthions êl'vé deustrais pithos, tchi n'sont pas si d'licats quand y sont p'tits comme les picots, mais les pithos ch'est des bêtes que j'n'ai jamais aimé d'pis la bordée que j'fut attatchi par un gros balloque dans un clios et mantchi d'avé une gambe rompue. Y peuvent être pûs féroces, les pithos, qu'un tchan qu'est tréjous à la tchaine. Epis, pour vos dithe, Moussieu, le pithot et m'n'esstoumac n'accordent pas, car la viande est trop graisseuse.

 

R'venant ès Etats. Y pathais qu'nos garçons n's'en vont pas être enviés à faithe lûs deux ans d'service en Angliétêrre pour tchique temps. La Merrienne maintcheint tch'y n'y'thont jamais, car oulle a grand fouai dans notre Député tch'y n'se laisse pas m'né par le néz par autchune pérsonne, et tch'est tréjous prêt à s'battre pour la justice. Quand j'l'y dis qu'la louai a tait pâssée, et que n'y'a rain à faithe ach'teu, ou m'raipond qu'une louai peut tréjous être révotchie et qu'dans l'temps d'san grand'pèthe l's Etats éthaient bétôt tait mint à lûs pliéche. Ou pâslé étout du Sénateur Le Mérquand, mais j'vais bein qu'ou qu'menche à pérdre éspethance d'autchun aide de chu quartchi-là. Ou trouve tch'il est bein trop trantchille chais jours, et tch'il a pérdu hardi d'san couothage.

 

J'trouvons l'temps fraid chais jours, et la Merrienne a des r'frédeuses en mâsse. Le long des jours et toutes les séthées ch'est du tchérbon sûs l'feu, et je n'gagne rain d'l'y dithe. Oulle fait des grimaches quand j'vais ordonné un autre tonné, et qu'j'avons ocquo prèsque tout l'hivé à v'nin. “Quand j'n'éthons pûs d'tchérbon,” ou s'fait, “j'nos en îthons à l'hôpita, et fiche du restant.”

 

Ph'lip.

1955