1954: Rêunion Mensuelle

 L'Assembliée d'Jèrriais

Rêunion Mensuelle

 

Pour la Rêunion Mensuelle, l'Assembliée s'rêunit en plein air au Châté Elizabeth, Vendredi au sé lé 25 du mais d'Juîn, souos la Présidence du Sieur Frank Trachy, qui rempliaichit lé Connêtablye S. G. Crill, not' Président. Les membres arrivîtent à 7. 30 heures à West Park, ouais qu'il' avaient lé chouaix de s'embèrtchi dans les batchieaux spéciaux, tchi font l'trajet - sait à basse ieau, ou à haute marée jusqu'au Vier Châté! Ou bein pour les pus dêliés, d'y aller à pi'd en profitant du bouan air v'nant d'la mé.

 

Lé temps, hélas, n'était pon bé, i's'couvrit dé gros nuages, et i' s'nièrchit dé touos les bords. N'ou pouvait vaie qu'i' faudrait s'dêpéchi auve son programme, si n'ou voulait êcapper l'achie d'plyie tchi veindrait sûrement pus tard.

 

Discours par Moussieu M. C. Green.

 

I'y avait à peu près eune chentaine dé membres présents, et i's appréchîtent pour écouter Moussieu M. C. Green, qu'avait chouaisi ieune des Cours du Châté à l'abri pour nos donner un discours sus l'histouaire du Châté ! dépis les viers temps.

 

Après la première partie du discours, toute la compagnie montit jusqu'au Café, pour aver des raffraîchissements. Ensuite, n'ous' avanchit par des d'grès pus haut et en fache la maison du Gouvèrneux, ouaisqu' n'ou [f]ut ravis d'êcouter occouo des détails historiques, si bein racontés par moussieu Green, qu'est maître dé son sujet, et qui donne vie ès caractères dé chu temps-là. Touos les Jèrriais dévraient êt' fiers dé connaître l'histouaire dé lus Ile !

 

A la fin du discours lé Sieur Frank Trachy (Vice-Président) ermèrcyit Moussieu Green pour sa gentilesse d'êt' v'nu parmi nous, et dé nos aver donné un si fanmeux discours. Les membres montrîtent par lus appliaudissements qu'ils avaient 'té vraiment charmés dé ché qu'i' v'naient d'entendre. I'voulaient sé joindre sans exception, à r'mèrcier Moussieu Green du fond d'lus tchœurs.

 

Visite de deux vièrs Jèrriais.

 

J'êumes le grand pliaisi d'aver auve nous deux vrais jèrriais. Moussieu Le Rossignol, qui nos dît qu'il avait 'té 50 ans en Angliéterre; et le Sieur Nelson Gallichan, dé la Trinité, aut' fais ervénu dé le Nouvelle Zélande aprés 28 ans, auve sa dame. I fûtent touos les trais, les beinv'nus dans notre Assembliée.

 

Nouvieaux Membres.

 

Faute de temps la Rêu[n]ion fut hardi raccourchie. Les nouvieaux membres êlus sont: Mlle. Clarice Noel, Mme. Olive Mollet, et Mèssieux Stanley Vallois, David de la Haye, et Alan Mollet.

 

Le Sieur G. W. Bertram fut empêchi de prendre son Ciné Film des membres en viers costumes, à cause du mauvais temps, l'n'y avait pon assez d'lumière, mais j'espérons que ch'nest qu'eune occasion erminse. Le Bulletin No. 7 est en vente, et ch'est seûre qué les membres, et autres, s'en vont en profiter.

 

Préchaine Rêunion.

 

I'n'y éra pon d'Rêunion dans l'mais d'Juilet, mais les membres dé l'Assembliée ont l'idée d'aver la préchaine rêunion en Sercq. Le 9 d'Août si l'temps pèrmet.

 

Annonce pus tard dans la gâzette.

 

1954